ከሳ ማፃፋ 29

ካህነታ ሹሞ ዎጋ

1 "አሮንነ እያ ናይት ካህነተን ታዉ ሀጋዛና መላ ኔኒ ኤንታ ዱማያናዉ ሀይሳዳ ኦ፤ ቦረይ ባይና ዎፋኖነ ናምኡ ማራዘ ኤካ። 2 ጌሻ ግስተ ለ ኤካዳ፥ እርሾ የጎና ሻማሆ ዛይተራ ግንዳዳ ኡይ ኡካ። ቃስ ዛይተይ ገሎና ሀራ ኡይ ኡካ፤ ሄሳዳካ፥ ሌኦ ኡይ ኡካዳ ዛይተን ትያ። 3 ዎፋኑዋነ ናምኡ ማራዘታ ያርሽያ ዎደ ሄ ኡይ ኡባ ጋይታን ዎዳ ታዉ ሺሻ።

4 "ያታዳ አሮናነ እያ ናይታ ጌሻ ዱንካንያ ፐንገ ኤሀዳ ሃን ኤንቲ ሜጨታና መላ ኦዳ። 5 ሄሳፈ ጉየ፥ ካህነተ ማኦታ፥ ሻምዝያ፥ ኤፉድያ፥ ኤፉድያ ቦላራ ማእያ አዱሳ ማኡዋነ ትራን ማኤትያ ማኡዋ አሮና ማይዛ፤ ዳንጩዋካ ዳንጭሳ። 6 ቃጭያ ቃጭሳ፤ እያ ቦላ፥ ‘ጎዳስ ዱማትስ’ ጌተትድ ፃፈትዳ ዎርቃ አሌቁዋ ዎ። 7 ትሻ ዛይትያ ኤካዳ እያ ሁጵያን ትጋዳ ትያ። 8 እያ ናይታ ኤሀዳ ሻምዝያ ማይዛ። 9 ኤንታ ፄሳ ዳንጭሳ፤ ኤንታ ሁጵያንካ ቆበ ዎ። አሮናነ እያ ናይታ ያታዳ ካህነተን ሹማ። ሄስካ፥ ኤንታዉ መርና ዎጋ ግዶ።

10 "ዎፋኑዋ ጌሻ ዱንካንያ ስን ኤሀዳ፥ አሮንነ እያ ናይት እያ ሁጵያን ባንታ ኩሽያ ዎና መላ ኦ። 11 ዎፋኑዋ ጌሻ ዱንካንያ ፐንግያን ጎዳ ስንን ሹካ። 12 ዎፋኑዋ ሱፈ ጉ ኤካዳ ነ ብራያን፥ ያርሾ በሳ ቦላ ደእያ ካጨታ ትያ። አትዳይሳ ያርሾ በሳፈ ጋርሳን ጉሳ። 13 ሄሳፈ ጉየ፥ ኡሎ አሹዋ ካምዳ ሞዋ ኡባ፥ ትርያስ ሎኦ ባጋ፥ ናምኡ ክላሆታነ ኤንታ ካምዳ ሞዋ ኤካዳ፥ ያርሾ በሳ ቦላ ዎዳ ፁጋ። 14 ሽን ዎፋኑዋ ኡሎ አሹዋ፥ እያ ጋልባነ ማራጭያ ጉታፐ ጋፃ ከሳዳ ፁጋ። ሄስ ካህነታ ናጋራ ቁችያ ያርሾ።

15 "ናምኡ ማራዘታፐ እሱዋ ኤካዳ፥ አሮንነ እያ ናይት ባንታ ኩሽያ እያ ሁጰን ዎና መላ ኦ። 16 ሄ ማራዝያ ሹካዳ፥ ሱ ያርሾ በሳን ኦይዱ ማዛነታን ዉርፃ። 17 እያ አሹዋ ቃንፀረዳ፥ ኡሎ አሹዋነ ገዳ ሜጫዳ፥ ሁጵያ ሀራ ቆሞ አሾታራ እስፈ ያርሾ በሳን ዎ። 18 ሄሳፈ ጉየ፥ ኩመ አሹዋ ያርሾ በሳን ፁጋ። ሄስካ ጎዳስ ፁሳ ያርሾ። ሄ ያርሹዋ ሳዎይ ጎዳ ኡፋይሴስ።

19 "ቃስ ካህነተ ዎጋስ ኤከትዳ ሀንኮ ማራዝያ ኤካዳ አሮንነ እያ ናይት ባንታ ኩሽያ እያ ሁጰን ዎና መላ ኦዳ። 20 እያ ሹካዳ፥ ሱፈ ጉ ኤካዳ፥ አሮናስነ እያ ናይታስ ኡሻቻ ሀይታስ ጋፃ፥ ኤንታ ኡሻቻ ኩሽያስነ ቶሁዋስ ዎጋ ብራታ ትያ። አትዳ ሱ ያርሾ በሳ ኦይዱ ማዛነታን ዉርፃ። 21 ያርሾ በሳን ደእያ ሱፈነ ትይያ ዛይትያፐ ጉ ኤካዳ፥ አሮና ቦላነ እያ ማኡዋ ቦላ፥ ቃስካ እያ ናይታ ቦላነ ኤንታ ማኡዋ ቦላ ዉርፃ። ሄሳን አሮንነ እያ ናይት ባንታ ማኡዋራ ታዉ ዱማትዳይሳታ ግዳና።

22 "ሄ ማራዘይ ካህነታ ሹማ ዎጋስ ኤከትያ ግሾ፥ ጎይና ሞዋ፥ ኡሎ አሹዋ ካምዳ ሞዋ፥ ትርያ ካምዳ ሞያ፥ ናምኡ ክላሆታ፥ ኤንታ ካምዳ ሞያነ ኡሻቻ ጉየ ገዳ ቃንፃዳ ሻካ። 23 ጎዳ ስንን ዎዳ ኡይታፐ፥ ዛይተይ ገልቦና ኡይ፥ ዛይተራ ኡክዳ ኡይነ ሌኦ ኡይፈ እሱዋ ኤካ። 24 ኔኒ ሀ ካ ኡባ አሮና ኩሽያንነ እያ ናይታ ኩሽያን ዎ። ኤንቲ እያ ዩሾ ያርሾ ኦድ ጎዳስ እምያ ያርሾ ኦድ ጎዳ ስንን ሺሾ። 25 ሄሳፈ ጉየ፥ ኤንታ ኩሸፐ ኤካዳ ያርሾ በሳ ቦላ ዎ፤ ፁሳ ያርሹዋራ ጋዳ፥ ጎዳ ሳዋና መላ ያርሾ በሳ ቦላ ታማን ፁጋ። 26 አሮን ካህነ ግድድ ሹመትያ ዎደ ሹክዳ ማራዝያ አንጋሱዋ ኤካዳ፥ ጎዳ ስንን ዩሾ ያርሾ ኦ። ሄስ ህንተና ጋክያ ግሾ ግዳና።

27 "ካህነይ ሹመትያ ዎደ፥ አሮናነ እያ ናይታ ካህነተን ሹማናዉ ኤከትዳ አንጋሱዋነ ቶሆ አሹዋ ታዉ ዱማያ። ሄስካ፥ ካህነታ ጋክያ ግሾ ግዶ። 28 እስራኤለት ኡባይ ካህነ ሹማናዉ ዎይኮ አንጀታናዉ ጎዳስ አንጋሶነ ጉየ ቶሆ ያርሾ እምያ ዎደ አሾይ ታዉ ዱማትዳይሳ ግዶ። ሽን ግሾይ አሮናስነ እያ ናይታስ ጋኮ፤ ሄ ዎጋይ ላመቶፎ።

29 "አሮን ሀይቅዳ ዎደ እያ ናይት እያ ካህነተ ማኡዋ ላቶ። ኤንቲ ካህነተን ሹመትዳፐ ጉየ ሄ ማኡዋ ማኦ። 30 እያ ናይታፐ እያ በሳን ካህነ ግድድ፥ ጌሻ በሳን ሀጋዛናዉ ጌሻ ዱንካንያ ይያ ናእ ሄ ማኡዋ ላፑን ጋላስ ማኦ።

31 "አሮንነ እያ ናይት ካህነ ግድድ ሹመትያ ዎደ ሹከትዳ ማራዝያ አሹዋ ኤካዳ፥ ጌሻ በሳን ካ። 32 አሮንነ እያ ናይት ማራዝያ አሹዋ ጋይታን አትዳ ኡይራ ጌሻ ዱንካንያ ፐንገን ሞ። 33 ኤንቲ ካህነ ግድድ ሹመትያ ዎደ ናጋራ አቶተስ ያርሸትዳ ሄ አሹዋ ሞና። ሽን ሄ ካይ ጌሽ ግድዳ ግሾ፥ ካህነታ ፃላል ሞ፤ ሀራ አስ ኦንካ ሞፖ። 34 አሹዋፐነ ካፈ ምሽን አትድ አቅኮ፥ ታማን ፁገቶ፤ ጌሽ ግድዳ ግሾ ሜተቶፎ።

35 "አሮንነ እያ ናይት ካህነ ግድድ ሹመትያ ዎደ፥ ታ ነና ኪትዳ ኡባ ኦ፤ ባለይ ላፑን ጋላሳን ፖለቶ። 36 ናጋራ አቶተስ እስ እስ ጋላሳን እስ ዎፋኖ ሹካዳ ያርሻ። ሄስ ያርሾ በሳ ጌሼስ። ያታዳ ያርሾ በሳ ፖሎ ጌሻናዉ ሻማሆ ዛይተ ትያ። 37 ሄሳ ላፑን ጋላስ ጋካናዉ ጋላስ ጋላስ ኦ። ያትኮ ያርሾ በሳይ ፖሎ ጌሽ ግዳና። እ ፖሎ ጌሽ ግድዳ ግሾ፥ እያ ቦችያ አስ ዎይኮ ሀራባ ኡባይ ጌያና።

ጋላሳ ያርሾ

38 "ላይን ላይን ያርሾ በሳን ጋላስ ጋላስ እስ ላይ ግድዳ ናምኡ ማራዘታ ያርሻ። 39 ማራዘታፐ እሱዋ ዎንታ፥ ቃስ ሀንኩዋ ኦማርስ ያርሻ። 40 ኮይሮ ማራዝያራ እስ ክሎ ግራመ ግድያ ጌሻ ሎኦ ግስተ ለ፥ እስ ልትሮ ሻማሆ ዛይተራ ግንዳዳ ያርሻ። እስ ልትሮ ዎይነ ኡሻ ያርሾ ኦዳ ጉሳ። 41 ሀንኮ ማራዝያ ኦማርስ ያርሻሸ ዎንታ ያርሾይሳ መላ ለ፥ ዛይተነ ዎይነ ኡሻ ሺሻ። ሄስ ታዉ ያርሸትያ ካ ያርሾ፤ እያ ሳዎይ ታና ኡፋይሰይሳ ግዳና።

42 "ላይን ላይን ሄ ፁሳ ያርሾይ ጌሻ ዱንካንያ ፐንገን፥ ጎዳ ስንን ፓጭ ባይና ያሸታናዉ በሴስ። ሄ በሳን ታኒ ታ ደርያራ ጋሄታና፤ ኔራካ ያን ኦደታና። 43 ያን ታኒ እስራኤለታራ ጋሄታና፤ ታ ቦንቾይ ሄ በሳ ዱማያና። 44 ታኒ ጌሻ ዱንካንያነ ያርሾ በሳ ዱማያና፤ ኤንቲ ታዉ ካህነ ግድድ ሀጋዛና መላ አሮናነ እያ ናይታ ዱማያና። 45 ያታዳ፥ ታኒ እስራኤለታ ግዶን ዳና፤ ኤንታ ፆሳ ግዳና። 46 ኤንታ ግዶን ዳናዉ ግብፀፈ ኤንታ ከስዳ ጎዳይ፥ ኤንታ ፆሳይ ታና ግደይሳ ኤንቲ ኤራና። ታኒ ጎዳ፥ ኤንታ ፆሳ።