ከሳ ማፃፋ 36

1 "ሄሳ ግሾ፥ ባስልኤል፥ ኤልያብነ ጌሻ ዱንካንያ ኬፃና መላ ጎዳይ ሂላነ ኤራተ እምዳ አሳ ኡባይ፥ ጎዳይ ኪትዳይሳዳ ኡባባ ኦና" ያግስ።

እሙዋ ዳሮተ

2 ሙሰይ ባስልኤላ፥ ኤልያባ፥ ጎዳይ ዱማ ኤራተ እምዳይሳታነ ኦሶ ኦናዉ ኮይያ ኡባ ፄግድ፥ ኦሱዋ ዶማና መላ ኪትስ። 3 ኤንቲ፥ እስራኤለ አሳይ ጌሻ ዱንካንያ ኦናዉ ኤህዳ እሞ ኡባ ሙሰ ኩሸፐ ኤክዶሶና። ቃስ አሳይ ባ ዶሳን እምያ እሞታ ዎንታ ዎንታ ኤሁዋ አግቦኮና። 4 ያትን፥ ጌሻ ዱንካንያ ኦያ ሂላንቾት ባንታ ኦሱዋ ኤስድ፥ ሙሰኮ ብድ፥ 5 "አሳይ፥ ጎዳይ ኪትዳ ኦሱዋስ ኮሸይሳፈ አድ ኤሆ ቦላ ደኦሶና" ያግዶሶና።

6 ሙሰይ፥ "ጌሻ ዱንካንያ ኬፃናዉ ኦንካ እምያባ ኤሆፖ" ያግድ ኪትን፥ አሳይ ኤሄይሳ አጋግዶሶና። 7 ኤንቲ ኤህዳ እሞታይ ኦሶ ኡባ ኦ ፖላናዉ ግድድ ፓላሄስ።

ጌሻ ዱንካነ ኦሱዋ

8 ኦሱዋ ኦይሳታፐ ሂላን አይሳት ጌሻ ዱንካንያ ኦዶሶና። ኤንቲ እያ አልኦ ሊኖፐ፥ ካሎሰን ኦቻ ቴራ ዳነይሳንነ ዞኦ ቃጭናን አሌቅስድ ዳድዳ ታሙ ገሸታ ጊግስድ፥ እያ ቦላ ክሩበታ ምስልያ ስክዶሶና። 9 ማጋራጆት ኡባይ እስ ግና ግድድ፥ አዱሳተይ ላታማነ ኦይዱ ዋ፥ ጎምፓይ ኦይዱ ዋ። 10 እቻሹ ገሸታ እስፈ ጋድ ስክዶሶና፤ ቃስ ሀንኮ አትዳ እቻሹ ገሸታካ ሄሳዳ ኦዶሶና። 11 እስፈ ጋድ ስክዳ ገሸታፐ እስ ማጋራጁዋስ ዉርሰ ጋፃን ካሎሰ አፍላፐ ኦሰትዳ ሳጋዮታ መዶሶና። ቃስ እስፈ ጋድ ስክዳ ሀንኮ ገሸታፐ እሱዋ ጋፃንካ ሄሳዳ ኦዶሶና። 12 ኤንቲ እስፈ ስከትዳ ኮይሮ ማጋራጁዋ ቦላ ኮይሮ ማራን ካሎሰ አፍላፐ ኦሰትዳ እሻታሙ ሳጋዮታ፥ ሄሳዳካ ናምአን ማጋራጁዋ ቦላ ዉርሰ ማራን፥ ሀንኮ ሳጋዮታ ግናን፥ እሻታሙ ሳጋዮታ ኦዶሶና። 13 ኤንቲ ናምኡ ባጋን ደእያ ገሸታ ጋሰድ እስኖ ኦናዉ ዎርቃፈ እሻታሙ ኦይክያ በሳታ መዶሶና።

14 ጌሻ ዱንካንያ ቦላራ ካማናዉ ታማነ እስ ገሸታ ዴሻ እክሰፐ ዳድዶሶና። 15 ታማነ እስ ገሸታ አዱሳተ ላታማነ ኡሱፑን ዋ፥ ጎምፓ ኦይዱ ዋ ኦድ መዶሶና። 16 እቻሹ ገሸታ እስ ባጋራ፥ ቃስ ኡሱፑን ገሸታ ሀንኮ ባጋራ ጋድ ስክዶሶና። 17 ዎል ጋድ ስክዳ ገሸታፐ ዉርሰ ማጋራጁዋ ማጫራን እሻታሙ ሳጋዮታ፥ ቃስ ዎል ጋድ ስክዳ ሀንኮ ገሸታፐ ዉርሰ ማጋራጁዋ ማጫራን እሻታሙ ሳጋዮታ መዶሶና። 18 ናምኡ ባጋራ ደእያ ገሸታ ጋሰድ እስ ካማ ኦናዉ ናሰ ብራታፐ እሻታሙ ኦይክያ በሳታ መዶሶና። 19 ዱንካንያ ካማናዉ ዞኦ ቃላመን የግ ከስዳ ዶርሳ እተ፥ ቃስ እያ ቦላራ ካማናዉ ሎኦ ዶአ እተ ጊግስዶሶና።

20 ጌሻ ዱንካንያ ቱቀታ ሶቃላ ምፈ ከስዶሶና። 21 እስ እስ ቱቅያ አዱሳተይ ታሙ ዋ፥ ጎምፓይ እስ ዋነ ታካ። 22 እስ ቱቅያ እሱዋራ ጋሰናዉ ናምኡ ሉሆት ደኦሶና። ጌሻ ዱንካንያ ቱቀታ ኡባ ሄሳዳ ኦዶሶና። 23 ጌሻ ዱንካንያስ ዱገሀ ባጋራ ላታሙ ቱቀታ መዶሶና። 24 እስ እስ ቱቀታስ ናምኡ ቶሆ መድ፥ ሄ ቶሆታ ኦይናዉ ኦይታሙ ሉሆታ ብራታፐ ጊግስዶሶና። 25 ጌሻ ዱንካንያስ ፑደሀ ባጋራ ላታሙ ቱቀታ መዶሶና። 26 እስ እስ ቱቀታስ ናምኡ ቶሆ መድ፥ ሄ ቶሆታ ኦይናዉ ኦይታሙ ሉሆታ ብራታፐ ጊግስዶሶና። 27 ጌሻ ዱንካንያስ ጉየ ባጋን፥ ዉሎሀ ባጋራ ኡሱፑን ቱቀታ መዶሶና። 28 ጌሻ ዱንካንያ ጉየ ባጋን ደእያ ማዛነታስ ናምኡ ቱቀታ ጊግስዶሶና። 29 ሄ ናምኡ ማዛነ ቱቀት ፃጶፐ ፄራ ጋካናዉ ኦይከት ብዶሶና። ናምኡ ማዛንያን ደእያ ናምኡ ቱቀት ሄሳዳ ሀንድ ኦሰትዶሶና። 30 ሄሳ ግሾ፥ እስ እስ ቱቅያስ ጋርሳን ናምኡ ናምኡ ቶሆት ደኦሶና። ሆስፑን ቱቀታስ ብራታፐ ኦሰትዳ ታማነ ኡሱፑን ቶሆት ደኦሶና።

31 ቃስ ኤንቲ ሶቃላ ምፈ ታማነ እቻሹ ልዮታ ከስዶሶና። እቻሹ ልዮት ጌሻ ዱንካንያ እስ ባጋ ምየን፥ 32 ቃስ እቻሹ ልዮታ ሀንኮ ባጋ ምየን፥ ሄሳዳካ እቻሹ ልዮታ ጉየ ባጋራ ዉሎሀ ባጋን ዎዶሶና። 33 ቱኡቀታስ ምየ ባጋራ ግዶን ደእያ ልዮይ፥ ሀ ጋፃፐ ያ ጋፃ ጋካናዉ ካን ከያና መላ ኦዶሶና። 34 ቱኡቀታነ ልዮታ ዎርቃን ላንፅዶሶና። ልዮት ኤንታ ግዶራ ካን አና መላ ዎርቃ ሳጋዮታ ቱቀታራ ኦይሰዶሶና።

35 ማጋራጁዋ አልኦ ሊኖፐ ካሎሰን፥ ኦቻ ቴራ ዳነይሳንነ፥ ዞኦ ቃጭናን አሌቅስድ ኦዶሶና። ሄ ማጋራጁዋ ቦላ ክሩበ ምስለታ ስክዶሶና። 36 ማጋራጁዋ ካቃናዉ ኦይዱ ቱሳታ ሶቃላ ምፈ ጊግስድ፥ ዎርቃን ላንፅዶሶና። ያትድ ዎርቃ ሳጋዮታ ኤንታስ ጊግስዶሶና። ቃስ ቱሳታ ኤስያ ኦይዱ ቶሆታ ብራ ብራታፐ መዶሶና። 37 ጌሻ ዱንካንያ ፐንግያስ አልኦ ሊኖፐ ካሎሰን፥ ኦቻ ቴራ ዳነይሳፈነ ዞኦ ቃጭናን አሌቅስድ ማጋራጆ ጊግስዶሶና። 38 ቃስ እያዉ ኮጫት ደእያ እቻሹ ቱሳታ መድ፥ ኤንታዉ ፄራነ ቶሁዋ ዎርቃን ላንፅዶሶና። ቱሳታስ ናሰ ብራታፐ ኦሰትዳ እቻሹ ቶሆታ ጊግስዶሶና።