ቦለ ጋዶ
1 ባቱኤላ ናኣ እዩኤላኮ ጎዳይ ኪትዳ ቃላይ ሀይሳ። 2 ህንተኖ ጭማቶ፥ ሀይሳ ስእተ! ይሁዳ ቢታን ደእያ አሳ ኡባይ ስእተ! ሀይሳ መላባይ ህንተ ዎደ ዎይኮ ህንተ አዋታ ዎደ ሀን ኤሪ?
3 ሀይሳ ህንተ ናይታስ ኦድተ፤
ህንተ ናይት ባንታ ናይታስ ኦዶ፤
ኤንታ ናይት ካልያ የለታስ ኦዶ።
4 ጎንዶፈ አትዳ ካ ቦለይ ምስ፤
ቦለፐ አትዳ ካ ጉዶይ ምስ፤
ጉዶፈ አትዳ ካ ፃቆይ ምስ።
5 ማልእያ ዎይነይ ህንተፈ አትዳ ግሾ፥
ህንተኖ፥ ማተይሳቶ ባርክተ ዬክተ!
ህንተኖ፥ ዎይነ ኡያ ኡባት ዘሌልተ!
6 ታይቦይ ባይና ቦለይ ታ ቢታ ኦይክስ፤
ኤንታ አቻይ ጋሞ አቻ መላ፤
ኤንታ ጋጮይ ማጫ ጋሞ ጋጮ መላ።
7 ኤንቲ ታ ዎይንያ ይስዶሶና፤
ታ ባላስያ ም ግዶሶና።
ኤንቲ ፖቅድ ምዳ ግሾ፥
ዎይንያነ ባላስያ ታሸት ፑፁ ግስ።
8 ጌላእያ፥ ባ ጊግዳ አዝናይ ሀይቅን፥
ካዮ ማኦ ማአዳ ዬከይሳዳ ህንተካ ዬክተ!
9 ካ ያርሾይነ ኡሻ ያርሾይ
ጎዳ ኬን ይዳ ግሾ፥
ጎዳ ኬን ኦያ ካህነት ዬኮሶና።
10 ጎሻይ መላ አትስ፤ ቢታይ ዬኬስ፤
ካይ ይስ፤ ዎይነይነ ዛይተይ መልስ።
11 ጋደን ደእያ ግስተይነ ባንግ ይዳ ግሾ፥
ህንተኖ ጎሻንቾቶ፥ ካዮትተ፤
ህንተኖ ዎይነ ቶከይሳቶ፥ ዘሌልተ!
12 ዎይነይ መልስ፤ ባላሰይ ሹልስ፤
ኦሮማነይ፥ ተምረይ፥ አፕለይ፥
ጋደን ደእያ ሀራ ም ኡባይ መልስ፤
ሄሳ ግሾ፥ አሳፐ ኡፋይስ ሃክስ።
ማሮታኮ ፄስ
13 ህንተኖ ካህነቶ፥ ካዮ ማኦ ማእድ ዬክተ፤
ህንተኖ ያርሾ በሳ ስንን ኦይሳቶ፥ ዘሌልተ።
ህንተኖ ታ ፆሳ ስንን ኦይሳቶ፥
ፆሳ ኬ ገልድ ካዮ ማኦ ማእድ አቅተ።
ካ ያርሾይነ ኡሻ ያርሾይ፥
ፆሳ ኬን ያርሽያባይ ባዋ።
14 ፆማ አዋጅተ፤
ጌሻ ሺቆ ፄግተ።
ጭማታነ ቢታን ደእያ አሳ ኡባ
ጎዳ ህንተ ፆሳ ኬን ሺሽተ፤
ያን ጎዳኮ ዋስተ።
15 ጎዳ ጋላሳይ ማትስ፤
ሄ ጋላሳ አየ!
ሄ ጋላሳይ ኡባ ዳንዳእያ ፆሳ
ሀንቆ ጋላስ ግድድ ዬስ።
16 ኑ ስንፈ ካ፥
ኑ ፆሳ ኬፈ፥
ኡፋይስነ እልልስ ይስ ግደኔ?
17 ዘረትዳ ዘረይ ቢታ ግዶን ቡቅስ፤
ካይ ይዳ ግሾ ኤለይ ካሎትስ፤
ሻለይ ላለትስ።
18 ሄምያ በሲ ባይና ግሾ፥
መሄይ ዋሴስ።
ሀር አቶሽን ዶርሳ ዉደይካ
ማታ ይድ ኡንኤቴስ።
19 አቤት ጎዳዉ፥ ባዙዋ ታም ምዳ ግሾ፥
ፃራግ ደንባን ደእያ ማታ ፁግዳ ግሾ፥
ዎራ ም ታማ ላጮይ ይስዳ ግሾ፥
ታኒ ኔኮ ዋሳይስ።
20 ጎግያ ሃ መልዳ ግሾ፥
ታም ባዞን ደእያ ማታ ምድግዳ ግሾ፥
ባዞ ዶአትካ ኔኮ ዋሶሶና።