1 ፅዮነን ሞይዘ ፑንተ፤

ታ ጌሻ ዙማ ቦላ ዋስተ።

ቢታን ደእያ አስ ኡባይ ኮኮሮ፤

ጎዳ ጋላሳይ ዬስ፤ ካረን ደኤስ።

2 ሄ ጋላሳይ ማነ ጫጋና ጋላስ፤

ሻራነ ሳካና ማ ጋላስ!

ዙማ ቦላ ፃልቀይ ጫረይሳዳ

ዳሮነ ዎልቃማ ቦለይ ቢታ ማአና።

ሄሳ መላባይ ካሰ ሀንቤና፥

ስንፈካ ሄሳ መላባይ ሀነና።

3 ኤንታፈ ስንራ ምያ ታም ቤስ፤

ኤንታፈ ጉየራ ላጮይ ፁጌስ።

ኤንታ ስንይ ጋናተ መላ፤

ሽን ኤንታ ጉየይ ቦድላ ባዞ መላ፤

ኤንታፈ አይብካ ከስ ኤከና።

4 ኤንታ መይ ፓራ መ መላ፤

ኤንቲ ኦላ ፓራዳ አዳርሶሶና።

5 ፓር ጎችያ ጋረዳ ጊሮሶና፤

ደርያ ሁጰራ ጉፖሶና።

ቡርያ ምያ ታማ ላጮዳ ፁጎሶና፤

ኦላ ባናዉ ከይዳ ዎልቃማ ኦላንቾ ዳኖሶና።

6 ኤንታ ስንን አስ ኮኮሬስ፤

ያሻን አሳ ሶምኦይ ካሬፄስ።

7 ኤንቲ ኦላንቾዳ ዎፆሶና፤

ቶራ አሳዳ ድርሳ ቦላራ ጉፖሶና።

ኤንቲ ኡባይ ማራን ቦሶና፤

ባንታ ሳልፕያፈ ጋፃ ከዮኮና።

8 እሶይ እሱዋራ ሱገቶኮና፤

ኡባይ ቅንፅ ግድ ስን ቦሶና።

ኤንቲ ባንታራ ኤቀተይሳታ መንድ ቦሶና፤

ኤንታ ተቅያባይ ባዋ።

9 ኤንቲ ካታማ ኦይኮሶና፤

ድርሳ ግምብያ ቦላራ ዎፆሶና።

ኤንቲ ኬ ቦላ ከዮሶና፤

ካይሶዳ ማስኮተራ ገሎሶና።

10 ኤንታ ስንን ቢት ቃፄስ፤

ሳሎት ኮኮሮሶና።

አውነ አጌን ሜስ፤

ፆልንቶት ባንታ ፖኡዋ ድጎሶና።

11 ጎዳይ ባ ኦላንቾታ ስንን ጉሜስ፤

እያዉ ኪተትያ ኦላንቾት ታይቦፐ ቦላ።

ጎዳ ጋላሳይ ግታነ ዳሮ ያሼስ፤

ሄ ጋላሳ ዳንዳአናይ ኦኔ?

12 "ሀእካ ፆማን፥ ዬሆንነ አዛኖን

ህንተ ፖሎ ዎዛናፐ ታኮ ስምተ።"

13 ህንተ ዎዛናፐ አትሽን፥

ህንተ ማኡዋ ፔፕተ።

ጎዳ፥ ህንተ ፆሳኮ፥ ስምተ፤

እ፥ ቃይነ ማሮት ኩምዳይሳ፤

እ፥ ሀንቃናዉ ኤለሶናይሳነ ሲቆይ ዳርዳይሳ፤

እ፥ ህንተና ሴራናዉ ኤለሰና።

14 ጎዳይ ህንተ ፆሳይ፥

ባ ሀንቁዋፈ ስሚድ

ህንተና አንጃነኮ ኦን ኤሪ?

ሄ ዎደ ጎዳስ ህንተ ፆሳስ፥

ካ ያርሾነ ኡሻ ያርሾ ያርሻና።

15 ፅዮነን ሞይዘ ፑንተ፤

ፆማ አዋጅተ፤

ጌሻ ሺቁዋ ሺቅተ!

16 አሳ ሺሽድ፥ ህንተ ሺቁዋ ጌሽተ፤

ጭማታ እስፈ ሺሽተ፤

ጉ ናይታነ መይሳታ አሾፍተ።

መዳን ደኤይሳት

ባንታ ቁሩፁዋፐ ከዮ።

17 ጎዳስ ኦያ ካህነት ፆሳ ኬ

ባራንዳፈነ ያርሾ በሳፈ ግዶን ኤቅድ ዬኮ።

ኤንቲ ሀይሳዳ ያግድ ዎሶ፤

"አቤት ጎዳዉ፥ ነ አሳስ ቃታ፤

ካዎተት፥ ‘ኤንታ ፆሳይ አዉኔ? ያጋና መላ ኦዳ፥

ነ አሳ ቦረስነ ሚቻስ የጎፋ’ " ያጎ።

18 ጎዳይ ባ ቢታስ ደእያ ምሻን

ባ አሳስ ቃትስ።

19 ጎዳይ ዛሪድ ባ አሳ ሀይሳዳ ያጋና፤

"ሄኮ፥ ታኒ ህንተዉ ካ፥ ዎይንያነ ዛይትያ፥

ካልሳና ጋካናዉ የዳና፤

ህዛፐ ጉየ ካዎተታ ግዶን ህንተና ቦረስ አግከ።"

20 "ፑደሀ ባጋራ ይዳ ቦልያ፥

ታኒ የደዳ ህንተፈ ሃሳና።

ባይሳነ መላ ቢታ ኤንታ ጎዳና፤

ስን ባጋራ ደኤይሳታ ማፅነ አባ፥

ጉየ ባጋራ ደኤይሳታ መደትራነ አባ፥ የደና፤

ያን ኤንቲ ሀይቅድ ፅንቃና።

ቱማ ጎዳይ ዎልቃማባ ህንተዉ ኦስ" ያጋና።

21 ቢታዉ፥ ህዛ ያዮፋ፤

ጎዳይ ግታባ ኦዳ ግሾ፥

ኡፋይታነ ሀሹ ጋ!

22 ህንተኖ ሳኣ መሄቶ፥ ያዮፍተ፤

ባዞን ደእያ ማታይ አጭስ።

ምይ አይፍስ፤

ባላሰይነ ዎይነ አይፈይ ቡርኩክስ።

23 ህንተኖ ፅዮነ አሳቶ፥ ኡፋይትተ፤

ጎዳን ህንተ ፆሳን፥ ሀሹ ጊተ!

እ፥ ባልጎ እራ ህንተዉ ዳርስድ እሚስ፤

ካሰይሳዳ ስላነ ቶርቸ እራ ግድስድ እሚስ።

24 ካ ቡክያ ዉዱማን ካ ኩማና፤

ዎይንያነ ዛይትያ ጉምእያ ኦላይ ኩምድ ፓላሀና።

25 ካሰ ታኒ ህንተ ግዶ የድዳ፥

ዎልቃማ ጎንዶይ፥ ቦለይ፥ ጉዶትነ ፃቆት ምዳይሳ፥

ታ ህንተዉ ዛራና።

26 ህንተ ምን ካልስድ ፓላህያ ካ ዳና፤

ማላልስያባ ህንተዉ ኦዳ ጎዳ።

ህንተ ፆሳ ሱን ጋላታና፤

ታ አሳይ ዛሪድ ዬላተና።

27 ሄ ዎደ ታኒ እስራኤለ ግዶን ደኤይሳ፥

ታኒ ጎዳይ ህንተ ፆሳ ግደይሳነ

ታፐ ሀራ ፆሲ ባይናይሳ ህንተ ኤራና።

ታ አሳይ ዛሪድ ዬላተና።

28 ህዛፐ ጉየ ሀይሳዳ ሀናና፤

ታኒ አሳ ኡባ ቦላ ታ አያና ጉሳና።

ህንተ አደ ናይትነ ማጫ ናይት ትንብተ ኦዳና፤

ህንተ ጭማት አሙሆ አሙሀና፤

ህንተ ናአተት ቆንጨ በአና።

29 ሄ ጋላሳታን ታ አደ አይለልታ ቦላነ

ታ ማጫ አይለታ ቦላ ታ አያና ጉሳና።

30 ታኒ ሳሎንነ ሳአን ማላልስያባ ኦና፥

ታማነ ሳሎ ደንድያ ጩያ በሳና።

31 ግታነ ያሽያ ጎዳ ጋላሳይ ያናፐ ካሰ፥

አው ማና፤ አጌን ሱ ዳናና።

32 ሄ ዎደ ሀይሳዳ ሀናና፤

ጎዳ ሱን ፄግያ ኡባይ አታና።

ጎዳይ ግዳይሳዳ ፅዮነ ዙማንነ

የሩሳላመን አትዳይሳት ዳና።