1 ፓስካ ቦንችያ ጋላሳፐ ኡሱፑን ጋላስ ስንትድ፥ የሱሲ ሀይቆፐ ደንዳ አላዛር ደእያ ጉታ፥ ብታነ ብስ። 2 ሄ በሳን ኤንቲ እያዉ ካሆ ጊግስዶሶና። አላዛር የሱሳራ እስፈ ጋይታ ቦላ ኡትዳሽን ማርት ኤንታና እማታዉሱ። 3 ማይራማ ናርዶሰ ጌተትያ ዳሮ አልኦ ጌሻ ሽቶ ኤሀዳ የሱሳ ቶሁዋ ትያሱ። ባ ብናናን እያ ቶሁዋ ቁቻሱ፤ ኬ ኡባይ ሽቶ ሳዎን ቶንኩ ግስ።✝

4 ሽን የሱሳ ታማረታፐ እሶይ፥ የሱሳ አድ እማናይስ፥ አስቆሮታ ይሁዳ፥ 5 "አይስ ሀ ሽቶይ ሄ ፄቱ ድናረን ባይዘትድ፥ ሚሸይ ማንቆታስ እመተኔ?" ያግስ። 6 እ ካይሶ ግድዳ ግሾ ሄሳ ግስፐ አትሽን፥ ማንቆታስ ቃትድ ግቤና። እ ሚሸ ካርፂታ ኦይከይሳ ግድያ ግሾ ኡባ ዎደ እያፐ ባዉ ኤኬስ።

7 የሱሲ፥ "እያ ባዉ ደእያባ ታ ሞጎ ጋላሳስ ምንጅዳ ግሾ እዮ አጋግተ። 8 ማንቆት ኡባ ዎደ ህንተራ ዳና፥ ሽን ታኒ ኡባ ዎደ ህንተራ ደእከ" ያግስ።✝

9 ሄ ዎደ ዳሮ አሳይ የሱሲ ብታነን ደኤይሳ ስእድ ያ ብዶሶና። ኤንቲ የሱሳ ፃላላ ግዶናሽን፥ እ ሀይቆፐ ደንዳ አላዛራካ በአናዉ ብዶሶና። 10 ሄሳ ግሾ፥ ካህነ ሀላቃት አላዛራካ ቃስ ዎናዉ ማቀትዶሶና። 11 አይስ ጊኮ፥ አላዛራ ጋሶን ዳሮ አይሁደት ኤንታና እፅድ የሱሳ አማኖሶና።

12 ዎንተ ጋላስ ፓስካ ቦንችያ በሳ ይዳ ዳሮ አሳይ የሱሲ የሩሳላመ በይሳ ስእድ፥ 13 ዛምባ ሀይ ኤክድ እያ ሞካናዉ ከይዶሶና። ባንታ ቃላ ቁ ኦድ፥

"ሆሳና! ፆሳይ ጋላተቶ!

ጎዳ ሱንን የይስ አንጀቶ!

ፆሳይ እስራኤለ ካዋ አንጆ!"

ያግዶሶና።✝

14,15 ጌሻ ማፃፋን፥

"ፅዮነ ካታማዉ፥ ባቦፋ!

ሄኮ፥ ነ ካዎይ ሀረ ማራ ቦላ ኡትድ ዬስ"

ጌተትዳያዳ የሱሲ ሀረ ማር ደምድ እያ ቶግስ።✝

16 የሱሳ ታማረት ሄሳ ካሰ አኬክቦኮና። ሽን የሱሲ ቦንቸትዳፐ ጉየ ኤንቲ ሄሳ ኡባ አኬክዶሶና። ሄስ ኡባይ ጌሻ ማፃፋይ ግዳይሳዳ ሀንስ።

17 የሱሲ አላዛራ ዱፎፐ ፄግድ፥ ሀይቆፐ ደንዳ ዎደ እያራ ደእያ ዳሮ አሳይ የሱሳባ ማርካትዶሶና። 18 ዳሮ አሳይ እያ ሞካናዉ ከይዳይ፥ እ ሄ ማላታታ ኦዳይሳ ስእዳ ግሾሳ። 19 ሄሳ ግሾ፥ ፋርሳወት እሶይ እሱዋኮ፥ "ኑ አይኮካ ኦናዉ ዳንዳኦናይሳ በእተ፤ ደረ ኡባይ እያ ካሌስ" ያግዶሶና።

20 ፓስካ ቦንችያ ጋላስ ጎይናናዉ የሩሳላመ ብዳይሳታ ግዶን እስ እስ ግርከ አሳት ደኦሶና። 21 ኤንቲ ጋልላ ቢታን ቤተሳይዳ ካታማፐ ይዳ ፍልጶሳኮ ብድ፥ "ጎዳዉ፥ ኑኒ የሱሳ በአናዉ ኮዮስ" ያግድ ዎስዶሶና። 22 ፍልጶስ ብድ እንድርያሳስ ኦድን ናምአይ ብድ፥ የሱሳስ ኦድዶሶና።

23 የሱሲ ኤንታኮ፥ "አሳ ናአይ፥ ቦንቸትያ ዎደይ ጋክስ። 24 ታኒ ህንተዉ ቱማ ኦዳይስ፤ እስ ግስተ አይፈይ ቢታን ዎድ ዎቆና እፅኮ ባርካ አቴስ። ሽን ሄ ግስተ አይፈይ ዎቅኮ ዳሮ አይፈ አይፌስ። 25 ባ ሸምፑዋ ዶስያ ኦንካ ይሴስ፤ ባ ሸምፑዋ ሀ አላምያን እፅያ ኦንካ መርና ደኦስ አሼስ።✝ 26 ታኒ ደእያሱዋን ታራ ዳና መላ ታዉ ኦናዉ ኮይያ ኦንካ ታና ካላናዉ በሴስ። ታዉ ኦያ ኦናካ ታ አዋይ ቦንቻና።

27 "ሀእ ታ ሸምፖይ ዳሮ ኡንኤትስ፤ ያትን ዎይጎ? ‘ታ አዋዉ፥ ታና ሀ ሳተፐ አሻርክ’ ያጎ? አካይ፥ ታኒ ይዳይ ዋየ ኤካናሳ። 28 ታ አዋዉ፥ ነ ሱን ቦንቻ" ያግስ።

ሄ ዎደ ሳሎፐ፥ "ታኒ ታ ሱን ቦንቻስ፤ ዛራዳካ ቦንቻና" ግያ ቃላይ ይስ።

29 ሄ በሳን ኤቅዳ ዳሮ አሳይ ሄ ቃላ ስእድ፥ "ሄስ ዳዳ" ያግዶሶና።

ሀራት ቃስ፥ "ኪታንቾይ እያዉ ኦድስ" ያግዶሶና።

30 የሱሲ ዛሪድ ኤንታኮ፥ "ሀ ቃላይ ህንተ ግሾ ይስፐ አትሽን፥ ታ ግሾ ግደና። 31 ሀ አላመይ ፕርደትያ ዎደይ ሀእ፤ ሀ አላምያ ሃረይስ ሀእ ካረ ሆለታና። 32 ቃስ ታኒ ሳአፐ ቁ ኦሰትዳ ዎደ አሳ ኡባ ታኮ ኤሀና" ያግስ። 33 እ ሄሳ ግዳይ አይ መላ ሀይቆ ሀይቃነኮ ኤንታዉ ቆንጭሳናሳ።

34 ዳሮ አሳይ ዛሪድ፥ "ኑ ህገይ ክርስቶስ መርናዉ ደኤይሳ ኦዴስ። ያትን፥ ኔኒ ዎይጋዳ፥ ‘አሳ ናአይ ቁ ጋናዉ በሴስ’ ጋይ? ‘እ፥ አሳ ናአይ ኦኔ?’ " ያግዶሶና።✝

35 የሱሲ፥ "ፖኦይ ህንተራ ጉ ዎደ ጋምአና። ህንተዉ ሞና መላ ፖኦይ ደእሽን፥ ፖኡዋን ሄመትተ። ማን ሄመትያ አስ አዉ ብያኮ ኤረና። 36 ፖኦ ናይታ ግዳና መላ ፖኦይ ደእሽን ፖኡዋ አማንተ" ያግስ።

የሱሲ ሄሳ ኦደትዳፐ ጉየ ብድ ኤንታፈ ጌምስ። 37 እ ሄሳ መላ ማላታታ ኤንታ ስንን ኦንካ አማንቦኮና። 38 ናብያ እሳያስ፥

"ጎዳዉ፥ ኑ ማርካተ ኦን አማንዴ?✝

ጎዳይ ባ ዎልቃ ኦደስ ቆንጭስዴ?"

ግዳይስ ቱማ ግዳና መላ ኤንቲ እያ አማንቦኮና።

39,40 ቃስካ እሳያስ፥

"ኤንታ አይፈይ ፄሎና መላ፥

ኤንታ ዎዛናይ አኬኮና መላ፥

ኤንቲ ፆሳኮ ስምን፥ እ ኤንታ ፓና መላ፥

ፆሳይ ኤንታ አይፍያ ቆቅስስ።

ኤንታ ዎዛና ምንስ"

ግዳ ግሾ ኤንቲ አማናናዉ ዳንዳእቦኮና።✝

41 እሳያስ ሄሳ ግዳይ፥ የሱሳ ቦንቹዋ በእዳ ግሾነ እያባ ኦድዳ ግሾሳ።

42 ግድኮካ፥ አይሁደታ ሀላቃታፐካ ዳሮት የሱሳ አማንዶሶና። ሽን ፋርሳወት ባንታና አይሁደታ ዎሳ ኬፈ ከሶሶና ግድ ያይዳ ግሾ አማንዳ ግድ ቆንጨን ማርካትቦኮና። 43 ሄሳ ኤንቲ ኦዳይ፥ ፆሳን ኤረታናይሳፈ አድ አሳን ኤረታናይሳ ዶስዳ ግሾሳ።

44 የሱሲ ባ ቃላ ቁ ኦድ፥ "ታና አማንያ ኦንካ ታና ኪትዳይሳካ አማኔስፐ አትሽን፥ ታ ፃላላ አማነና። 45 ታና በእያ ኦንካ ታና ኪትዳይሳካ በኤስ። 46 ታና አማንያ ኡባይ ማን ዶና መላ ታኒ ፖኦ ግዳዳ አላምያ ያስ። 47 ታ ቃላ ስእድ ኪተቶና ኦናካ ታኒ ፕርድከ። አይስ ጊኮ፥ ታኒ አላምያ አሻናዉ ያስፐ አትሽን፥ ፕርዳናዉ ያቢከ። 48 ታና እፀይሳነ ታ ቃላ ኤኮና ኦናካ ፕርደይስ ደኤስ። ታኒ ኦድዳ ቃላይ ዉርሰ ጋላስ ሄ ኡራ ፕርዳና። 49 አይስ ጊኮ፥ ታኒ ሄሳ ታፐ ኦድከ፥ ሽን ታና ኪትዳ ታ አዋይ ታኒ ጋናይሳነ ኦዳናይሳ ኪትስ። 50 ቃስ እያ ኪታይ መርና ደኦ ግደይሳ ታኒ ኤራይስ። ሄሳ ግሾ፥ ታኒ ኦደይስ ታ አዋይ ታና ኦዳ ግዳይሳ" ያግስ።