ኤርምያሳ ማፃፋ 5

ሱረ አስ ባዋ

1 "አነ የሩሳላመ ኦግያ ቦላ ከይተ፤ ፑደነ ዱገ ሄመትተ፤ እያ ዩሹዋ ፄልተነ አኬክተ፤ እያ ጉታራንካ ኮይተ። ፅሎ ፕርድያነ ቱማ ኮያ እስ አስ ህንተ ደምኮ፥ ታ የሩሳላመ ማራና። 2 ኤንቲ፥ ‘ደኦ ጎዳይ ኤርያ መላ’ ግድ ጫቅኮካ፥ ዎርዶ ጫቆሶና" ያጌስ ጎዳይ።

3 አቤት ጎዳዉ፥ ነ አይፈት ቱማ ፄሎኮናዬ? ነ ኤንታ ሾጫዳሳ ሽን ኤንታ ሳክቤና። ነ ኤንታ መንረዳሳ ሽን ኤንቲ ስሞና እፅዶሶና። ኤንቲ ባንታ ሶምኡዋ ዛላፈ አድ ምንድ ባንታ ናጋራፐ ስሞና እፅዶሶና።

4 ሄሳፈ ጉየ፥ ታኒ፥ "ሀይሳቲ ጎዳ ኦግያነ ባንታ ፆሳ ህግያ ኤሮና ግሾ፥ ማንቆነ ኤያ" ያጋዳ ቆፓስ። 5 ህዛ፥ ታ ግታ አሳታኮ ባዳ ኤንታዉ ኦዳና። ጎዳ ኦግያነ ባንታ ፆሳ ህግያ ኤሮሶና። ሽን ኤንቲ ኡባይ እያ ቃምባራ መንዶሶና፤ እያ ቃሹዋካ ዱዶሶና። 6 ኤንታ ማካላይነ ኤንታ ኩንደይ ዳሮ ግድያ ግሾ፥ ጋሞይ ዎራፐ ከይድ፥ ኤንታ ዎና። ሱመይ ባዞፈ ከይድ፥ ኤንታ ማና። ማሄይ ኤንታ ካታማታ ሆክድ ናጋና። ሄ ካታማታፐ ከይያ ኡባይ ፑዘታና።

7 "ታኒ ህንተ ናጋራ አይስ አቶ ጎ? ህንተ ናይት ታና አግድ፥ ዎርዶ ፆሳታን ጫቅዶሶና። ታኒ ኤንታ ሙዛዳ ካልሳስ፥ ሽን ኤንቲ ላይማትዶሶና፤ ኤንታ ኬን አቅዶሶና። 8 ኤንቲ ከትዳ ኮርማ ፓራዳ፥ ሀራ አሳ ማቾ ላገናዉ ስንገሶና። 9 ቱማ ታ ሀ ኦሶታ ግሾ፥ ኤንታ ሴራናዉ በስክና? ሀይሳ መላ ካዎተ ቦላ ታ ሃሉዋ ከይክና?" ያጌስ ጎዳይ።

10 "እ ዎይነ ጋድያ ግዶ ገልድ ኢስተ፥ ሽን ኩመ ይሶፍተ። ኤንቲ ጎዳባ ግዶና ግሾ እ ታሸታ ካርድ የግተ። 11 እስራኤለ አሳይነ ይሁዳ አሳይ ኩመ ካድዶሶና" ያጌስ ጎዳይ።

12 ኤንቲ ሀይሳዳ ግድ ጎዳ ቦላ ዎርዶ ኦደትዶሶና፦ "እ አይኮካ ኦና፤ ቆህያባይ አይብካ ኑ ቦላ ዬና። ሞርከ ማሻይ ዎይኮ ኮሽ ኑና ፖሎ ደመና። 13 ናበት ጫርኮ መላ፤ ኤንታን ፆሳ ቃላይ ባዋ። ሄሳ ግሾ፥ ኤንቲ ግያባ ኡባይ ኤንታ ጋኮ" ያጎሶና።

14 ሄሳ ግሾ፥ እስራኤለ አሳኮ፥ "ኤንቲ ሀ ቃላ ኦድዳ ግሾ ታኒ ታ ቃላ ነ ዶናን ታማ ኦና፤ ሀ አሳይ ም ግዳና፤ ታማይካ ኤንታ ማና" ያጌስ ጎዳይ፥ ኡባፈ ዎልቃማ ፆሳይ።

15 ጎዳይ እስራኤለ አሳኮ፥ "ህንተኖ፥ እስራኤለ አሳዉ፥ ታ ህንተ ቦላ ሃሆ ቢታፈ እስ ካዎተ ኤሀና። ኤንታ ቃላ ህንተ ኤሮና፥ ኤንታ ኦዳይ ህንተዉ ገሎና ዎልቃማነ በን ካዎተ። 16 ኤንታ ዶንገ ፓልኤ ሾሆይ ዶያ ዱፎ መላ፤ ኤንታ ኦላንቾት ዎልቃማ። 17 ኤንቲ ህንተ ካነ ህንተ ጎሻ አይፍያ ማና፤ ህንተ አደ ናይታነ ማጫ ናይታ ዎና፤ ህንተ ዶርሳነ መህያ ቦንቃና፤ ህንተ ዎይንያነ ባላሰ ም ይሳና። ህንተ አማነትያ፥ ግምበትዳ ካታማታ ባንታ ማሻን ኦልድ ይሳና" ያጌስ።

18 "ግዶሽን፥ ሄ ጋላሳታን ግድኮካ፥ ታኒ ታ አሳ ኩመ ይስከ" ያጌስ ጎዳይ 19 አሳይ ነና፥ " ‘ጎዳይ ኑ ፆሳይ ኑ ቦላ ሀይሳ ኡባ አይስ ኦዴ?’ ግድ ኦይችኮ፥ ነ ኤንታኮ፥ ‘ህንተ ታና አግድ፥ ህንተ ቢታን እማ ፆሳታ ጎይንዳይሳዳ፥ ህንተካ አሳ ቢታን ሀራታስ ሀጋዛና’ ያጋ" ያግስ።

20 "ሀይሳ ያይቆባ አሳስ ኦዳ፤ ይሁዳ ቢታን አዋጃ። 21 ህንተኖ፥ አይፈይ ደእሽን በኦናይሳቶ፥ ሀይ ደእሽን ስኦናይሳቶ፥ ኤያነ አኬኮና አሳዉ ሀይሳ ስእተ! 22 ህንተ ታዉ ያያናዉ በሰኔ? ህንተ ታ ስንን ኮኮራናዉ ኮሸኔ? ያጌስ ጎዳይ። አባይ አድ ቦና መላ ሻፈ እያዉ ዛዋ ኦዳይ ታና? ዙለይ ሱግኮካ እያፐ አናዉ ዳንዳኤና፤ ሆበይ ደንድኮካ ካንድ አና። 23 ሽን ሀ አሳስ ሙመነ ማካላ ዎዛን ደኤስ። ኤንቲ ሀራ ሶ ስሚድ ዎራ ብዶሶና። 24 ኤንቲ ባንታ ዎዛናን፥ ‘ኑስ ስላ እራነ ቶርቸ እራ ዎደን ዎደን እምያ፥ ካ ሺሽያ ዎደ ኑስ እምያ ጎዳ አነ ያዮስ’ ያግቦኮና። 25 ህንተ ባላይ ሄሳ ተቅስ፤ ህንተ ናጋራይ ህንተና ሎኦባፐ አሽስ" ያጌስ።

26 "ታ አሳ ግዶን ኢታ አሳት ደኦሶና። ካፎ ኦይካናዉ ናግያ አሳዳ ሆክድ ናጎሶና። ኤንቲ ግተ የግድ አሳ ኦይኮሶና። 27 ካፎ ኬን ካፎይ ኩምዳዳ፥ ኤንታ ኬይ ጭሞን ኩምስ፤ ኤንቲ ዎልቃማነ ዱረ። 28 ኤንቲ ኦርደነ ሞ ግድዶሶና፤ ኤንታ ኢታ ኦሱዋስ ዛው ባዋ። ኤንቲ ይኦ ናይታ ግሾ ሞተቶኮና፤ ማንቆታስ ሱረ ፕርድቦኮና። 29 ያትን፥ ታኒ ሄሳ ግሾ ኤንታ ሴራናዉ በሰኔ? ሀይሳ መላ ካዎተ ቦላ ታ ሃሉዋ ከያናዉ በሰኔ?" ያጌስ ጎዳይ።

30 "ዳሮ ኢታባይነ ዳጋንያባይ ቢታ ቦላ ሀንስ። 31 ናበት ዎርዶ ኦዶሶና፤ ካህነት ኤንታ ዞርያን አይሶሶና። ታ አሳይካ ሄሳ መላባ ዶሴስ። ሽን ዉርሰን ህንተ ዋናኔ?" ያጌስ ጎዳይ።