ኤርምያሳ ማፃፋ 20

ኤርምያሳነ ጳስኮራ

1 ሄ ዎደ ጎዳ ኬነ ሀላቃ ግድያ፥ እመራ ናኣ ካህንያ ጳስኮር ኤርምያስ ትንብተ ኦድሽን ስእስ። 2 ጳስኮር ናብያ ኤርምያሳ ደሽስድ፥ ቆሞ ብንያመ ፐንግያን ፆሳ ኬ ገልያ ፐንገን ጎንገ ሉሆን ቃሽስስ። 3 ዎንተ ጋላስ ጳስኮር ኤርምያሳ ቃሾፐ ብርሽን፥ ኤርምያስ እያዉ ሀይሳዳ ያግስ፦ "ሀችፈ ዶምን፥ ጎዳይ ነ ሱን ጳስኮር ያገና፤ እ ነ ሱን ‘ያን ሀን ዳጋማ’ ያጋና። 4 ጎዳይ ሀይሳዳ ያጌስ፦ ‘ታኒ ነና፥ ነዉነ ነ ላገታ ኡባስ ዳጋማ ኦና። ኤንቲ ኔኒ ፄልሽን፥ ባንታ ሞርከታ ማሻን ዉራና። ታኒ ይሁዳ አሳ ኡባ ባብሎነ ካዋ ኩሸን አዳ እማና። እ ኤንታ ድእድ፥ ባብሎነ ኤፍድ፥ ያን ማሻን ዎና። 5 ሄሳዳካ፥ ሀ ካታማ ሻሉዋነ ዱረተ ኡባ፥ ኦይክ የዳባ ኡባ፥ ሃርዳባ ኡባነ ይሁዳ ካዎታ ሚሽያ ኡባ ታኒ ኤንታ ሞርከታስ አዳ እማና፤ ኤንቲ ኤንታ ቦንቅድ ባብሎነ ኤፋና። 6 ቃስ ኔኒ ጳስኮር፥ ነ ሶን ደእያ አሳ ኡባይ ድኤትድ፥ ባብሎነ ባና። ኔኒ ዎርዶ ትንብተ ኦድዳ ነ ላገታ ኡባራካ ያን ሀይቃናነ ያን ሞገታና’ ያጌስ" ያግስ።

ኤርምያሳ ሞቱዋ

7 አቤት ጎዳዉ፥ ኔኒ ታና ጭማዳሳ፤ ታንካ ጭመታስ። ኔኒ ታፐ ምናዳ፥ ታና ፆናዳሳ። ጋላሳ ኩመ ታኒ አሳ ሚቻስ አታስ፤ ኡባይ ታና ቀልቅስስ። 8 ታኒ ሃሳያ ዎደ ኡባን፥ "ማካላባይነ ዮይ ጋክስ" ጋዳ ዋሳይስ። ጎዳ ቃላይ ታዉ ጋላስ ጋላስ ቦረነ ቀልቅሰ ኤህስ። 9 ታኒ፥ "ታኒ ጎዳባ ደንዳ ኦድከ" ዎይኮ፥ "እያ ሱንን ናምአን ኦድከ" ጊኮ፥ ጎዳ ቃላይ ታ መቀ ግዶን ቁምኤትድ፥ ኤፅያ ታማ መላ ግድድ፥ ታ ዎዛናን ምቼስ። ታኒ ግዶን ኦይካዳ አሾና ጋዳ ዳቡራስ፤ ሽን ተቃናዉ ዳንዳአብከ። 10 ታኒ ዳሮ ካልካሻ ስአስ፤ "ያን ሀን ዳጋም ደኤስ! አነ እያ ሞትተ! ኑኒካ እያ ሞቶስ" ያጎሶና። ታዉ ማታ ላገት ኡባይ ታ ኩንደ ናግድ፥ "ኦን ኤር፥ ኑኒ እያ ኦይካና መላነ ኑ ሃሉዋ ከያና መላ፥ እ ጭማናዉ ዳንዳኤስ" ያጎሶና።

11 ሽን ጎዳይ ያሽስያ ቶራ ቃራዳን ታራ ደኤስ። ሄሳ ግሾ፥ ታና የደይሳት በታና፤ ኤንቲ ታና ፆኖኮና። ኤንታዉ ጊጎና ግሾ፥ ኤንቲ ግታ ዬላ ዬላታና። ኤንታ ካዉሻይ ኩም ዶገተና። 12 አቤት ኡባፈ ዎልቃማ ጎዳዉ፥ ፅሎታ ፓጨይሶ፥ ዎዛናነ ካሀ በኤይሶ፥ ኔኒ ታ ሞርከታ ቦላ ነ ሃሉዋ ከያዳ ታና በሳ። አይስ ጊኮ፥ ታኒ ታ ሞቱዋ ነዉ አስ።

13 ጎዳስ የፅተ! ጎዳ ጋላትተ! አይስ ጊኮ፥ እ ማንቆታ ኢታታ ኩሸፐ አሼስ።

14 ታኒ የለትዳ ጋላሳይ ባደትዳይሳ ግዶ! ታ አይያ ታና የልዳ ጋላሳይ አንጀቶፎ! 15 ታ አዋስ፥ "ነዉ ምሽራቾ፤ ነዉ አደ ናእ የለትስ!" ያግ ኦድድ፥ ዳሮ ኡፋይስዳ ኡራይካ ባደትዳባ ግዶ! 16 ሄ አደይ ጎዳይ ቃቶና አድ የግድ ይስዳ ካታማታዳ ሀኖ። ሄ አደይ ዎንታ ዋሱዋ፥ ጋላስ ሴታን፥ "ኦላይ ጋክስ!" ግያ ኦዳ ስኦ። 17 አይስ ጊኮ፥ ታ አይያ ታዉ ዱፎ ግዳና መላነ እ ኡሎይካ ታና መርናዉ ኦይክ ኡታና መላ፥ ታና ኡሎን ዎቤና። 18 ታኒ መቶነ አዛኖ በአናዉነ ላይ ኡባ ዬላታሸ ዉርሳናዉ፥ አይስ ታ አየ ኡሎፐ ከያድና?