ኤርምያሳ ማፃፋ 37

ኤርምያስ ቃሾ ኬን

1 ባብሎነ ካዎይ ናቡካዳናፆር እዮአቄማ ናኣ እኮንያና በሳን እዮስያሳ ናኣ ሰደቅያሳ ይሁዳ ቢታን ካዎስ። 2 ሰደቅያስ፥ እያራ ኦያ ሀላቃትነ ቢታን ደእያ አሳ ኡባይ፥ ጎዳይ ናብያ ኤርምያሳ ባጋራ ኦድዳ ቃላስ ኪተትቦኮና። 3 ሽን ካዎይ ሰደቅያስ ሰለማ ናኣ ዮካላነ ማእሰያ ናኣ ካህንያ ሶፎንያሳ፥ "ሀያና፥ ኑ ግሾ ጎዳ ኑ ፆሳ ዎሳ" ያግድ ኤርምያሳኮ ኪትስ።

4 ሄ ዎደ ኤርምያስ ቃሾ ኬ ገልቦና ግሾ፥ አሳ ግዶን ስመረቴስ። 5 ግብፀ ካዋ ኦላንቾት፥ ግብፀፈ ከይዳይሳ የሩሳላመ ተቅዳ ባብሎነ ኦላንቾት ስእዳ ዎደ የሩሳላመ የድድ ከይዶሶና።

6 ሄሳፈ ጉየ፥ ጎዳ ቃላይ ናብያ ኤርምያሳኮ ይስ። 7 "ጎዳይ እስራኤለ ፆሳይ ሀይሳዳ ያጌስ፦ ታና ኦይቻና መላ ህንተና ታኮ ኪትዳ ይሁዳ ካዋስ ሀይሳዳ ያግተ፤ ‘ህንተና ማዳናዉ ይዳ ግብፀ ካዋ ኦላንቾት ባንታ ቢታ ስሚድ ባና። 8 ቃስ ባብሎነ ኦላንቾት ስሚድ ያና፤ ሀ ካታማ ኦልድ ኦይካና፤ ታማን እያ ፁጋና’ ያግተ።

9 "ባብሎነ ኦላንቾት ስሚድ ዩሳይ አቶና ግሾ ‘ባብሎነ ኦላንቾት ዮኮና’ ግድ ህንተና ህንተዉ ጭሞፍተ። 10 ህንተ ባብሎነ ኦላንቾታ ኩመ ፆንያኮካ፥ ማዱንፅድ፥ ዱንካነን ዝንእዳይሳት ደንድድ፥ ሀ ካታማ ታማን ፁጋና" ያጌስ ጎዳይ።

11 ግብፀ ካዋ ኦላንቾት ማትዳ ግሾ፥ ባብሎነ ኦላንቾት የሩሳላመ አግድ ባንታ ደእያ በሳ ጉየ ስምዶሶና። 12 ሄ ዎደ ኤርምያስ ባ ግሾ ቢታ ኤካናዉ ብንያመ ቢታ ባናዉ የሩሳላመፐ ደንድስ። 13 ግዶሽን፥ እ ብድ፥ ብንያመ ፐንገ ጋክያ ዎደ ፐንግያ ናገይሳታፐ እሶይ፥ ሀናንያ ናአይ፥ ሳሌማ ናአ ዬራ፥ "ነ ኑና ካዳዳ ባብሎነ ባሳ ግድኪ?" ያግድ ኦይክስ።

14 ኤርምያስ ዛሪድ፥ "ነ ገይሳ መላ ታ ባብሎነ ብያ አስ ግድከ" ያግስ። ሽን ዬረይ እ ገይሳ ስኦና እፅድ ኤርምያሳ ኦይክድ ሀላቃታኮ ኤፍስ። 15 ሀላቃት ዳሮ ሀንቀትድ፥ ኤርምያሳ ዋ፥ ኤንቲ ቃሾ ኬ ኦዳ፥ ፃፍያ ዮናታና ኬን እያ ቃችዶሶና። 16 ኤርምያስ ያን ቢታ ጋርሳን ደእያ ክፍልያን ዳሮ ዎደ ጋምእስ።

17 ሄሳፈ ጉየ፥ ካዎይ ሰደቅያስ አሰ ኪትድ፥ ኤርምያሳ ባ ካዎ ጋ ፄግስድ፥ ዱማ ቆሳን እያ፥ "ጎዳይ ነዉ ኦድዳባይ ደኢ?" ያግድ ኦይችስ።

ኤርምያስ ዛሪድ፥ "ኤ ደኤስ፤ ኔኒ ባብሎነ ካዋ ኩሸን አዳ እመታና" ያግስ 18 ቃስካ ኤርምያስ ካዋ ሰደቅያሳ ሀይሳዳ ያግድ ኦይችስ፦ "ታና ህንተ ቃሾ ኬን የጋናዉ ታ ነ ቦላ፥ ነዉ ኦያ ሀላቃታ ቦላ ዎይኮ ሀ አሳ ቦላ አይ ባላ ኦድና? 19 ያትን፥ ‘ባብሎነ ካዎይ ይድ ህንተናነ ህንተ ቢታ ኦለና’ ያግድ ነዉ ትንብተ ኦድዳ ነ ናበት ሀእ አዉን ደኦና? 20 ታ ጎዳዉ፥ ካዋዉ፥ ስአ፤ ታ ኦይችያ እስባ ነ ፖላና መላ ነና ዎሳይስ። ታ ሄ በሳን ሀይቆና መላ እያ ኬይ ቃሾ ኬ ግድዳ ፃፍያ ዮናታና ሶ ታና ጉየ ዛሮፓ" ያግስ።

21 ካዎይ ሰደቅያስ ናገይሳታ ዳባባን ኤርምያሳ ዳና መላ ኪትስ። ያን እ ደእሽን ካታማፐ ዳቦይ ያና ጋካናዉ ጋላስ ጋላስ እስ እስ ዳቦ ኡክያ በሳፈ ኤህድ እያዉ እሞሶና። ሄሳ ግሾ፥ ኤርምያሳ ካዋ ዛባን ጋምእስ።