ኤርምያሳ ማፃፋ 22

ኢታ ካዎታ ቦላ ፆሳ ፕርዳ

1 ጎዳይ ሀይሳዳ ያጌስ፤ "ዱገ ይሁዳ ካዋ ጋ ባዳ፥ ያን ሀ ቃላ ኦዳ። 2 ‘ነኖ ይሁዳ ካዋዉ፥ ዳዊታ አራታን ኡትዳይሶ፥ ኔኒ፥ ነ ሞርናትነ ሀ ፐንግያራ ገልያ ነ አሳይ ጎዳ ቃላ ስእተ! 3 ሱረ ፕርዳ ፕርድተ፤ ፅሎ ኦተ። ቦንቀትዳይሳ ኡንኤያ አሳ ኩሸፐ አሽተ። በተ አሳስ፥ ይኦታስነ አምኤታስ ገነ ኦፕተ ዎይኮ ሱጎፕተ። ፅሎ አሳ ሱ ሀ በሳን ጉሶፍተ። 4 ሀ ኪታታ ህንተ ናግኮ፥ ዳዊታ አራታን ኡትያ ካዎት ፓራነ ፓራ ጋረ ቶግድ፥ ባንታ ሞርናታራነ ባንታ አሳራ ሀ ካዎ ጋ ፐንግያራ ገላና። 5 ሽን ህንተ ኪተቶና እፅኮ፥ ሀ ካዎ ጋይ ባይሳ ግዳና ያጋዳ ታ ጎዳይ ታ ሁጰን ጫቃስ’ " ያጌስ ጎዳይ።

6 ጎዳይ ይሁዳ ካዎ ጋዋባ ሀይሳዳ ያጌስ፦ "ኔኒ ታዉ ጋላዳ ቢታነ ልባኖሰ ዙማ መላ ግድኮካ፥ ታ ነና መላ ቢታነ አስ ዶና ካታማ ኦና። 7 ታኒ ነና ላልያ አሳ ኦላ ሚሸ ኦይዳ ኪታና፤ ኤንቲ ነ ዝጋ ቱቀታ ቃንፀረድ፥ ታማን የጋና።

8 "ዱማ ዱማ ካዎተታፐ አሳይ ሄ ካታማ ማታራ አሸ፥ ‘ጎዳይ አይስ ሀ ግታ ካታማ ሀይሳዳ ኦዴ?’ ያግድ እሶይ እሱዋ ኦይቻና። 9 ኤንቲ ዛሪድ፥ ‘ጎዳ ባንታ ፆሳራ ጫቅዳ ጫቁዋ መንድ፥ ሀራ ፆሳታ ጎይንዳ ግሾነ ኦዳ ግሾሳ’ " ያጋና።

10 ሀይቅዳ ካዋ እዮስያሳስ ዬኮፍተ ዎይኮ ካዮቶፍተ። ሄሳ አግድ፥ ድኤትድ ብዳ ሳሎማስ*22:10 ሳሎማስ ሀራ ሱንይ እዮአካዛ። እዮአካዝ ካዎተ ሱን ግድሽን፥ ሳሎም ሶ ሱን ዎይኮ ቡዞ ሱን።ሴለትድ ዬክተ። እ ጉየ ስመና፤ ባ የለትዳ ቢታ ዛሪድ በኤና።

11 ባ አዋ በሳን ይሁዳን ካዎትድ ደእሸ፥ ሀ በሳፈ ብዳ እዮስያሳ ናአ ሳሎማባ ጎዳይ ሀይሳዳ ያጌስ። "እ ጉየ ስመና። 12 እ ድኤትድ ብዳ ቢታን ሀይቃና፤ ስሚድ ሀ ቢታ በኤና" ያጌስ ጎዳይ።

13 ባ ኬ ገነን ኬፀይሳ፥ ጌላ ኦገን ፖቀ ቦላ ፖቀ ጉጀይሳ፥ ባ አሳስ አይኮካ እሞናነ ጋቴ ቃንፆና ኦስሰይሳ አየ! 14 ሄ ኡራይ፥ "ታኒ ታዉ ግታ ፖቀይ ደእያ ዳልጋ ኬ ኬፃና" ያግድ፥ ባ ኬስ ዳልጋ ማስኮተታ ከስድ፥ ዝጋ ምን አሌቅስድ፥ ዞኦ ቃላመ ትዬስ።

15 ነ ዳሮ ዝጋን ኬፅዳይስ ነና ሎኦ ካዎ ከሴስ ጋዳ ቆፓይ? ነ አዋ እዮስያሳስ ምያባይነ ኡያባይ ይዴ? እ ሱረ ፕርዳ ፕርድስ፤ ፅሎ ኦስ። ሄሳ ግሾ፥ እያዉ ኡባባይ እንጀትስ። 16 እ ማንቆታስነ መቶታንቾታስ ሱረ ፕርድያ ግሾ፥ ኡባባይ እያዉ እንጀትስ። ጎዳ ኤሬስ ጉሳይ ሀይሳ። 17 ሽን ነ አይፈይነ ነ ዎዛናይ ሸምፕዳይ፥ ጭሞን ጎአ ደሞ፥ ፅሎ ሱ ጉሶ፥ ገነነ ኡንኤ ቦላና።

18 ሄሳ ግሾ፥ ጎዳይ እዮስያሳ ናኣ፥ ይሁዳ ካዋ እዮአቄማባ ሀይሳዳ ያጌስ፦ "እ ሀይቅያ ዎደ ኤንቲ እያዉ፥ ‘ዎ፥ ታ እሻዉ፥ ዎ ታ እሻዉ’ ያግድ ዬኮኮና። ቃስ፥ ‘ዎ፥ ታ ጎዳዉ፥ ዎ፥ ታ ካዋዉ’ ያግድ ዘሌሎኮና። 19 እያ ሞጎይካ ሀረ ሞጎ መላ ግዳና። እያ አሀይ ጎሸትድ፥ የሩሳላመ ፐንገታፐ ያ ባጋን የገታና" ያጌስ ጎዳይ።

20 ጎዳይ የሩሳላመባ ሀይሳዳ ያጌስ፦ "ኦላስ ኔራ ዙፐተይሳት ኡባይ ፆነትዳ ግሾ፥ ፑደ ልባኖሰ ባዳ፥ ያን ዋሳ። ባሳነ ቢታን ዋሶ ሱልሳ፤ አባሪማ ዙማን ዋሳ። 21 ነ ሳሮ ደእያ ዎደ ታ ነዉ ኦዳስ፤ ሽን ነ ታና ስኦና እፃዳሳ። ነ ናአተፈ ዶምን ነ ሀኖይ ሀይሳ፤ ነ ታዉ ኪተቶና እፃዳሳ። 22 ነ ሄንንቾታ ኡባ ጫርኮይ ኤፋና፤ ኦላስ ኔራ ዙፐተይሳት ድኤትድ ባና። ሄ ዎደ ነ ኢታተ ኡባ ግሾ ዬላታናነ ካዉያና። 23 ህንተኖ፥ ልባኖሰ ዝጋን ኬፀትዳ ኬን ደኤይሳቶ፥ እቀ ኦይክዳ ማጫሳዳ ኡንእ ህንተ ቦላ ፑቱ ጊኮ ህንተ ዋናኔ?" ያጌስ።

24 ጎዳይ ሀይሳዳ ያጌስ፦ "ታ ደኦይ ኤሮ! ኔኒ እዮአቄማ ናአይ፥ ይሁዳ ካዎይ ዮአክን፥ ታ ኡሻቻ ኩሸን ደእያ ታ ማታሜ ዎያ ምግዶ ግድያኮካ ታ ነና ከሳ የጋና። 25 ነና ዎናዉ ኮየይሳታስ፥ ነ ያይያ ባብሎነ ካዋ ናቡካዳናፆራስነ እያ ኦላንቾታስ ታ ነና አዳ እማና። 26 ታ ነናነ ነ አይዉ ህንተ የለቶና ሀራ ቢታ ሆላና፤ ህንተ ናምአይካ ያን ሀይቃና። 27 ህንተ ስማናዉ ላሞትያ ቢታ ፖሎ ስመከታ" ያጌስ።

28 ሀ አደይ ዮአክን፥ ካትዳነ መቅዳ ፁጌ? እ፥ ኦንካ ኮዮና ሚሼ? እነ እያ ናይት አይስ ጎደትድ፥ ኤሮና ቢታን የገትድ አትዶና? 29 ቢተ፥ ቢተ፥ ቢተ፥ ጎዳ ቃላ ስአ! 30 "እያ ኮቻፈ እሱዋስካ እንጀቶና ግሾነ ዳዊታ አራታን ኡትያ ዎይኮ ይሁዳን ካዎትያ አስ እሶይካ ባይና ግሾ፥ ሀ አድያ፥ ናእ ባይና አስ፥ ባ ላይ ኡባን ደኦይ እንጀቶና አስ" ጋዳ ፃፋ ያጌስ ጎዳይ።