ኤርምያሳ ማፃፋ 52

የሩሳላመ ኩንደ

1 ሰደቅያስ ካዎትያ ዎደ፥ እያዉ ላይ ላታማነ እስኖ፤ እ የሩሳላመን ታማነ እስ ላይ ካዎትስ። እያ አየ ሱንይ አምፃሎ፤ እያ ልብና ካታማን ደእያ ኤርምያሳ ናአ። 2 እዮአቄም ኦዳይሳዳ ሰደቅያስ ጎዳ ስንን ኢታባ ኦስ። 3 ጎዳይ የሩሳላመ ቦላነ ይሁዳ ቦላ ሀንቀትዳ ግሾ ኤንታ ባ ስንፈ ድግስ።

ሰደቅያስ ባብሎነ ካዋ ቦላ ማካልስ። 4 ሰደቅያስ ካዎትዳ ኡዱፉን ላይን፥ ታማን አጌናን፥ ታማን ጋላሳን ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ። ኤንቲ እያ ዩሹዋን ቢታ ዶርዶሶና። 5 ሰደቅያስ ካዎትዳ ታማነ እስን ላይ ጋካናዉ፥ የሩሳላመይ ተቀትድ ጋምእስ።

6 ሄ ላይ ኦይዳን አጌናን፥ ኡዱፉን ጋላሳን፥ ኮሽ ሱልን፥ አሳይ ምያባ ይስ። 7 ካታማ ግምበይ እስ ባጋራ መቅስ። ባብሎነ አሳይ ካታማ ዩሹዋ ናግኮካ፥ ይሁዳ ካዋ ኦላንቾት ኡባይ ቃማ ካዎ አታክልተ በሳ ኤፍያ ኦግያ ኦይክድ፥ ናምኡ ድርሳ ግምበታ እስፈ ጋያ ፐንግያራ ከይድ ባቃትዶሶና። ኤንቲ ዮርዳኖሰ ዛንጋራኮ ስሚድ ብዶሶና። 8 ሽን ባብሎነ ኦላንቾት ካዋ ሰደቅያሳ የደድ፥ እያርኮ ደምባ ጋሸ ኦይክዶሶና። እያ ኦላንቾት ኡባይ እያ ካድድ ላለትዶሶና። 9 ሄሳፈ ጉየ፥ እያ ሀማታ ቢታን፥ እርብላ ካታማን ደእያ ባብሎነ ካዋኮ ኤፍዶሶና። ያን ናቡካዳናፆር ሰደቅያሳ ቦላ ፕርድስ። 10 ሰደቅያሳ አደ ናይታ ሰደቅያስ ፄልሽን፥ ባብሎነ ካዎይ ዎስ። ይሁዳ ሀላቃታ ኡባ ያን እርብላ ካታማን ዎዶሶና። 11 ሰደቅያሳ አይፈታ ዎጭድ፥ ሳንላታን ቃችድ፥ ባብሎነ ኤፍዶሶና። እ ሀይቃና ጋካናዉ፥ ያን ቃሾ ኬን እያ ዎዶሶና።

12 ናቡካዳናፆር ባብሎነን ካዎትዳ ታማነ ኡዱፉን ላይን፥ እቻሻን አጌናን፥ ታማን ጋላሳን፥ ካዋ ሞርናይ፥ ካዋ ናገይሳታ ሀላቃይ ናቡዛርዳን የሩሳላመ ገልስ። 13 ፆሳ ኬ፥ ካዎ ጋነ የሩሳላመን ደእያ ኬታ ኡባ ታማን ፁግስ፤ ቃስ ግታ ኬታ ኡባ ፁግስ። 14 ባብሎነ ኦላንቾት ኡባይ ካዋ ናገይሳታ ሀላቃ ኪታን፥ የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና። 15 ናቡዛርዳን ጉ ማንቆታ፥ ካታማን አትዳ አሳታ፥ ካድድ ባብሎነ ኦላንቾታን ገልዳ አሳታነ ኩሸ ሂላንቾታ ድእድ ባብሎነ ኤፍስ። 16 ሽን ናቡዛርዳን ማንቆታፐ ጉ አሳ ዎይነ ቶካናዳነ ጋደ ጎያናዳ ይሁዳን አግስ።

17 ባብሎነት ፆሳ ኬ ካረን ኤቅዳ ናሰ ብራታ ቱቀታ፥ ጫና ጋረታነ ግታ ከረታ መንረድ፥ ናሰ ብራታ ኡባ ባብሎነ ኤፍዶሶና። 18 ከረታ፥ አካፋታ፥ ፆምፐ ሻሉዋ ፄራ ፕትያባታ፥ ፃሮታ፥ እፃነ ሳነታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና። 19 ካዋ ናገይሳታ ሀላቃይ ናቡዛርዳን ዎርቃፈነ ብራፐ ኦሰትዳ ድስተታ፥ ታማ ኤክያ ሚሸታ፥ ፃሮታ፥ ላፋ ከረታ፥ ፆምፐ ዎያ ኮጫታ፥ እፃነ ሳነታነ ኡሻ ያርሾስ ጎኤትያ ኦቶታ ኤፍስ። 20 ካዎይ ሶሎሞነይ ፆሳ ኬን ኦሰትያባስ መዳ ናምኡ ቱሳት፥ ግታ ከረታ፥ ታማነ ናምኡ ኮርማታ ምስለትነ ጫና ጋረት መትዳ ናሰ ብራታት ምዛነን ልካናዉ ዳንዳኤተና። 21 ናምኡ ቱሳት እስ መላ ግድድ፥ እሶይ እሶይ ታማነ ሆስፑን ዋ አዱሰ። ኤንታ ኡባይ ታማነ ናምኡ ዋ። ኤንታዉ ግዶይ ካይስ ግድድ፥ ብራታይ ኦይዱ ብራ ኬና ኦርደ። 22 ናምኡ ቱሳታ ሁጵያን ናሰፐ ኦሰትዳ ጉምቦት ደኦሶና። እስ ጉምቡዋ ጌሳይ እቻሹ ዋ ግድድ፥ ዩሾይ ግተ ምስለንነ ኦሮማነ ምስለን አሌቀትድ ኡትስ። ናምአን ጉምቦይካ እያ መላ። 23 ጉምቦታስ ምየን ምየን ደእያ ኦሮማነታ ምስለት ኡዱፉን ታማነ ኡሱፑና፤ ዩሹዋን ደእያ ግተ ምስለታፐ ቦላ ባጋራ ደእያ ኦሮማነ ምስለት እስ ፄታ።

ይሁዳ አሳይ ባብሎነ ድኤትስ

24 ካዋ ናገይሳታ ሀላቃይ ናቡዛርዳን ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሄ አሳታ ኦይክስ። 25 ካታማን ደእያ አሳፐ ቶራ ሞጮና፥ ካዋ ዞረይሳታፐ ላፑን አሳታ ኤፍስ። ቶራ ሞጮና፥ ፃፍያ፥ አሳ ኦላንቾታ ዶርያ ሀላቃነ ሀራ ኡሱፑን ታሙ አሳታ ኤፍስ። 26 ናቡዛርዳን ኤንታ ኡባ ኤክድ፥ ባብሎነ ካዋኮ፥ እርብላ ካታማ ኤፍስ። 27 ሀማታ ቢታን፥ እርብላ ካታማን፥ ባብሎነ ካዎይ ኤንታ ኡባ ዎስስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።

28 ናቡካዳናፆር ካዎትዳ ላፑን ላይን፥ ሄ ሙኩሉነ ላታማነ ሄ አሳይ ይሁዳፐ ድኤትስ። 29 ታማነ ሆስፑን ላይን ሆስፑን ፄታነ ሀስታማነ ናምኡ አሳይ የሩሳላመፐ ድኤትስ። 30 ናቡካዳናፆር ካዎትዳ ላታማነ ሄን ላይን ካዋ ናገይሳታ ሀላቃይ ናቡዛርዳን ላፑን ፄታነ ኦይታማነ እቻሹ አሳ ድእስ። ድኤትዳ አሳ ታይቦይ ኦይዱ ሙኩሉነ ኡሱፑን ፄታ።

ዮአክና ብለተ

31 ዮአክን ድኤትዳ ሀስታማነ ላፑን ላይን፥ ታማነ ናምአን አጌናን፥ ላታማነ እቻሻን ጋላሳን፥ ዮር-ማሮዳክ ካዎትዳ ላይ ይሁዳ ካዋ ዮአክና ቦንችድ፥ ቃሾፐ ብርሽስ። 32 ዮር-ማሮዳክ ዮአክናራ ማልኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አድ እያ ቦንችስ። 33 ሄሳ ግሾ፥ ዮአክን ቃሾ ኬን ማእያ ማኡዋ ላምድ፥ ባ ደኦ ላይ ኡባን ካዎ ጋይታፐ ምሸ ደእስ። 34 ዮአክን ሀይቃና ጋካናዉ፥ ጋላስ ጋላስ እያዉ ኮሽያባ ኡባ ባብሎነ ካዎይ እሚስ።