ኤርምያሳ ማፃፋ 36

እዮአቄም ፃ ማፃፋ ፁግስ

1 እዮስያሳ ናአይ ይሁዳ ካዎይ እዮአቄም ካዎትዳ ኦይዳን ላይን፥ ጎዳይ ኤርምያሳኮ ሀይሳዳ ያግስ፦ 2 "እስ ፃ ማፃፋ ኤካዳ፥ እዮስያሳ ዎደ ታኒ ነዉ ኦዶ ዶምዳ ኮይሮ ጋላሳፐ ዶማዳ፥ ሀች ጋካናዉ እስራኤለ ቦላ፥ ይሁዳ ቦላነ ሀራ ካዎተታ ቦላ ታኒ ኦድዳ ቃላ ኡባ ፃፋ። 3 ታ ይሁዳ አሳ ቦላ ኤሀና ጋዳ ሀልችዳ ቦሻ ኡባ ስእድ፥ ኦን ኤር፥ ኤንቲ ባንታ ኢታ ኦሱዋፐ ስማና፤ ታ ኤንታ ናቁዋነ ኤንታ ናጋራ አቶ ጋና" ያግስ።

4 ሄሳ ግሾ፥ ኤርምያስ ኔራ ናኣ ባሮካ ፄግድ፥ ጎዳይ እያዉ ኦድዳባ ኡባ ባሮካስ ኦድን፥ እ ፃ ማፃፋን ፃፍስ። 5 ሄሳፈ ጉየ፥ ኤርምያስ ባሮካኮ፥ "ታኒ ቃሾ ኬን ደእያ ግሾ፥ ፆሳ ኬ ገላናዉ ዳንዳእከ። 6 ሄሳ ግሾ፥ ነ ፆማ ጋላስ ፆሳ ኬ ባዳ፥ ታ ኦድን፥ ነ ፃ ማፃፋን ፃፍዳ ጎዳ ቃላ ኤንታዉ ናባባ፤ ባንታ ካታማታፐ ይዳ ይሁዳ አሳ ኡባስ ናባባ። 7 ሀ አሳ ቦላ ጎዳይ አዋጅዳ ሀንቆይ ግታ ግድያ ግሾ፥ ኦን ኤር፥ ኤንቲ ባንታ ኢታ ኦሱዋፐ ስሚድ፥ ጎዳ ዎሳና" ያግስ። 8 ኔራ ናአይ ባሮክ ናበይ ኤርምያስ ኪትዳይሳዳ ፆሳ ኬን ጎዳ ቃላ ኡባ ናባብስ።

9 እዮስያሳ ናአይ ይሁዳ ካዎይ እዮአቄም ካዎትዳ እቻሻን ላይን፥ ኡዱፉን አጌናን፥ የሩሳላመን ደእያ አሳስነ ይሁዳ ካታማታፐ ይዳ አሳ ኡባይ ጎዳ ስንን ፆማና መላ አዋጅዶሶና። 10 ባሮክ ፆሳ ኬን፥ ቆሞ ባጋ ዳባባን፥ ኦራ ፐንገ ጌተትያ በሳን፥ ፃፍያ ሳፋና ናኣ፥ ጋማራ ክፍልያን ኤቅድ፥ ኤርምያሳ ቃላይ ፃፈትዳ ፃ ማፃፋ አሳ ኡባስ ናባብስ።

11 ሳፋና ናኣ ናአይ፥ ጋማራ ናአይ ምካይ ማፃፋፐ ጎዳ ቃላ ባሮክ ናባብሽን ስእዳ ዎደ፥ 12 ካዎ ጋን ፃፈይ ኡትያ ክፍልያ ብስ። እ ብያ ዎደ፥ ፃፈይ ኤልሻም፥ ሻማያ ናአይ ዳል፥ አክቦራ ናአይ ኤልናታን፥ ሳፋና ናአይ ጋማራ፥ ሀናንያ ናአይ ፅድቀነ ሀራ ሀላቃት ያን ኡትዶሶና። 13 ባሮክ አሳስ ማፃፋፐ ናባብሽን ስእዳ ቃላ ኡባ ምካይ ኤንታኮ ኦድስ። 14 ሀላቃት ናታና ናኣ ይሁዳ ባሮካኮ ኪትድ፥ "አሳስ ኔኒ ናባብዳ ማፃፋ ኤካዳ ሃ ያ" ያግዶሶና። (ናታን ሳላማ ናአ፤ ሳላም ኩሳ ናአ።) ባሮክ ማፃፋ ኤክድ፥ ኤንታኮ ይስ። 15 ኤንትካ እያ፥ "አነ ኡታዳ፥ ኑስ ማፃፋ ናባባ" ያግዶሶና።

ያግን ባሮክ ማፃፋ ናባብስ። 16 እ ናባብዳ ቃላ ኡባ ስእድ ያይዶሶና፥ እሶይ እሱዋ ፄልድ፥ ባሮካ፥ "ሀ ቃላ ኡባ ኑኒ ካዋስ ኦዳናዉ ኮሼስ" ያግዶሶና። 17 ቃስካ ዛሪድ፥ "ኔኒ ሀ ቃላ ኡባ ዋታዳ ፃፍዳኮ ኑስ ኦዳ። ሀይሳ ነዉ ኤርምያስ ኦድን ፃፋዲ?" ያግዶሶና።

18 ባሮክ፥ "ኤ፥ ሀ ቃላ ኡባ ኤርምያስ ባ ዶናፐ ታዉ ኦድስ፤ ታኒ ቃላመን ሀ ፃ ማፃፋን ፃፋስ" ያግስ።

19 ኤንቲ ባሮካ፥ "ኔንነ ኤርምያስ ብድ ቆሰትተ፤ ህንተ ደእያ በሳ ኦንካ ኤሮፖ" ያግዶሶና።

20 ሀላቃት ማፃፋ ፃፍያ ኤልሻማ ክፍለን ዎዳፐ ጉየ፥ ካዎይ ደእያ ዳባባ ብድ፥ ሀንዳባ ኡባ ካዋስ ኦድዶሶና። 21 ሄ ማፃፋ ኤሀና መላ፥ ካዎይ ይሁዳ ኪትስ፤ ፃ ማፃፋ ኤልሻማ ክፍለፐ ኤህድ፥ ካዋስነ እያ ዩሹዋን ኤቅዳ ሀላቃታስ ናባብስ። 22 ኡዱፉን አጌናን ሳእ ባልጎ ግድያ ግሾ፥ ካዎይ ባልጉዋ አያ ኬን ኡትስ። ሄ ዎደ ካዋ ስንን ደእያ ጮጭያን ታም ኤፄስ። 23 ይሁድ ሄ ዎይኮ ኦይዱ በሳታ ናባብዳፐ ጉየ፥ ካዎይ ሄ በሳታ ፃ ማፃፋፐ ማሻን ቃንፅ ቃንፅድ፥ ታማን የግስ፤ ሄሳዳ ኦድ፥ ማፃፋ ኩመ ፁግስ። 24 ሀ ቃላ ስእድ ካዎይነ እያራ ኦያ ሞርናት ኡባይ አይነ ባብቦኮና፤ ዎይኮ ካዮትድ፥ ባንታ ማኡዋ ፔቦኮና። 25 ሀር አቶሽን ኤልናታን፥ ዳላይነ ጋማር ካዎይ ሄ ማፃፋ ፁጎና መላ ዎስንካ፥ ኤንታ ዎሳ ስኦና እፅስ። 26 ካዋ ናአ ይራህማኤላ፥ አዝርኤላ ናኣ ሳራያነ አብድኤላ ናኣ ሰለማ፥ ፃፍያ ባሮካነ ናብያ ኤርምያሳ ኦይካና መላ ካዎይ ኪትስ። ሽን ጎዳይ ኤንታ ቆትስ።

ኤርምያስ ዛሪድ ፃፍዳ ፃ ማፃፋ

27 ኤርምያስ ኦድን፥ ባሮክ ፃፍዳ ማፃፋ ካዎይ ፁግድ ስምን፥ ጎዳ ቃላይ ኤርምያሳኮ ሀይሳዳ ያግሸ ይስ፦ 28 "ሀራ ፃ ማፃፋ ኤካዳ፥ ይሁዳ ካዎይ እዮአቄም ፁግዳ ፃ ማፃፋን ደእያ ቃላ ኡባ ዛራዳ ፃፋ። 29 ቃስ ይሁዳ ካዋ እዮአቄማ ሀይሳዳ ያጋ፦ ጎዳይ ሀይሳዳ ያጌስ፤ ኔኒ፥ ‘ባብሎነ ካዎይ ይድ፥ ሀ ቢታ ይሳና፤ ቃስ ያን ደእያ አሳነ መህያ ዉርሳና’ ጋዳ አይስ ፃፋዲ?" ያጋዳ ማፃፋ ፁጋዳሳ።

30 "ሄሳ ግሾ፥ ጎዳይ ይሁዳ ካዋ እዮአቄማ ሀይሳዳ ያጌስ፦ ዳዊታ አራታን ኡትያ ኮቻይ ነዉ ኩም ዴና። ነ አሀይ ጮ ሆለትድ፥ ጋላስ አዋ ሱሎስ፥ ቃማ ሜጎን ሾጨታና። 31 ህንተ ናጋራ ግሾ ነና፥ ነ፥ ኮቻነ ኔራ ኦያ ሞርናታ ኡባ ሴራና። ኤንቲ ታኒ ኦድዳባ ስኦና እፅዳ ግሾ፥ ታ ግዳ ኢታባ ኡባይ ህንተ ቦላ፥ ይሁዳንነ የሩሳላመን ደእያ አሳ ኡባ ቦላ ኤሀና" ያጌስ።

32 ሄሳፈ ጉየ፥ ኤርምያስ ሀራ ፃ ማፃፋ ኤክድ፥ ኔራ ናኣ ፃፍያ ባሮካስ እሚስ። ባሮክ ይሁዳ ካዎይ እዮአቄም ታማን ፁግዳ ፃ ማፃፋ ቃላ ኡባ ኤርምያስ እያዉ ዶናን ኦድን ፃፍስ። ቃስ ኤርምያስ ሄሳ ዳንያ ሀራ ቃላካ ጉጅን፥ ኡባካ ባሮክ ፃፍስ።