ኤርምያሳ ማፃፋ 2

እስራኤለይ ፆሳ አግስ

1 ጎዳ ቃላይ ታኮ ሀይሳዳ ያግሸ ይስ፦ 2 "ባዳ የሩሳላመ አሳ ሀይን ሀይሳዳ ያጋዳ አዋጃ። ነ ናአተን ታዉ አይ መላ አማነትዳኮ፥ ነ ቡሮ መዳን ደእያ ዎደ ታና አይ መላ ሲቅዳኮ፥ ታ አኬካይስ። ኔኒ መላ ቢታን ዘረ ዘረት ኤሮና ቢታን ታና ካላዳሳ። 3 ሄ ዎደ እስራኤለይ ጎዳስ ጌሽ፤ እያዉ ባይራ ካ መላ። እያፐ ምዳ ኡባይ ባላ ግዶሶና፤ ኤንታ ቦላ ዮይ ይስ። ሄሳ ኦደይ ጎዳ" ያጌስ።

4 ህንተኖ፥ ያይቆባ ናይቶ፥ እስራኤለ ዛረ፥ ኡባይ ጎዳ ቃላ ስእተ! 5 ጎዳይ ያጌስ፤ ካሰ ህንተ አዋት ታፐ አይ ባላ ደምድ ታፐ ሃክድ ብዶና? ኤንቲ ፓና ኤቃታ ጎይንድ ፓናባ ግድዶሶና። 6 ኤንቲ፥ "ኑና ግብፀፈ ከስዳ፥ መላ ቢታን ካለዳ፥ አፎራነ መላ ቢታራ አዳ፥ ኮሽነ ሳካና ም ደእያ ቢታራ ፕንዳ፥ ኦንካ አናነ ደኦና በሳራ ካለዳ ጎዳይ አዉን ደኢ?" ያግድ ኦይችቦኮና። 7 ህንተ ሄ ቢታ አይፍያፐ ሎኡዋ ማና መላ ታ ህንተና አራዳ ቢታ ኤሀስ። ሽን ህንተ ይድ፥ ታ ቢታ ቱንስደታ፤ ታ ላታ ኢስደታ። 8 ካህነት፥ "ጎዳይ አዉኔ?" ያግድ ኦይችቦኮና። ታ ህገይ ኤንታ ኩሸን ደእያ አሳት ታና ኤርቦኮና። ደርያ አይሰይሳት ታ ቦላ ማካልዶሶና። ናበት ባኣለ ኤቃ ሱንን ትንብተ ኦድድ ፓና ኤቃታ ጎይንዶሶና።

9 "ሄሳ ግሾ፥ ታ ህንተራ ቡሮ ሞተታና፤ ህንተ ናይታ ናይታራ ሞተታና። 10 አነ ዉሎሀ ባጋ ብድ፥ ዩሾይ አባን ተቀትዳ ቢታ ቆጵሮሳ ፄልተ፤ ዶሎሀ ባጋ ብድ ቀዳረ ቢታ አሰ ኪትድ ፆሞስተ። ሀይሳ መላባይ ሀይሳፈ ካሰ ሀንዳኮ በእተ። 11 ኤንቲ ቱማ ፆሳታ ግዶና እፅኮካ ባ ፆሳታ ላምዳ ደረይ ኦኔ? ሽን ታ አሳይ ኤንታዉ ቦንቾ ግድዳ ታና ፓና ኤቃታራ ላምስ።"

12 "ሳሎቶ፥ ሀይሳን ማላለትተ፤

ዳጋምድ ኮኮርተ" ያጌስ ጎዳይ

13 ታ አሳይ ናምኡ ናጋራ ኦዶሶና፤

ሄስካ፥ ደኦ ፑልቶ ግድዳ ታና አግስ።

ሃ ኦይካናዉ ዳንዳኦና፥

ፆኤ ኦላታ ባንታዉ ቦክዶሶና።

14 "እስራኤለይ ሻመትዳ አይለዬ? ዎይኮ ሶን የለትዳ አይለዬ? ያትን፥ ሞርከት አይስ ዶኦዳ ሻንካቶና? 15 እያ ሞርከት ጋሞዳ እያ ቦላ ጉዶሶና። ኤንቲ ባንታ ቃላ ቁ ኦድ ዳሮሶና። ኤንቲ እያ ቢታ ካይስ ከስዶሶና፤ እያ ካታማት ላለትድ አስ ባይና ሶ ግድዶሶና። 16 ሄሳ ቦላካ መምፕሳነ ፃፍናሳ አሳት እያ ሁጵያ ሜድዶሶና። 17 ነኖ እስራኤለ፥ ኦገ ኡባን ነና ካለያ፥ ጎዳ ነ ፆሳ አጋዳ ሀይሳ ነ ቦላ ኤህዳይ ነና ግድኪ? 18 ናይለ ሻፋፐ ሃ ኡያናዉ ግብፀ ቡስ ነና አይ ማዳኔ? ኤፍራፂሳ ሻፋፐ ሃ ኡያናዉ አሶረ ቡስ ነና አይ ማዳኔ? 19 ህዛ ነ ኢታተይ ነና ሴራና፤ ነ ታና ካድዳይስ ነ ቦላ ፕርዳና። ነ ታና ጎዳ ነ ፆሳ አግዳይስ አይ መላ ኢታነ ጫሞ ግድያኮ አኬካ በአ። ነ ታዉ ያይያ ያሻይ ባዋ" ያጌስ ጎዳይ፥ ኡባፈ ዎልቃማ ፆሳይ።

20 "ታ ነ ቃምባራ ዳሮ ዎደፐ ካሰ መንስ፤ ነ ቃሹዋ ዱስ። ኔኒ፥ ‘ታ ነና ጎይንከ’ ያጋዳሳ። ደረ ቦላነ ዳሻ ም ጋርሳን ላይማታናዉ ዝንአዳሳ። 21 ታ ነና ዶረትዳ ዘረፈ ኤካዳ፥ ሎኦ ዎይነ ጋደን ቶካስ። ያትን፥ ዋናዳ፥ ጉየ ስማዳ፥ ዎራን ዶልዳ፥ ኢታ ዎይነ ግዳዲ?" ያጌስ ጎዳይ።

22 "ነ ሳንጌኖራ ሜጨትያኮካ፥ ሳሙናን ጎርፐትያኮካ ነ ቅታይ ታ ስንና። 23 ኔኒ ዋናዳ፥ ‘ታ ቱናብከ፤ ባኣለ ኤቃ ጎይናብከ’ ጋይ? ኔኒ ዛንጋራን ሀንዳባ ፄላ፤ ነ ኦዳባ አኬካ። ኔኒ ያነ ሃነ ዎፅያ ዚታ ከይዳ ግማለ መላ። 24 ኔኒ ባዞ ሜዘትዳ፥ ዚታ ዎደ ጫርኮ ስንገያ ሀረ መላ። እ አሞይ ደንድን፥ ኦን እዮ ተቃናዉ ዳንዳኢ? እያ ባዉ ኮያዳ ጋክያ ግሾ አይ አደ ሀረይካ እዮ ደማናዉ ዳቡረና። 25 ነኖ፥ እስራኤለ፥ ነ ጫማይ ዉራና ጋካናዉ ነ ኮቶኖይ መላና ጋካናዉ ሀራ ፆሳታ ጌዶ ዎፆፋ። ሽን ኔኒ፥ ‘አቶ፥ ሄስ ታና ማደና። ታኒ እማ ፆሳታ ዶሳስ፤ ታኒ ኤንታ ጎይናና’ ያጋዳሳ።

26 "ካይሶይ ኦይከትዳ ዎደ ዬላተይሳዳ እስራኤለ አሳይ ዬላትዶሶና፤ ኤንቲ፥ ኤንታ ካዎት፥ ኤንታ ሀላቃት፥ ኤንታ ካህነትነ ኤንታ ናበት ኡባይ ዬላታና። 27 ኤንቲ ምኮ፥ ‘ነ ታ አዋ’ ያጎሶና፤ ሹቻ፥ ‘ታና ነ የላዳሳ ያጎሶና። ኤንቲ ባንታ ሶምኡዋ አግድ፥ ባንታ ዞኩዋ ዛርዶሶና። ሽን ኤንቲ መቶ ዎደ ኑና አሻ!’ ያጎሶና። 28 ሽን ህንተ፥ ህንተዉ መዳ ፆሳት አዉን ደኦና? ህንተ መቶን ገልያ ዎደ ህንተና አሻናዉ ዳንዳእኮ ደንድድ ህንተና አሾ። ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ" ያጌስ ጎዳይ።

29 "ህንተ ታራ አይስ ሞተተቲ? ህንተ ኡባይ ታዉ ማካልደታ። 30 ታ ህንተና ጮ ሴራስ፤ ህንተ ህንተ ኦሱዋፐ ስምያባ ግደከታ። ኮሻትዳ ጋሞዳ ህንተ ማሻይ ህንተ ናበታ ምስ" ያጌስ ጎዳይ።

31 ህንተኖ፥ ሀ ዎድያ የለታዉ፥ ጎዳ ቃላ ስእተ። ታ እስራኤለታስ ባዞ ዎይኮ ሳካና ማን ደእያ ቢታ ግዳድናዬ? ያትን፥ አይስ ታ አሳይ፥ "ኑኒ ኑ ሸነዳ ባና፤ ኔኮ ስሞኮ" ያግዶና? 32 ጌላእያ ባ አሌቁዋ፥ ሙሹርያ ባ ማኡዋ ዶጋይ? ሽን ታ አሳይ ታና ታይቦይ ባይና ጋላስ ዶግዶሶና። 33 ኔኒ ነ ላገታ ጌዶ ዎ ዋናዳ ሜዘታዲ? ዳሮ ኢታ ማጫሳት ነ ኦግያ ታማሮሶና። 34 መንድ ገልሽን ኦይክዳ አሳ ሱን ግዶናሽን ፅሎ ማንቆታ ሱን ነ ማኦይ ኢትስ። ኔኒ ሄሳ ኡባ ኦዳካ፥ 35 ኔኒ፥ " ‘ታኒ ፅሎ፤ ቱማ ጎዳይ ታ ቦላ ሀንቀተና፤ ታኒ ናጋራ ኦብከ’ ግያ ግሾ ታ ነ ቦላ ፕርዳና። 36 ኔኒ ነ ኦግያ ላማሸ አይስ ዎፃይ? ነና አሶረይ ዬላይዳይሳዳ ግብፀይ ዬላያና። 37 ጎዳይ ነ አማነተይሳታ ካዉሽዳ ግሾነ ነ ኤንታፈ ማደ ደሞና ግሾ ነ ሁጵያ ኦይካዳ ያፐ ከያና" ያጌስ ጎዳይ።