ኤርምያሳ ማፃፋ 51

1 ባብሎነ አሳነ ባብሎነ ቢታ ይስያ ጫርኮ ኪታና። 2 ታኒ ባብሎነ ቦላ ጫርኮዳ ፑንያ አላጋታ ኪታና። እያ ዩዋ ጋላስ ኤንቲ ኡባ በሳራ እያ ኡንኤና። 3 እያ ኦላንቾት ዶንግያ ዱካና ጋካናዉ ዎይኮ ባንታ ኦላ ሚሽያ ዳንጫና ጋካናዉ ናጎፕተ። እያ ያላጋ አደታስ ምሸቶፕተ፤ እያ ኦላንቾታ ፖሎ ይስተ። 4 ኤንቲ ባብሎነ ቢታን ሹከታና፤ እ ዳባባን ጫደትድ ኩንዳና። 5 ኤንቲ ቢታ ናጋራን ኩንኮካ፥ ፆሳይ፥ ኡባፈ ዎልቃማ ጎዳይ፥ እስራኤለ ጌሻይ፥ እስራኤለነ ይሁዳ አምእዳ የግድ አግቤና። 6 ባብሎነፐ ባቃትተ፤ እሶይ እሶይ ባ ሸምፑዋ አሾ። እ ኦዳ ናጋራ ጋሶን ህንተ ዉሮፕተ። ሀ ዎደይ ታኒ ጎዳይ ሀሎ ከይያ ዎደ። 7 ባብሎነይ ሳአን ደእያ አሳ ኡባይ ኡይድ ማትያ፥ ዎይነ ኡሽ ትገትያ፥ ታ ኩሸን ደእያ ዎርቃ ዋንጫ መላ። ካዎተት ኡባይ ሄ ዎይነ ኡሻ ኡይድ ጎይዶሶና። 8 ባብሎነይ ቆፖና ኩንድድ መቅስ። ሄሳ ግሾ፥ እያዉ ዬክተ፤ እ ፓፃነኮ ኦን ኤር እያ ማዱንስ ለ እምተ። 9 ባብሎነን ደእያ አላጋ አሳይ፥ "ኑ ባብሎነ ፓናዉ ኮይዳ፤ ሽን ፓፃናዉ ዳንዳእቤና። እያ ፕርዳይ ሃክድ ሳሎ ጋክዳ ግሾነ ሻራ ጋካናዉ ቁ ግዳ ግሾ እያ አግድ ኑ ቢታ ስሞስ" ያግዶሶና።

10 እስራኤለ አሳይ፥ "ጎዳይ ኑስ ፕርድዳ ግሾ፥ ፅዮነ ብድ፥ ጎዳይ ኑ ፆሳይ ኦዳባ ኦዳና" ያጋና።

11 "ጎዳይ ባብሎነ ይሳናዉ ቆፋ ቃችዳ ግሾ፥ ሜዶና ካዎታ ደንስ። እ ባ ኬ ግሾ ሀሎ ከያናዉ ቆፕስ። ሜዶና ሀላቃት፥ ‘ዶንገ ቶራ ሌፍተ፤ ጎንዳለ ኦይክተ። 12 ባብሎነ ቦላ ኦላ ባንድራ ደንተ፤ ምንድ ናግተ። ዎቸይሳታ ኤንታ በሳን በሳን ዎተ፤ ዙግድ ጫድያ ኦላንቾታ ጊግስተ’ " ያግዶሶና። ጎዳይ ባብሎነ አሳ ቦላ ቆፕዳባነ ባ ግዳባ ኦና።

13 ባብሎነ፥ ኔኒ ዳሮ ሻፋትነ ዱረተ ኩምዳ ቢታ፥ ሽን ነ ዉርሰይ ጋክስ፤ ኔኒ በሶና ኦገን ሺሽያ ጎአይ አትስ። 14 ኡባፈ ዎልቃማ ጎዳይ፥ "ቦለይ ቢታ ኩመይሳዳ ታኒ አሳ ነ ቢታን ኩንና፤ ኤንቲ ነና ፆንዳ ኡፋይሳን ባንታ ቃላ ቁ ኦድ ነ ቦላ ጋይራና" ያግድ ባ ሱንን ጫቅስ።

15 ጎዳይ ባ ዎልቃን ሳኣ መስ፤

ባ ጭንጫተን ቢታ ባስስ፤

ሳሎታ ባ አኬካን ምጭስ።

16 እ ኪትያ ዎደ፥

ሳሎን ደእያ ሃት ጉሞሶና።

ሻራታ ሳኣ ጋፃፐ ኤሄስ፤

እር ቡክያ ዎደ ዎልአን ዎልአሜስ፤

ባ ምንጃ በሳፈ ጫርኩዋ ከሴስ።

17 አስ ኡባይ ኤያነ አኬክ ባይናይሳ፤

ኤንታ ምስለት ዎርዶነ

ሸምፖይ ባይናይሳታ ግድያ ግሾ፥

ዎርቃ ሼሽድ ኤቃ መይሳት ዬላትዶሶና።

18 ሄ ምስለት ፓናይሳታነ ከትዳይሳታ፤

ኤንታ ቦላ ፆሳይ ፕርድያ ዎደ ኤንቲ ያና።

19 ሽን ያይቆባ ፆሳይ ኤንታ መላ ግደና፤

ኡባባ መዳይ እያ።

እ ባዉ ዶርዳ ኮቻይ እስራኤለ አሳ፤

እያ ሱንይ ኡባፈ ዎልቃማ ጎዳ።

ጎዳ ናርቃ

20 "ባብሎነ፥ ነ ታ ናርቃነ ታ ኦላ ሚሸ፤

ነና ጎኤታዳ ታኒ ቢታታ መንረስ፤

ካዎተታ ይሳስ።

21 ነና ጎኤታዳ ፓራታነ ፓራ ቶገይሳታ፤

ፓራ ጋረታነ ኤንታ ላገይሳታ መንረስ።

22 ነና ጎኤታዳ ማጫነ አደ፥

ጭማነ ናይታ ፓንነ ጌላኦ መንረስ።

23 ሄንንቹዋነ እያ ዉድያ፥

ጎየይሳነ እያ ዋ ቦራታ፥

ደርያ ሃረይሳታነ ሀላቃታ

ነና ጎኤታዳ መንረስ" ያጌስ ጎዳይ።

24 "ባብሎነይነ ባብሎነ አሳይ ፅዮነ ቦላ ኦዳ ኢታ ኦሱዋ ግሾ ህንተ ፄልሽን ታ ሀሎ ከያና" ያጌስ ጎዳይ።

25 "ነኖ፥ ባብሎነ፥ ነ ቢታ ይስያ ዙማ መላ፤ ሽን ታ ጎዳይ ነና እፃስ። ታኒ ታ ኩሽያ የዳዳ፥ ነና ዙማ ቦላፈ ዱገ ጎንዶርሳና፤ ኔኒ ፁገትዳ ዙማ ግዳዳ አታና። 26 ኔፐ ባሶን የግያ ዎይኮ ግምቤስ ኤከትያ ሹች ዴና፤ ነ መርናዉ ባይሳ ግዳና" ያጌስ ጎዳይ።

27 "ባብሎነ ቦላ ኦላ ባንድራ ደንተ፤ አሳ ግዶን ሞይዘ ፑንተ። እያ ኦላናዉ አሳ ኡባ ጊግስተ፤ አራራተ፥ ምናነ አስካናዛ ካዎተታ ፄግተ። ኦላ ሀላቃታ ሹምተ፤ ቦለ መላ ዳሮ ፓራታ ኤህተ። 28 ባብሎነ ኦላናዉ ካዎተታ ኡባ ጊግስተ፤ ሜዶና ካዎታ፥ ኤንታ ሀላቃታ፥ ደርያ ሃረይሳታነ ኤንቲ ሃርያ ቢታ አሳ ኡባ ደንተ።

29 "ባብሎነይ ኦንካ ዶና ባይሳ ኦናዉ ጎዳይ ሀልችዳ ሀልቹዋ ፖልያ ግሾ፥ ቢታ ኡባይ ኮኮረስነ ፖርቃቴስ። 30 ባብሎነ ኦላንቾት ኦላ አግድ፥ ባንታ ሚፃን ኡትዶሶና። ኤንታ ዎልቃይ ላፍን፥ ማጫሳ መላ ግድዶሶና። ኤንታ ኬት ፁገትዶሶና፤ ካታማ ፐንግያ ኮበ ምት መቅዶሶና። 31 ሀ ጋፃፐ ህን ጋፃ ጋካናዉ፥ ካታማይ ሞርከን ኦይከትዳይሳ ባብሎነ ካዋስ ኦዳናዉ፥ ዎፀይስ ዎፀይሳ ካልድ፥ ኪተትዳይስ ኪተትዳይሳ ካልድ ቦሶና። 32 ሻፋራ ፕንያ በሳት ኦይከትዳይሳ፥ ሃ ጋፃን ደእያ ዎራይ ፁገትዳይሳነ ኦላንቾት ዳጋምዳይሳ ኤንቲ ካዋስ ኦዳናዉ ዎፆሶና" ያጌስ ጎዳይ።

33 "ባብሎነ ቢታይ ካ ቡክያ ዉዱማ ግዳና፤ ጉ ዎደፐ ጉየ እ ጫከትያ ዎደይ ያና" ያጌስ ኡባፈ ዎልቃማ ጎዳይ፥ እስራኤለ ፆሳይ።

ጎዳይ እስራኤለ ማዳና

34 ባብሎነ ካዎይ ናቡካዳናፆር ኑና ዉርስድ ምስ፤ ኑ ካታማ ካይሳ ኦቶ ከስስ። ዳወይ ምተይሳዳ እያ ምትስ፤ ማልኦባ ምድ ኩንይሳዳ እ ኑ ሻሉዋን ባ ጋንጅያ ኩንስ፤ አትዳይሳ ሙጭድ ጩትስ። 35 ፅዮነይ፥ "ባብሎነይ ኑ ቦላ ኦዳ ኢታባ ኡባይ እያ ቦላ ስሞ" ያጎሶና። የሩሳላመይ፥ "ኑ ሱ አጮይ ባብሎነ አሳ ኦይኮ" ያጎሶና።

36 ሄሳ ግሾ፥ ጎዳይ የሩሳላመ አሳ ሀይሳዳ ያጌስ፦ "ታ ነ ግሾ ሞተታና፤ ነ ሃሉዋ ታ ከያና። ታኒ ባብሎነ ሃነ ፑልቶታ መልሳና። 37 ባብሎነይ ላለ ዶረነ ዎርካናት ጉፕያ በሲ ግዳና። እያ በእያ ኡባይ ዳጋማናነ ቀልቅሳና፤ ያን እስ አስካ ዴና። 38 ባብሎነ አሳ ኡባይ ጋሞዳ ጉዶሶና፤ ጋሞ ማራዳ ዳሮሶና። 39 ኤንታ አሳተይ ሆእያ ዎደ፥ ታ ኤንታዉ ኡሻ ግብራ ጊግሳና። ኤንቲ ማታና ጋካናዉ ታ ኤንታ ኡሻና፤ ኤንቲ ዛሪድ ደንዶና መላ መርናዉ ስካና" ያጌስ ጎዳይ። 40 ሹካናዉ ኤፍያ ኡርገዳ፥ ማራዘዳነ ኮለዳ ታኒ ኤንታ ሹካ በሲ ኤፋና።

41 "አሳ ኡባይ ሳቢያ ባብሎነይ ዋንድ ኦይከትደ! ባብሎነይ ካዎተታ ግዶን ዋንድ ዳጋንያባ ግድደ! 42 ባብሎነ ሞርከት አባ ቤታይ ደንደይሳዳ ደንድድ ካታማን ኤልዶሶና። 43 እያ ካታማት ላለትድ፥ ዳጋንያባ ግድዶሶና፤ ሃ ባይና መላ ቢታ ዳንዶሶና፤ አስ ዶና በስነ ኦንካ ካንድ አና በሲ ግድዶሶና። 44 ቤላ ጌተትያ ባብሎነ ኤቃ ታ ሴራና፤ እ ምትዳባ እያ ኡሉዋፐ ከሳና። ህዛፐ ጉየ፥ ካዎተት እያኮ ጎገይሳ አጋና፤ ባብሎነ ግምበይ ኩንዳና።

45 "ታ አሳዉ፥ እያ ግዶፈ ከይተ! ህንተ፥ ጎዳ ሀንቆ ሱሉዋፐ ህንተና አሽተ! 46 ቢታን ኦደትያ ኦዳ ስእያ ዎደ ኡፋይስ ቃንፆፍተነ ያዮፍተ። ላይን ላይን ኦድ ካልድ ካልድ ያና። ሄ ዎደ ካዎይ ካዋ ቦላ ደንድያ ማካላ ኦድ ቢታን ስኤታና።"

47 "ሄሳ ግሾ፥ ታኒ ባብሎነ ኤቃ ምስለታ ሴርያ ጋላስ ያና። ቢታ ኡባይ ዬላታና፤ ሀይቅዳይሳት ኡባይ ካታማ ግዶን ኩንዳና። 48 ፑደሀ ባጋፈ ያና ይሰይሳታ ኩሸን ባብሎነይ ገልያ ዎደ ሳሎንነ ሳአን ደእያ ኡባባይ እልላና። 49 ባብሎነይ፥ እስራኤለ አሳነ ሳአን ደእያ አሳ ኡባ ዎዳይሳዳ ባብሎነ አሳይ ሀይቃናዉ ኮሼስ። 50 ታ አሳዉ፥ ኦላፐ ከስ ኤክዳይሳቶ፥ ቢተ፤ ሀይሳን ኤቆፍተ። ህንተ ደእያ ሃሆ ቢታን ታና ጎዳ ሀሳይተ፤ የሩሳላመ ቆፕተ።"

51 ህንተ፥ "ኑኒ ጫየትዳ ግሾ ካዉይዳ፤ አላጋት ፆሳ ኬን ደእያ ጌሻ በሳታ ገልዳ ግሾ፥ ኑ ዬላ ማእዳ" ያግደታ።

52 ሽን "ታኒ ጎዳይ ባብሎነ ኤቃታ ሴርያ ዎደይ ያና። ማዱንፅዳይሳት ቢታ ኡባን ኦላና። 53 ባብሎነይ ሳሎ ፑደ ከይድ፥ ያን ሚፃ መናዉ ዳንዳእያኮካ፥ ያ ጋካናዉ ከይድ፥ እያ ያን ይስያ አስ ታኒ ኪታና" ያጌስ ጎዳይ።

54 "ባብሎነን ዋሶይ፥

ባብሎነ ቢታን ግታ ዮ ግርስ ስኤታና።

55 ጎዳይ ባብሎነ ይሳና፤

እያ ዎልቃማ ግርሳ ስእ ኦና።

አባ ቤታዳ ጉምያ ሞርከት

ኦልሸ ጬቀታና።

56 ይሰይሳት ባብሎነ ቦላ ያና፤

እያ ኦላንቾት ኦይከታና፤

ኤንታ ዶንገይ መቃና።

ታኒ ጎዳይ ሀሎ ከይያ ፆሰ ግድያ ግሾ፥

ኤንታ ኦሱዋዳ ኤንታዉ ዛራና።

57 እያ ሀላቃታ፥ እያ ጭንጫ አሳታ፥ እያ ደርያ ሃረይሳታ፥

እያ ቶራ ሞጮናታነ እያ ኦላንቾታ ማያና።

ኤንቲ ዛሪድ ደንዶና መላ መርናዉ ስካና"

ታኒ ካዎይ፥

ኡባፈ ዎልቃማ ጎዳ ጌተተይስ

ሀይሳ ኦዳይስ።

58 "ግታ ባብሎነ ግምበይ ኩንዳና፤

እያ አዱሳ ፐንገት ታማን ፁገታና።

አሳይ ኦዳባ ኡባይ ሀዳ፤

ካዎተት ዳቡርያባይ ታማሳ" ያጌስ ኡባፈ ዎልቃማ ጎዳይ።

59 ማሰያ ናኣ፥ ኔራ ናአይ ሳራይ ካዋ ሰደቅያሳ ሹማ። ሰደቅያስ ይሁዳን ካዎትዳ ኦይዳን ላይን፥ ሳራይ እያራ ባብሎነ ብያ ዎደ ኤርምያስ ሳራያ ቦላ ኪታ የድስ። 60 ባብሎነ ቦላ ጋካናዉ ደእያ ኢታባ ኡባነ ባብሎነ ፄልያ ሀራባ ኡባ ኤርምያስ ማፃፋን ፃፍስ። 61 ሳራያኮ፥ "ኔኒ ባብሎነ ጋክዳ ዎደ ነ ቃላ ቁ ኦዳ አሳስ ሀ ማፃፋ ናባባ። 62 ቃስ ሀይሳዳ ያጋዳ ዎሳ፦ ‘አቤት ጎዳዉ፥ ኔኒ ሀ በሳ ይሳና፤ ሀ በሳን ሸምፖራ ደእያ መተ፥ አስነ መሄይ ዴና፤ ሀ በሳይ መርናዉ መላ ቢታ ግዳና’ ያጋ። 63 ሀ ማፃፋ ናባባ ዉርስዳፐ ጉየ፥ ማፃፋ ሹቻራ ጋ ቃቻዳ፥ ኤፍራፂሳ ሻፋን ሆላ። 64 ታኒ ጎዳይ እያ ቦላ ኤህያ ዩዋ ጋሶን፥ ባብሎነይ ዛሪድ ደንዶና መላ ሀይሳዳ ሙከታና" ያጋ።

ኤርምያስ ኦድዳ ቃላይ ሀይሳን ዉርስ።