ኤርምያሳ ማፃፋ 43

ኤርምያስ ግብፀ ብስ

1 ጎዳይ ኤንታ ፆሳይ ኪትዳ ቃላ ኡባ ኤርምያስ ኤንታዉ ኦድድ ዉርስዳፐ ጉየ፥ 2 ሆሻያ ናአይ አዛርያስ፥ ቃራያ ናአይ ዮሃንነ ኦቶራንቾ አሳ ኡባይ ኤርምያሳኮ፥ "ነ ዎርዶ ኦዳሳ! ጎዳይ ኑ ፆሳይ ኑ ግብፀ ብድ ኡቶና መላ ድጋናዉ ነና ኑኮ ኪትቤና። 3 ሽን ባብሎነ አሳይ ኑና ዎናዳ ዎይኮ ድእድ ባንታ ቢታ ኤፋናዳ ነ ኑና ኤንታ ኩሸን አዳ እማና መላ ነና ኑ ቦላ ደንዳይ ኔራ ናኣ ባሮካ" ያግዶሶና።

4 ቃራያ ናአይ ዮሃን፥ ቶራ ሞጮናት ኡባይነ አሳ ኡባይ ይሁዳ ቢታን ዳና መላ ጎዳይ ኤንታ ኪትዳ ኪታ ፖሎና እፅዶሶና። 5 ቃራያ ናአይ ዮሃንነ ቶራ ሞጮናት ኡባይ ባንታ ላለትዳ ካዎተታ ኡባፈ ይሁዳን ዳናዉ ስምዳ ይሁዳ አሳ ባንታራ ኤክድ ግብፀ ብዶሶና። 6 ካዋ ናገይሳታ ሀላቃይ ናቡዛርዳን ሳፋና ናኣ፥ አክቃማ ናኣ ጎዶልያራ ዳና መላ አሽዳ አደታ፥ ማጫሳ፥ ናይታነ ካዋ ማጫ ናይታ ኡባ ኤፍዶሶና። ቃስ ናብያ ኤርምያሳነ ኔራ ናኣ ባሮካ ኤፍዶሶና። 7 ኤንቲ ጎዳ ኪታ እፅድ፥ ግብፀ ቢታ ገልድ፥ ፃፍናሳ ካታማ ጋካናዉ ብዶሶና።

8 ፃፍናሳን ጎዳ ቃላይ ኤርምያሳኮ ሀይሳዳ ያግድ ይስ። 9 "ግታ ሹቻታ ኤካዳ፥ ይሁዳ አሳይ በእሽን፥ ፃፍናሳን ደእያ ግብፀ ካዋ ጋ ገልያ በሳን ስን ባጋራ ደእያ ባሱዋን ሞጋ። 10 ኤንታኮ፥ ‘ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፤ ታ ኪታዳ፥ ታ አይልያ ባብሎነ ካዋ ናቡካዳናፆራ ኤህሳና። ሀ ሞገትዳ ሹቻታ ቦላ እያ ካዎተ አራታ ዎና። እ ባ ካዎተ ዱንካንያ እያ ቦላ ኤሳና። 11 እ ይድ ግብፀ ቢታ ኦላና። ሀይቆስ በሰይሳት ሀይቃና፤ ድኤታናዉ በሰይሳት ድኤታና፤ ማሻን ሀይቃናዉ በሰይሳት ማሻን ሀይቃና። 12 ግብፀን ደእያ ኤቃ ፆሳታ ኬ ታማ ኦይና፤ ኤቃታ ፁጋና ዎይኮ ድአና። ሄንንቾይ ባ እትያ ማኤይሳዳ፥ ግብፀ ቢታ ማአና። ያትድ፥ ያፐ ሳሮ ባና። 13 እ፥ ግብፀ ቢታን ሄልዮታ ካታማን ደእያ ሀዉልትያ መንረና፤ ግብፀ ፆሳታ ኬ ታማን ፁጋና’ " ያግስ።