ኤርምያሳ ማፃፋ 4

1 ጎዳይ ያጌስ፥ "እስራኤለ አሳዉ፥ ስምኮ፥ ታኮ ስምተ። ህንተ ታና ሻትያ ህንተ ኤቃታ ታ ስንፈ ድግኮ፥ ታ ኦግያፐ ካረ ከዮና እፅኮ፥ 2 ቱማን፥ ሱረተንነ ፅሎተን፥ ‘ደኦ ፆሳይ ኤርያ መላ’ ግድ ጫቅኮ፥ ሄ ዎደ ካዎተት እያን አንጀታናነ እያን ጬቃና።"

3 ጎዳይ ይሁዳነ የሩሳላመ አሳኮ ሀይሳዳ ያጌስ፦ "ህንተ ኦ ቢታ ጎይተ፤ አጉን ቦላ ዘሮፕተ። 4 ህንተኖ፥ ይሁዳነ የሩሳላመ አሳዉ፥ ህንተ ፆሳስ ቃፃረትተ፤ ህንተ ዎዛና ሾሁዋ ድግተ። ሄስ ሀኖና እፅኮ ህንተ ኢታተ ግሾ፥ ታ ሀንቆይ ታማዳ ኤፃና፤ እያ ኦንካ ቶይሳናዉ ዳንዳኤና" ያጌስ ጎዳይ።

ፑደሀ ባጋፈ ዮ ያና

5 ይሁዳን አዋጅተ፤ የሩሳላመን ሞይዘ ፑንተ! ህንተ ቃላ ቁ ኦድ ሀይሳዳ ግድ ዋስተ! እስፈ ሺቅድ ግምበትዳ ካታማታኮ የተ። 6 አሳይ ፅዮነ ባና መላ ማልተ! ህንተ ሸምፑዋ አሻናዉ ጋምኦና ባቃትተ! ጋምኦፍተ! ታ ፑደሀ ባጋፈ ጋዶነ ዮ ቢታ ቦላ ኤሀና ሀናይስ። 7 ጋሞይ ዎራፐ ከየይሳዳ ካዎተታ ይሰይስ ባ በሳፈ ደንድድ ህንተ ቢታ ይሳናዉ ይስ። ህንተ ካታማት ላለትድ ባይሳ ግዳና። 8 ሄሳ ግሾ፥ ካዮ ማኦ ማእድ፥ "ዎ! ዎ!" ግድ ዘሌልተነ ዬክተ። ጎዳ ሱልያ ሀንቆይ ኑ ቦላፈ ክችቤና።

9 "ሄ ዎደ ካዋነ ሀላቃታ ዎዛናይ ትልአና፤ ካህነት ዳጋማና፤ ናበት ህርጋና" ያጌስ ጎዳይ።

10 ታኒ፥ "ኡባ ሃርያ ጎዳዉ፥ ማሽ ኤንታ ቆን ዎያ ዎደ ‘ህንተዉ ሳእ ሳሮ ግዳና’ ያጋዳ ሀ አሳነ የሩሳላመ አይስ ጭማይ" ያጋስ።

11 ሄ ዎደ ሀ አሳስነ የሩሳላመስ ሀይሳዳ ያግድ ኦደታና፦ "መላ ቢታን ደእያ አይኮይ ባይና ቃ ደረታፐ ምችያ ጫርኮይ ታ አሳ ቦላ ጫርካና፤ ሄስ ካ ጌሻናሳ ግደና። 12 ታ ኪታን ዎልቃማ ጫርኮይ ጫርካና፤ ታ ኤንታ ፕርዳና" ጌስ።

13 ሄኮ፥ ሞርከይ ሻራዳ ከዬስ። እያ ፓራ ጋረት ጎተ መላ፤ እያ ፓራት አርጋንፈ አድ ኤሶቶሶና። ኑና አየ! ኑ ይዳ!

14 "ነኖ የሩሳላመ፥ አታና መላ ነ ዎዛና ሜጫዳ ኢታተፈ ጌያ። ኢታ ቆፋይ ነ ዎዛናን አዉደ ጋካናዉ ጋምአኔ? 15 ዳነ ካታማፐነ ኤፍሬማ ዙማፐ ይዳይሳት ኢታባ አዋጆሶና። 16 ይሁዳ ካታማታ ቦላ ኦላ አዋጅያ ኦላንቾት ሃሆ ቢታፈ ዩሳ ቦላ ደኦሶና ግድ ካዎተታስ ኦድተ፤ የሩሳላመስካ አዋጅተ። 17 እ ታ ቦላ ማካልዳ ግሾ፥ ጋደን ደእያ ካ ናገይሳዳ ኦላንቾት ይሁዳ ዩሹዋ ተቃና" ያጌስ ጎዳይ።

18 ይሁዳ አሳዉ፥ ህንተ ሀኖይነ ህንተ ኦሶይ ሀይሳ ኡባ ህንተ ቦላ ኤህስ። ሀይስ ህንተዉ ሴራ። እ አይ መላ ጫም! ህንተ ዎዛና አይ መላ ጫድ!

19 ታና አየ! ታ ሀይሳ ዋታ ዳንዳአነ! አየ ታ ዎዛና! ታ ዎዛናይ ኮኮሬስ፤ ታ ስእ ጋናዉ ዳንዳእከ። ታኒ ሞይዘ ፑኖነ ኦላ ግርስ ስእዳ ግሾ ስእ ጋናዉ ዳንዳእከ። 20 ዮይ ዮ ቦላ ዬስ፤ ቢታይ ኩመ ይስ። ታ ዱንካነይ ኩንድስ፤ ታ ሻቃራይካ ላለትስ። 21 ታኒ አዉደ ጋካናዉ ኦላ ማላ በአኔ? አዉደ ጋካናዉ ሞይዘ ፑኖ ስአኔ?

22 "ታ አሳይ ኤያ፤ ኤንቲ ታና ኤሮኮና። ኤንቲ ቆፍ ባይና ናይታ መላ፤ ኤንታዉ አኬክ ባዋ። ኤንቲ ኢታባ ኦናዉ ጭንጫ፤ ሽን ሎኦባ ኦድ ኤሮኮና" ያጌስ ጎዳይ።

23 "ታኒ ሳኣ በእያ ዎደ፥ ሳእ አይኮይካ ባይና ባይሳ ግድዳይሳ በአስ። ቃስ ሳሎታ ፄልያ ዎደ፥ ፖኦይ ባይናይሳ ፄላስ። 24 ታ ደረታ ፄልያ ዎደ ኤንቲ ቃፆሶና፤ ታኒ ዙማታ በእያ ዎደ ያ ሃ ዎፆሶና። 25 ታ ፄልያ ዎደ አስ ባዋ፤ ሳሎ ካፎት ኡባይ ፓልድ ባቃትዶሶና። 26 ታ ፄልያ ዎደ አራዳ ቢታይ ቃኤ ግድዳይሳ በአስ። ጎዳ ስንንነ እያ ሱልያ ሀንቁዋ ስንን ሄ ቢታ ካታማት ላለትዶሶና።

27 "ቢታይ ያና፤ ሽን ታ እያ ኩመ ይስከ። 28 ሳአይ ዬካና፤ ሳሎይ ማና። ታ ኦዳስ፤ ማርስከ። ታ ቆፋ ቃቻስ፤ አግከ" ያጌስ ጎዳይ።

29 ፓራ አሳታነ ዶንገ አሳታ ዋሱዋን፥ አሳይ ካታማ ኡባፈ ባቃታና። ባጋት ዎፅድ ዎራ ገላና፥ ባጋት ዛላ ቦላ ከያና። ካታማ ኡባይ ባይስ ግድን ደእያ አስ ያና።

30 ነኖ፥ ዮስ አትዳረ ነ ዋናይ? ነ ዞኦ ማኡዋ አይስ ማአዲ? ዎርቃ አሌቆ አይስ ዎዲ? ነ አይፍያ ስጵን አይስ ትያይ? ኔኒ ጮ ነና ሎይሳ፤ ነ ላገት ነና ካዶሶና፤ ኤንቲ ነና ዎናዉ ኮዮሶና። 31 ታኒ እቀ ኦይክዳ ማጫስ ዋስያ ዋሱዋ መላ ስአስ። እ ዋሶይ ኮይሮ ናአ የልያ ማጫሳ ዋሶ መላ። ሄ ዋሶይ፥ የሩሳላመይ ሸምፖ ያዳ፥ ባ ኩሽያ ምጫዳ፥ "ታና አየ! ታ ያስ! ታና ዎናዉ ሀኖሶና!" ያጋዳ ዋስያ ዋሱዋ።