ኤርምያሳ ማፃፋ 50

ባብሎነስ ኦደትዳ ትንብተ

1 ባብሎነነ ባብሎነ አሳባ ናብያ ኤርምያሳ ባጋራ ጎዳይ ኦድዳ ቃላይ ሀይሳ፦ 2 "ካዎተታ ግዶን ኦድተነ አዋጅተ። ባንድራ ቁ ኦ ኦይክድ፥ አይኮካ ቆሶና፥ ሀይሳዳ ያግድ ኦድተ። ‘ባብሎነይ ኩንድስ! ቤል ጌተትያ ኤቃይ ዬላትስ፤ ማርዱካ ጌተትያ ኤቃይ ካዉይስ። እያ ምስለት ዬላትዶሶና፤ እያ ኤቃት ካዉይዶሶና። 3 ፑደሀ ባጋፈ እስ ካዎተ ይድ፥ ባብሎነ ቢታ ይሳና። አሳይነ መሄይ ባቃታና፤ ኦንካ ያን ዴና’ " ያግስ።

4 "ሄ ዎደነ ሄ ጋላስ እስራኤለይነ ይሁድ እስፈ ዬክሸ ይድ ጎዳ ባንታ ፆሳ ኮያና። 5 ኤንቲ ፅዮነ ኤፍያ ኦግያ ኦይቻና፤ ባንታ ሶምኡዋ ያ ዛራና። ኤንቲ፥ ፖሎ ዶገቶና መርና ጫቁዋን ጎዳራ" ኦይከታና።

6 "ታ አሳይ ይዳ ዶርሳ መላ፤ ኤንታ ሄንንቾት ኤንታ ባለድ፥ ዙማ ቦላ ጉየ የድዶሶና። እስ ዙማፐ ሀራ ዙማ ቦላ ቶይላትድ ባንታ ግርብያ ዶግዶሶና። 7 ደምዳ ኡባይ ኤንታ ሻንካትስ። ኤንታ ሞርከት፥ ‘ኑ አይኮካ ባልቦኮ፤ ሀ መቶይ ኤንታ ጋክዳይ፥ ኤንቲ ጎዳ፥ ባንታ ሸምፖ በሳ፥ ባንታ ማይዛታ ኡፋይሳ ቦላ ናጋራ ኦዳ ግሾሳ።’

8 "እስራኤለ አሳዉ፥ ባብሎነፐ ባቃትተ፤ ባብሎነ ቢታፈ ከይተ፤ ዉደ ካለያ ኮለ ዴሻ መላ ግድተ። 9 ታኒ ፑደሀ ባጋፈ ግታ ካዎተታ ጩጋ ደንዳ፥ ባብሎነ ቦላ ኤሀና ሀናይስ። ኤንቲ እያ ኦልድ ኦይካና፤ ኤንታ ዶንገይ ዱክድ፥ ባሎና ኦላንቾ መላ። 10 ባብሎነይ ቦንቀታና፤ እያ ቦንቅያ ኡባይ ካላና" ያጌስ ጎዳይ።

11 ባብሎነ አሳዉ፥ ታ አሳ ቦንቀይሳቶ፥ ህንተ ኡፋይትድ ሀሹ ግደታ። ቆሮን ካልዳ ኡሳዳ ፔኑቅደታ፤ ኮርማ ፓራዳ ጫግደታ። 12 ሽን ሀእ ህንተ ግታ ካታማይ ዬላታናነ ካዉያና። ካዎተታ ግዶን ባብሎነይ ኡባፈ ላፋ ግዳና፤ ሃ ባይና መላ ቢታ ግዳና። 13 ጎዳ ሀንቁዋ ጋሶን፥ ባብሎነይ ያና፤ ላለታና። እያ ማታራ አያ ኡባይ እያ ቦላ ጋክዳ ቦሻ በእድ፥ ዳጋማናነ ማላለታና።

14 "ዶንገ ዱከይሳቶ፥ ባብሎነ ኦላናዉ እያ ዩሹዋን ሳልፕተ፤ እ ጎዳ ቦላ ናጋራ ኦዳ ግሾ ህንተ ዶንግያን እያ ዱክተ። 15 ኡባ ባጋራ ባብሎነ ቦላ ኦላ ዋሶ ዋስተ፤ ባብሎነይ ኩሸ እሚስ፤ እያ ግምበት ኩንድዶሶና፤ እያ ግምበ ድርሳይ ላለትስ። ጎዳይ እያ ቦላ ሀሎ ከይሸ ደእያ ግሾ፥ ህንተ እያ ቦላ ሀሎ ከይተ። እ ሀራታ ቦላ ኦዳባ ህንተካ እያ ቦላ ኦተ። 16 ዘረ ዘረይሳነ ጫካ ዎደ ባጫራ ከየይሳ ባብሎነፐ ይስተ። ይሰይሳታ ማሻ ያይዳ ግሾ፥ ሄ ቢታን ደእያ አሳ ኡባይ ባ ያራኮ ያራኮ ስሚድ ባ ቢታ ቢታ ባቃታና።

17 "እስራኤለይ ጋሞይ የደድ ላልዳ ዶርሳ መላ። ኮይሮ አሶረ ካዎይ እያ አሹዋ ምስ፤ ዉርሰን ባብሎነ ካዎይ ናቡካዳናፆር እያ መቀ ግስ።"

18 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ "አሶረ ካዋ ታ ሴርዳይሳዳ ባብሎነ ካዋነ እያ ቢታ ሴራና። 19 ሽን እስራኤለ፥ እያ ሄን በሳ ዛራና፤ ቃርመሎሳነ ባሳነ ደረታን እ ሄመታና። እ ኤፍሬማነ ጋላዳ ገዘ ቢታን ካልድ ማና። 20 ሄ ዎደ፥ ሀይቆፐ ታ አሽዳ እስራኤለ አሳ ናጋራ ታ አቶ ጋና ግሾ፥ አሳይ እስራኤለን ናጋራ ኮያና፥ ሽን ደሞኮና። ይሁዳን ናጋራ ኮያና፥ ሽን በንተና" ያጌስ ጎዳይ።

21 "ምራታይማ ቢታንነ ፕቆዳን ደእያ አሳ ቦላ ደንድድ ኤንታ ኦልተ፤ ዎተ፤ ኤንታ ፖሎ ይስተ። ታ ህንተና ኪትያ ኡባ ኦተ" ያጌስ ጎዳይ። 22 ቢታ ቦላ ኦላ ዋሶይ ስኤቴስ፤ ግታ ዮይ ጋክስ። 23 ቢታ ኡባ ሊቅስያ ናርቃይ ዋንድ መቅደ! ዋንድ ሊቅደ! ካዎተታ ኡባ ግዶን ባብሎነይ ዋንድ ዳጋንያባ ግድደ! 24 ነኖ፥ ባብሎነ፥ ታ ነና ኦይካናዉ ፅሄ ዎስ፤ ኔኒ ኤሮናሽን ገላዳ ኦይከታዳሳ። ኔኒ ጎዳራ ኤቀትዳ ግሾ ኦይከታዳሳ። 25 ታኒ ታ ኦላ ሚሽያ ዎያ ኬ ዶያዳ፥ ታ ይሉዋን ኦላ ሚሽያ ያፐ ከሳስ። ሄሳ ኦዳይ፥ ጎዳይ፥ ኡባፈ ዎልቃማ ጎዳይ ባብሎነ ቢታን ኦያ ኦሶይ ደእያ ግሾሳ። 26 ያራ ሃራ እያ ቦላ ደንድተ፤ ካይ ደእያ እያ ሻልያ ዶይተ፤ ድኡዋ ካዳ ዶርተ፤ አይብባካ አሾና ዉርስድ ይስተ። 27 ቦሩ ሹከይሳዳ ኤንታ ኦላንቾታ ዎተ። ባብሎነ አሳይ ሴረትያ ዎደይ ጋክዳ ግሾ ኤንታ አየ!

28 "ድኤትዳ አሳይ ባብሎነፐ ከስ ኤክድ፥ የሩሳላመ ባቃታና። ባብሎነ አሳይ ፆሳ ኬ ቦላ ኦዳባስ ጎዳይ፥ ኤንታ ፆሳይ ሀሎ ከያናይሳ ኤንቲ ፅዮነን ኦዳና። 29 ባብሎነ ኦላናዉ ዶንገ ዱክያ ኡባ ፄግተ፤ እሶይካ ከስ ኤኮናዳ እያ ዩሹዋ ተቆ። ጎዳ ቦላ፥ እስራኤለ ጌሻ ቦላ፥ እ ኦቶርትዳ ግሾ፥ እያ ኦሱዋዳ እያዉ ዛርተ። እ ሀራታ ቦላ ኦዳይሳዳ እያ ቦላ ኦተ። 30 ሄሳ ግሾ፥ እያ ያላጋ አደት ካታማ ግዶ ኦግያን ሀይቃና፤ ሄ ጋላስ እያ ኦላንቾት ኡባይ ያና" ያጌስ ጎዳይ።

31 ጎዳይ፥ ኡባፈ ዎልቃማ ጎዳይ፥ "ኔኒ ሴረትያ ዎደይ ጋክዳ ግሾ፥ ነኖ፥ ኦቶራንቹዋዉ፥ ታ ነ ቦላ ደንዳስ። 32 ኦቶራንቾይ በትድ ኩንዳና፤ እያ ደንያ አስ ዴና። ታ እያ ካታማታ ታማን ኦይና፤ ሄ ታማይ ዩሹዋን ደእያ ኡባ ይሳና" ያጌስ።

33 ኡባፈ ዎልቃማ ጎዳይ ሀይሳዳ ያጌስ፦ "እስራኤለ አሳይነ ይሁዳ አሳይ ኡንኤትዶሶና። ኤንታ ድእድ ኤፍዳይሳት ኤንታ ምንድ ኦይክዶሶና፤ ኤንታ የደናዉ ኮይቦኮና። 34 ሽን ኤንታ ዎዘይስ ምኖ፤ እያ ሱንይ ኡባፈ ዎልቃማ ጎዳ። እ፥ ኤንታ ቢታስ ሸምፖ እማናዉ ኤንታ ግሾ ሞተቴስ። ሽን ባብሎነ ቢታን ደኤይሳታ ቦላ ዳጋማ የዳና። 35 ባብሎነይ፥ ባብሎነን ደኤይሳት፥ እያ ሀላቃትነ እያ ጭንጫት ማሻን ሀይቃና" ያጌስ ጎዳይ።

36 "እያ ኤያ ዎርዶ ናበት ማሻን ሀይቆና። ዳጋምያ እያ ዎልቃማ ኦላንቾት ማሻን ሀይቃና። 37 እያ ፓራታ ቦላ፥ እያ ፓራ ጋረታ ቦላነ ማጫሳ መላ ግድዳ እያ አላጋ ኦላንቾታ ቦላ ማሽ ዮ። እያ ሻሉዋ ምንጅያ ኬ ቦላ ማሽ ዮ፤ እያ ቡቁራ ኡባይ ቦንቀታና። 38 ባብሎነን ኤቅ ኩምዳ ግሾነ ዳጋማን ኮኮርያ ኤቃት ደእያ ግሾ፥ እያ ሃይ መሎ፤ እያ ቦላ ኮሽ ዮ።

39 "ሄሳ ግሾ፥ ባብሎነይ ባዞ ዶአትነ ዎርካናት ደእያ በሲ ግዳና፤ ቃስ ያንቾት ያን ዳና። ያን መርናዉ አስ ዴና፤ የለታፐ የለታ ጋካናዉ አስ ደእያ በሲ ግደና። 40 ፆሳይ በን ሶዶመነ ጋሞራ ኤንታ ዩሹዋን ደእያ ካታማታራ ይስዳይሳዳ ባብሎነን ኦንካ ዴና፤ አስ ያን ኡተና" ያጌስ ጎዳይ።

41 "ሄኮ፥ አሳይ ፑደሀ ባጋፈ ያና፤ ምኖ ካዎተትነ ዳሮ ካዎት ሳኣ ጋፃፐ ያናዉ ደንድዶሶና። 42 ኤንቲ ባንታ ዶንግያነ ቶራ ኦይክዶሶና፤ ኤንቲ ዎዛና ምኖነ የድ ማሮና አስ። ኤንቲ ባንታ ፓራ ቶግድ ብያ ዎደ፥ ቤታይ ሾጭያ አባ ጉንዳ ሀኔስ። ነኖ፥ ባብሎነ፥ ኤንቲ ኡባይ ኦላስ ጊግዳ አስ ግድድ ነ ቦላ ሳልፕዶሶና።

43 "ባብሎነ ካዎይ ሄሳ ስእያ ዎደ እያ ኩሸይ ዳቡርድ ስልስ፤ እቀ ኦይክዳ ማጫሳዳ ኡንኤትስ።

44 "ዮርዳኖሰ ሻፋ ላንቀን ደእያ ዎራፐ፥ ሎኦ ቆሮይ ደእያ በሳፈ ቆፖና ከይያ ጋሞዳ፥ ታ ያዳ፥ ባብሎነ አሳ ኤንታ ቢታፈ የደና። ሄሳፈ ጉየ፥ ታ ዶርዳ አስ እያ ቦላ ሹማና፤ ያትን ታ መል ኦኔ? ታ ኦና ግዳባ ተቃናይ ኦኔ? አይ ሄንንቾይ ታራ ኤቀታናዉ ዳንዳኢ? 45 ሄሳ ግሾ፥ ጎዳይ ባብሎነ ቦላነ ባብሎነ ቢታ ቦላ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳ ኡባይ ዳጋማና። 46 ባብሎነ ኩንደ ግርሳይ ቢታ ቃና፤ ባብሎነ ዋሶይ ካዎተታ ኡባን ስኤታና" ያጌስ።