ኤርምያሳ ማፃፋ 28

ዎርዶ ናብያ ሀናና

1 ሄ ላይ፥ ይሁዳ ካዎይ ሰደቅያስ ካዎቶ ዶምዳ ኦይዳን ላይን፥ እቻሻን አጌናን ጋባኦና አደይ፥ አዙራ ናአይ ናበይ ሀናን፥ ፆሳ ኬን ካህነታነ አሳ ኡባ ስንን ታኮ ሀይሳዳ ያግስ፦ 2 "ኡባፈ ዎልቃማ ጎዳይ፥ እስራኤለ ፆሳይ፥ ‘ባብሎነ ካዋ ቃምባራ መንና። 3 ባብሎነ ካዎይ፥ ናቡካዳናፆር፥ ባብሎነ ኤፍዳ ፆሳ ኬ ሚሸ ኡባ ታ ናምኡ ላይ ግዶን ዛራዳ ሀ በሳ ኤሀና። 4 እዮአቄማ ናኣ፥ ይሁዳ ካዋ ዮአክና፥ ይሁዳፐ ድኤትድ ባብሎነ ብዳ አሳ ኡባ ዛራዳ ሀ በሳ ኤሀና። ታኒ ባብሎነ ካዋ ቃምባራ መንና’ " ያጌስ ጎዳይ።

5 ፆሳ ኬ ግዶን ኤቅዳ ካህነታነ አሳ ኡባ ስንን ናበይ ኤርምያስ፥ ናብያ ሀናናኮ ሀይሳዳ ያግስ። 6 "አምንእ! ጎዳይ ነ ግዳይሳዳ ኦ። ፆሳ ኬ ሚሸታነ ድኤትድ ብዳ አሳ ኡባ ባብሎነፐ ዛሪድ፥ ነ ኦድያ ቃላ ጎዳይ ፖሎ! 7 ግዶሽን፥ ታ ነዉነ ነ አሳስ ኦደይሳ ስአ። 8 ኔፐነ ታፐ ካሰ ደእዳ ናበት፥ ኦላባ፥ ዮባነ ጋዶባ ግታ ካዎተታ ቦላ ትንብተ ኦድዶሶና። 9 ሽን፥ ሳሮባ ኦድያ ናበይ፥ ቱማ ፆሲ ኪትዳ ናበ ግደይስ ኤረተይ፥ እ ኦድያ ትንብተይ ፖለትያ ዎደና" ያግስ።

10 ሄሳፈ ጉየ፥ ናበይ ሀናን፥ ናብያ ኤርምያሳ ጋናፈ ቃምባራ ኤክድ መንስ። 11 ሀናን አሳ ኡባ ስንን፥ "ታኒ ናምኡ ላይ ግዶን ባብሎነ ካዋ ናቡካዳናፆራ ቃምባራ ካዎተታ ኡባ ጋናፈ ደንዳ ሀይሳዳ መንና" ያጌስ ጎዳይ። ሄሳፈ ጉየ፥ ኤርምያስ ደንድድ፥ ባ ኦግያ ብስ።

12 ናበይ ሀናን፥ ናብያ ኤርምያሳ ጋናፈ መንዳ ጉ ዎደፐ ጉየ፥ ጎዳ ቃላይ ናብያ ኤርምያሳኮ ሀይሳዳ ያግሸ ይስ። 13 ባዳ ሀናናስ ኦዳ፤ "ኔኒ ም ቃምባራ መንዳሳ፤ ሽን ኔኒ እያ ግሾ ብራታ ቃምባራ መና። 14 ባብሎነ ካዋ ናቡካዳናፆራስ ሃረታና መላ ታኒ ሀ ካዎተታ ኡባ ጋናን ብራታ ቃምባራ ዎና፤ ኤንትካ እያዉ ሃረታና። ታኒ ሀር አቶሽን፥ ባዞ ዶአትካ እያዉ ሃረታና መላ ኦና" ያጌስ ኡባፈ ዎልቃማ ጎዳይ፥ እስራኤለ ፆሳይ።

15 ሄሳፈ ጉየ፥ ናበይ ኤርምያስ፥ ናብያ ሀናናኮ ሀይሳዳ ያግስ፦ "ሀናንያ፥ ስአ! ጎዳይ ነና ኪትቤና፤ ሽን ኔኒ ሀ አሳይ ዎርዶባን አማነታና መላ ኦዳሳ። 16 ሄሳ ግሾ፥ ጎዳይ፥ ‘ታ ነና ሳአ ቦላፈ ድጋና። ኔኒ ሀ አሳይ ታ ቦላ ማካላና መላ ኦዳ ግሾ ነ ሀ ላይ ሀይቃና’ " ያግስ።

17 ሄ ላይ ላፑን አጌናን ናበይ ሀናን ሀይቅስ።