ኤርምያሳ ማፃፋ 49

አሞነስ ኦደትዳ ትንብተ

1 አሞነባ ጎዳይ ሀይሳዳ ያጌስ፤ "እስራኤለስ አደ ናእ ባዌ? እያ ላተይ ባዌ? ያትን፥ ሞሎካ ጌተትያ ኤቃ ፆሳ ጎይንያ አሳት ጋደ ቢታ አይስ ኦይክዶና? ኤንታ ካታማን አይስ ኡትዶና? 2 አሞነ ቢታን ራባ ካታማ ቦላ ኦላ ዋሶይ ስኤታና መላ ታ ኦና ዎደይ ያና። ሄ ካታማይ ላለትድ ባይሳ ግዳና። እያ ዩሹዋን ደእያ ጉታት ታማን ፁገታና። እስራኤለይ ባና ባ ቢታፈ ጎድዳይሳታ ጎዳና" ያጌስ ጎዳይ።

3 "ሀሰቦና አሳዉ፥ ጋየ ካታማይ ላለትዳ ግሾ ዘሌልተ። ራባ አሳዉ፥ ዬክተ፤ ካዮ ማኦ ማእድ ካዮትተ፤ ካታማ ግምብያ ግዶን ዎፀረትተ። ህንተ ፆሳይ ሞሎክ ባ ካህነታራነ ባ ሀላቃታራ ድኤትስ። 4 አማኖይ ባይና አሳዉ፥ ‘ኑና ኦላናይ ኦኔ?’ ያግድ ህንተ ዱረተንነ ህንተ አራዳ ዛንጋራታን አይስ ጬቀተቲ? 5 ታ ነ ዩሹዋን ደኤይሳት ነና ዳጋንና መላ ኦና" ያጌስ ጎዳይ፥ ኡባፈ ዎልቃማ ፆሳይ። ህንተ ኡባይ ከይድ ባቃታና ግሾ ባቃትድ ብዳይሳታ ሺሽያ አስ ያና።

6 "ግዶሽን፥ ዉርሰን ታ አሞነ አሳ ዛራዳ ኦራና" ያጌስ ጎዳይ።

ኤዶመስ ኦደትዳ ትንብተ

7 ኤዶመባ ኡባፈ ዎልቃማ ጎዳይ ሀይሳዳ ያጌስ፤ "ተማና አሳስ ደእያ ጭንጫተይ አዉ ብዴ? ዞረይሳታፐ ዞረይ ይዴ? ኤንታ ጭንጫተይ ኤንታፈ ኤከትዴ? 8 ታኒ ኤሳዌ ኮቻ ሴርያ ዎደ እያ ቦላ ዮ ኤሀና ግሾ፥ ዳዳነን ደኤይሳቶ፥ ባቃትድ አፎን ቆሰትተ። 9 ዎይነ ማፀይሳት ፖሽለ አሾኮና? ካይሶት ቃማ ገልኮ፥ ባንታዉ ኮያባ ፃላላ ኤኮኮና? 10 ሽን ታ ኤሳዋ ኮቻ ቃራዳ ካሎ አሻና፤ ኤንቲ ቆሰታናዉ ዳንዳኦና መላ፥ ኤንቲ ቆሰትያ በሳ ቃራዳ ቆንጨ በሲ ኦና። ኤሳዌ ሼሻይ፥ እያ ዳቦትነ እያ ሾሮት ኡባይ ያና፤ ኤንታፈ እሶይካ አተና። 11 ህንተ ግዶን ደእያ ይኦ ናይታ አጋግተ፤ ኤንታ ታ ድቻና። ህንተ አምኤትካ ታናን አማነቶ" ያጌስ።

12 ጎዳይ ሀይሳዳ ያጌስ፤ "ህዛ ሴራ ኤካናዉ በሶና አሳስ ሴረተ አቶናባ ግድኮ፥ ህንተ ዋንድ ሴረቶና አታኔ? ቱማ ህንተካ ሴራ ፁአፐ ኡዬታፐ አትሽን፥ ጮ አተከታ። 13 ባሶራ ካታማይ ባይሳ ግድድ አታና፤ እያ በእዳ አሳ ኡባስ ዳጋማስ፥ ቀልቅሰስነ ባደስ አታና። እያ ዩሹዋን ደእያ ጉታ ኡባይ መርናዉ ላለትድ አታና። ሀይሳ ታኒ ታ ሱንን ጫቃይስ" ያጌስ ጎዳይ።

14 ታኒ ጎዳፐ ይዳ እስ ኪታ ስአስ። ካዎተታ ግዶ ኪተትዳይስ፥ "ኤዶመ ተቃናዉ ሺቅተ፤ እያራ ኦለታናዉ ደንድተ" ያግስ።

15 "ህዛ፥ ታ ነና ካዎተታ ግዶን ጉና፤ አሳ ግዶን ካትዳ አስ ኦና። 16 ሹቻ ቆጶንነ ደረ ቦላ ደኤይሶ፥ ነ ዳጋንይነ ነ ኦቶሮይ ነና ጭምስ። ነ ኬ አርጋንዳ ቃን ኬፅኮካ፥ ታ ነና ያፐ ዱገ ዎሳና" ያጌስ ጎዳይ።

17 "ኤዶመይ አሰ ዳጋንያ ቢታ ግዳና። ያራ አያ አሳ ኡባይ እያ ዩዋ በእድ፥ ዳጋማና፤ ማላለታና። 18 ሶዶመይነ ጋሞር ባንታ ዩሹዋን ደእያ ካታማታራ ይያ ዎደ ሀንዳይሳዳ ኦንካ ያን ዴና፤ አስ ያን ኡተና" ያጌስ ጎዳይ።

19 "ዮርዳኖሰ ሻፋ ላንቀን ደእያ ዎራፐ ዶርሳት ሄመትያ ሎኦ ቆሮይ ደእያ በሳ፥ ቆፖና ከይያ ጋሞዳ፥ ታ ኤዶመ አሳታ ቆፖና ኤንታ ቢታፈ የደና። ታ ዶርዳ አስ እያ ቦላ ሹማና። ታ መል ኦኔ? ታ ኦና ግዳባ ተቃናዉ ዳንዳኤይ ኦኔ? ታራ ኤቀታናዉ ዳንዳእያ ሄንንቾይ ኦኔ?

20 "ታ ኤዶመ ቦላነ ተማና ካታማ ቦላ ኦናዉ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳይ ዳጋማና። 21 ኤዶመ ኩንደ ግርሳይ ቢታ ቃና፤ ኤዶመታ ዋሶይ ዞኦ አባ ጋካናዉ ስኤታና። 22 አርጋን ባ ቀፍያ ምጭድ ዱገ ፓልድ የይሳዳ፥ ሞርከይ ባሶራ ቦላ ያና። ሄ ዎደ ኤዶመ ኦላንቾት እቀ ኦይክዳ ማጫሳዳ ህርጋና" ያጌስ።

ዳማስቆስ ኦደትዳ ትንብተ

23 ዳማስቆባ ጎዳይ ሀይሳዳ ያጌስ፤ "ኢታ ኦዳ ስእዳ ግሾ፥ ሀማታነ አርፋዳ ካታማታን ደእያ አሳይ ዬላትስ፤ ያይስ። ዙለይ ሾጭዳ አባዳ ኤንታ ዎዛናይ ሸምፖ ደማናዉ ዳንዳእቤና። 24 ዳማስቆይ ዳቡርስ፤ ኤንቲ ዳጋማን ኮኮርድ ባቃትዶሶና፤ ማጫስ እቀ ኦይከይሳዳ መቶይነ ኡንእ ኤንታ ኦይክስ። 25 ኡፋይስ ኩምዳ ኤረትዳ ካታማይ ዋንድ ባይሳ ግድዴ? 26 ሄ ዎደ ሄ ካታማን ደእያ ያላጋ አደት ካታማ ግዶ ኦገታን ሀይቃና፤ ኦላንቾት ኡባይ ዉራና። 27 ታኒ ዳማስቆ ካታማ ድርሳ ግምብያን ታማ የዳና፤ ሄ ታማይ ዎልደ-አዳራ ሚፃ ማና" ያጌስ ኡባፈ ዎልቃማ ጎዳይ።

ቀዳረስነ ሀፆራስ ኦደትዳ ትንብተ

28 ባብሎነ ካዎይ ናቡካዳናፆር ኦልድ ፆንዳ ቀዳረነ ሀፆራ ካዎተታባ ጎዳይ ሀይሳዳ ያጌስ፤ "ደንድድ፥ ቀዳረ አሳ ኦልተ፤ ዶሎሀ ባጋራ ደእያ አሳ ዉርስተ። 29 ኤንታ ዱንካነታነ ኤንታ ዉደታ ኤክተ። ኤንታ ገሸታ፥ ኤንታ ሻሉዋነ ኤንታ ግማለታ ኤክተ። ያትድ ኤንታዉ፥ ‘ህንተ ዩሹዋን ዳጋም ደኤስ’ ያግድ ኦድተ። 30 ሀፆራን ደኤይሳቶ፥ ባብሎነ ካዎይ ናቡካዳናፆር ህንተ ቦላ ኢታባ ኦናዉ ማቀትድ ኡትዳ ግሾ፥ ባቃትተ፤ አፎን ቆሰትተ" ያጌስ ጎዳይ።

31 "ደንዳዳ፤ ህርግ ባይና ሳሮ ደእያ ካዎተታ ኦላ። ኤንታ ካታማ ግምብያስ እብ ዎይኮ ኮበይ ባዋ፤ ኤንቲ ባንታርካ ደኦሶና።

32 "ኤንታ ግማለት ቦንቀታና፤ ኤንታ ዉደይ ድኤታና። ባንታ ሁጵያ ጋፃ ሜደይሳታ ጫርኮን ላላና፤ ታ ኡባ በሳራ ኤንታ ቦላ ዮ ኤሀና። 33 ሀፆር መርናዉ ዎርካናት ደእያ መላ ቢታ ግዳና። ኦንካ ያን ዴና፤ አስ ያን ኡተና" ያጌስ ጎዳይ።

ኤላማስ ኦደትዳ ትንብተ

34 ይሁዳ ካዎይ ሰደቅያስ ኮይሮ ካዎትዳ ዎደ፥ ኤላማባ ጎዳፐ ኤርምያሳኮ ይዳ ቃላይ ሀይሳ፤ 35 ኡባፈ ዎልቃማ ጎዳይ ሀይሳዳ ያጌስ፤ "ኤላማስ ዎልቃ ግድዳ ዶንገ ዱክያ አሳታ ታ ዎና። 36 ኡባ በሳራ ታ ኤላማ ቦላ ጫርኮ ኤሀና፤ ኤንታ ሄ ጫርኩዋን ላላና። ሄሳ ግሾ፥ ኤላማ አሳይ ላለትድ ጋኮና ቢት ዴና። 37 ኤንታ ሞርከታ ስንንነ ኤንታ ዎናዉ ኮየይሳታ ስንን ታ ኤላማ ዳጋንና። ታ ግታ ሀንቁዋን ኤንታ ቦላ ዮ ኤሀና። ታ ኤንታ ይሳና ጋካናዉ ማሻን የደና። 38 ታኒ ኤላማ ካዋነ ኤንታ ሀላቃታ ይሳዳ ታ አራታ ያን ዎና። 39 ግዶሽን፥ ዉርሰ ዎደ ታኒ ኤላማ ዛራዳ ኦራና" ያጌስ ጎዳይ።