ኤርምያሳ ማፃፋ 11

ናገትቦና ጫቁዋ

1 ጎዳፐ ኤርምያሳኮ ይዳ ቃላይ ሀይሳ፦ 2 "ሀ ጫቆ ቃላ ስአዳ ይሁዳ አሳስነ የሩሳላመ ካታማን ደእያ አሳስ ኦዳ። 3 ጎዳይ እስራኤለ ፆሳይ ሀይሳዳ ያጌስ ጋዳ ኦዳ። ‘ሀ ጫቁዋ ናጎና አስ ኦንካ ባደትዳይሳ ግዶ’። 4 ታኒ ካሰ ህንተ አዋታ ግብፀ ቢታፈ፥ ብራታ ሴርስያ ጮጭያፐ ከስያ ዎደ፥ ‘ታዉ ኪተትተ፤ ታ ህንተና ኪትያባ ኡባ ኦተ። ህንተ ታ አሰ ግዳና፤ ታካ ህንተ ፆሰ ግዳና’ ያጋዳ ኦዳስ። 5 ሄሳዳካ፥ ማነ ኤስ ጎግያ ቢታ ካሰ ህንተ አዋታስ እማናዉ፥ ታኒ ጫቅዳ ጫቁዋ ፖላና።"

ታኒ፥ "ኤሮ፥ ጎዳዉ፥ አምንእ" ያጋስ።

6 ጎዳይ ታኮ፥ "ሀ ቃላታ ኡባ ይሁዳ ካታማታንነ የሩሳላመ ኦገታን ሀይሳዳ ያጋዳ አዋጃ፦ ‘ሀ ጫቆ ቃላ ስእተ፤ እያ ካልተ። 7 ካሰ ህንተ አዋታ ታ ግብፀ ቢታፈ ከስዳ ዎድያፐ ሀች ጋካናዉ፥ ዛራ ዛራዳ፥ "ታዉ ኪተትተ" ጋዳ ሴራስ። 8 ሽን ኤንቲ ታ ቃላ ስእቦኮና ዎይኮ ታዉ ኪተትቦኮና። ኤንቲ ባንታ ኢታ ዎዛና ካልዶሶና። ታ ጫቆ ቃላ ኤንቲ ናጋና መላ ኪታስ፤ ሽን ኤንቲ እፅዶሶና። ሄሳ ግሾ፥ ሄ ጫቁዋ ባደ ኡባ ኤንታ ቦላ ኤሀስ’ " ያግስ።

9 ዛርድካ ጎዳይ ታኮ ሀይሳዳ ያግስ፦ "ይሁዳ አሳይነ የሩሳላመን ደእያ አሳይ ታ ቦላ ማቀትዶሶና። 10 ኤንቲ ካሰ ታ ቃላ ስኦና እፅዳ ባንታ ማይዛታ ናጋራኮ ጉየ ስምዶሶና። ኤንቲ ሀራ ፆሳታ ጎይንዶሶና፤ ኤንታዉ ኦዶሶና። እስራኤለ አሳይነ ይሁዳ አሳይ ታ ካሰ ኤንታ ማይዛታራ ጫቅዳ ጫቁዋ መንዶሶና። 11 ሄሳ ግሾ፥ ‘ኤንቲ ባቃትድ አታናዉ ዳንዳኦና መቱዋ ኤንታ ቦላ ኤሀና። ኤንቲ ታኮ ዋስንካ ታ ኤንታ ስእከ። 12 ሄ ዎደ ይሁዳ አሳይነ የሩሳላመ አሳይ፥ እፃነ ጩይስያ ባንታ ፆሳታኮ ዋሳና። ሽን መቶ ዎደ ሄ ፆሳት ኤንታ ማዶኮና። 13 ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ። ቃስ ባኣለ ጌተትያ ዬላያ ፆሳስ እፃነ ጩይሳናዉ ህንተ ጊግስያ ያርሾ በሳት የሩሳላመ ኦገታ መላ ዳሮ’ ያጌስ ጎዳይ።

14 "ኤርምያሳ፥ ሀ አሳስ ታና አይኮካ ዎሶፋ፤ ኤንታ ግሾ ጋናቶፓ ዎይኮ ኦይቾፋ። ኤንቲ ባንታ መቱዋ ጋላስ ታና ፄግያ ዎደ ታ ኤንታ ስእከ።

15 "ዳሮ አሳራ ባ ኢታ ማቁዋ ማቀታሸ፥ ታ ዶስያ ታ አሳይ፥ ታ ኬን በንታናዉ በሲ? ህንተ ህንተ ኢታ ኦሱዋ ኦሽን፥ ያርሸትዳ መህያ አሾይ ህንተና ሴራፐ አሻኔ? ሄሳ ግድያኮ ህንተ ኡፋይታናሽን" ያግስ።

16 ጎዳይ ነና፥ ድጭያ፥ ሎኦ አይፈ አይፍያ ሻማሆ ያግድ ሱንስ። ሽን፥ እ ሄ ሻማሁዋ ዎልቃማ ዳዳ ጉንን፥ ታማን ፁጋና፤ እያ ታሸይካ መቃና።

17 ታኒ፥ ህንተና ቶክዳ ኡባፈ ዎልቃማ ጎዳይ፥ ህንተ ቦላ ኢታባ ኤሀናዉ አዋጃስ። እስራኤለ አሳይነ ይሁዳ አሳይ ባኣለስ እፃነ ጩይስድ ታና ይሎይዶሶና።

ኤርምያሳ ቦላ ማቀትዳ ማቁዋ

18 ጎዳይ ኤንታ ማቁዋ ታዉ ቆንጭስዳ ግሾ ታ ኤራስ። ሄ ዎደ ኤንቲ ኦያ ኢታ ኦሱዋ ታና በስስ። 19 ታኒ ሹካስ ጊግዳ ዶርሳዳ ሀናስ። ኤንቲ፥ "አነ ምነ እያ አይፍያ ይሶስ። እያ ሱንይ ሀሳየቶና መላ እያ ፓፃ ደኤይሳታ ግዶፈ ሾድድ ድጎስ" ያግድ ማቀትዳይሳ ታ ኤራብከ። 20 ሽን አቤት ኡባፈ ዎልቃማ ጎዳዉ፥ ፅሎ ፕርደይሶ፥ አሳ ዎዛናነ ቆፋ ሻካዳ ኤረይሶ፥ ነ ኤንታ ቦላ ነ ሃሉዋ ከያዳ ታና በሳ። ታኒ ታ ቆሁዋ ነና በሳስ።

21 ሄሳ ግሾ፥ "ጎዳ ሱንን ትንብተ ኦዶፓ ኢኮ ነ ኑ ኮሸን ሃይቃና" ያግድ፥ ነና ዎናው ኮይያ አናቶታ አሳባ ጎዳይ ሀይሳዳ ያጌስ። 22 ኡባፈ ዎልቃማ ጎዳይ ሀይሳዳ ያጌስ፦ "ታ ኤንታ ሴራና፤ ኤንታ ፓንት ማሻን ሀይቃና፤ ኤንታ ማጫ ናይትነ አደ ናይት ኮሻን ሀይቃና፤ 23 ኤንታፈ እሶይነ አተና። አይስ ጊኮ፥ ታኒ ሴርያ ላይ አናቶታ አሳ ቦላ ኢታባ ኤሀና" ያጌስ።