1 "ታኒ ቱማ ዎይነ ኡባ። ጎሻንቾይ ታ አዋ። 2 እ፥ ታ ቦላ ደእያ አይፈ አይፎና ታሽያ ኡባ ካሬስ። አይፍያ ታሽያ ካሰፐ አድ አይፋና መላ ሄ ታሽያ እ ጊግሳና። 3 ታኒ ህንተዉ ኦድዳ ቃላ ግሾ ህንተ ጌሽ። 4 ታናን ደእተ፤ ታንካ ህንተናን ደአና። ዎይነ ታሸይ ኡባራ ዶና እፅኮ ሄ ታሸይ ባርካ አይፈ አይፋናዉ ዳንዳኤና። ሄሳዳካ፥ ህንተካ ታናን ደኦና እፅኮ አይፈ አይፋናዉ ዳንዳኤከታ።

5 "ታኒ ዎይነ ኡባ፤ ህንተ ታሸታ። ታናን ደኤይስነ ታኒ እያን ደኤይስ፥ እ ዳሮ አይፈ አይፋና። ታ ባይና ህንተ ፃላላ አይኮካ ኦናዉ ዳንዳኤከታ። ዎይነ ምነ እያ አይፍያ 6 ታናን ዶና ኡራይ ታሽያዳ ካረን የግትድ መላና። ሄሳ መላ ታሸት ሺቅድ ታማን የገታና፥ ፁገታና። 7 ህንተ ታናን ደእኮ፥ ታ ቃላይካ ህንተናን ደእኮ፥ ህንተ ኮይያባይ አይባ ግድኮካ ዎስተ፤ ህንተ ኤካና። 8 ህንተ ዳሮ አይፈ አይፍያ ታ ታማረ ግድኮ፥ ሄሳን ታ አዋይ ቦንቸታና። 9 አዋይ ታና ዶሰይሳዳ ታንካ ህንተና ዶሳይስ፤ ታ ሲቁዋን ደእተ። 10 ታኒ ታ አዋ ኪታ ናጋዳ እያ ሲቁዋን ደእዳይሳዳ ህንተካ ታ ኪታ ናግኮ ታ ሲቁዋን ዳና።

11 "ታ ኡፋይሳይ ህንተናን ግዳና መላነ ህንተ ኡፋይሳይ ፖሎ ግዳና መላ ታኒ ህንተዉ ሄሳ ኦዳስ። 12 ታ ኪታይ ሀይሳ፤ ታኒ ህንተና ዶስዳይሳዳ ህንተካ እሶይ እሱዋ ዶስተ።✝ 13 ባ ሸምፑዋ ባ ላግያስ አድ እመይሳፈ አያ ግታ ሲቆይ ባዋ። 14 ታኒ ህንተና ኪትዳባ ኡባ ኦኮ ህንተ ዶሰትዳይሳታ።

15 "አይለይ ባ ጎዳይ ኦያባ ኤሮና ግሾ ታኒ ህንተና ህዛፐ ጉየ አይለታ ጊከ። ሽን ታ አዋፐ ስእዳ ኡባ ታኒ ህንተዉ ኦድዳ ግሾ ህንተና ዶሰትዳይሳታ ጋስ። 16 ታኒ ህንተና ዶራስፐ አትሽን፥ ህንተ ታና ዶርበከታ። ህንተ ብድ ዮና አይፈ አይፋና መላ ታኒ ህንተና ሹማስ። ያንኮ፥ ታ አዋይ ህንተ ታ ሱንን ዎስዳባ ኡባ እማና። 17 ታ ኪታይ ሀይሳ፦ እሶይ እሱዋ ዶስተ።

18 "አላመይ ህንተና እፅኮ ኮይሮትድ ታና እፅዳይሳ አኬክተ። 19 ህንተ አላምያባ ግድያኮ አላመይ ህንተና ዶሳና። ሽን ታኒ ህንተና አላመፐ ዶርዳ ግሾነ ህንተ አላምያባ ግዶና ግሾ አላመይ ህንተና እፄስ። 20 ‘አይለይ ባ ጎዳፐ አና’ ጋዳ ታኒ ህንተዉ ኦድዳይሳ አኬክተ። ኤንቲ ታና ጎድዳባ ግድኮ ህንተናካ ጎዳና። ኤንቲ ታ ቃላ ናግዳባ ግድኮ ህንተ ቃላካ ናጋና።✝ 21 ሽን ኤንቲ ታና ኪትዳይሳ ኤሮና ግሾ ሀ ኡባ ታ ጋሶን ህንተ ቦላ ኦና። 22 ታኒ ያዳ ኤንታዉ ኦዶናባ ግድያኮ ናጋራ ግደና። ሽን ሀእ ኤንቲ ኦዳ ናጋራስ ጋሶያባይ ባዋ። 23 ታና እፀይስ ታ አዋካ እፄስ። 24 ኦንካ ኦቦና ኦሶ ታ ኤንታ ግዶን ኦቦናባ ግድያኮ ኤንታዉ ናጋራ ግዶና አታና። ሽን ሀእ ኤንቲ ታኒ ኦዳ ኦሱዋ በእድ ታናካ ታ አዋካ እፅዶሶና። 25 ሽን ኤንታ ህግያን፥ ‘ታና ጮ እፅዶሶና’ ጌተትድ ፃፈትዳይስ ፖለታና መላ ሄስ ሀንስ።✝

26 "አዋፐ ያ ቱማ ቆንጭስያ አያና ታ ህንተዉ ኪታና። እ ህንተና ምንና፥ ታባ ማርካታና። 27 ህንተካ ኮይሮፐ ዶምድ ታራ ደእያ ግሾ ታባ ማርካታና።