1 አቤት ጎዳዉ፥ ኑና ጋክዳባ ኡባ ቆፓ፤

ኑ ካዉሻተ በአ!

2 ኑ ላታይ አላጋታስ፥

ኑ ኬይካ እማ አሳስ እመትስ።

3 ኑኒ አው ሀይቅዳ ናአ ግድዳ፤

ኑ አየትካ አምኦ ግድዶሶና።

4 ኑኒ ኡሻ ሃ ሻምድ ኤኮስ፤

ኤያ ምስ ጋተ ቃንፆስ።

5 ኑና የደይሳት ኑ ግንድያ ጋርሳና፤

ኑ ዳቡርዳ ሽን ሸምፓናዉ ዳንዳእቦኮ።

6 ኑኒ ካ ካላና ግድ፥

ግብፀታስነ አሶረታስ ኩሸ እምዳ።

7 ናጋራ ኦዳይ ኑ ማይዛታ፥

ሽን ኤንቲ ሀእ ዶኮና፤

ኤንቲ ኤካናዉ በሲያ ሴራ ኤክዳይ ኑና።

8 ኑና አይለት ሃሮሶና፤

ኤንታ ኩሸፐ ኑና አሽያ ኦንካ ባዋ።

9 ማሻን ዎይሳት ባዞን ደእያ ግሾ፥

ኑ ሸምፑዋ ባይዝድ ካ ደምዳ።

10 ኢታ ኮሻ ጋሶን፥

ኑ ጎጋይ ታማ ጮጨዳ ምቼስ።

11 ማጫሳታ ፅዮነን

ጌላኦታ ይሁዳ ካታማታን

ዎልቃን ኦይክድ ቱንስዶሶና።

12 ሀላቃታ ኤፍድ ካቅዶሶና፤

ጭማት ቦንቸትቦኮና።

13 ያላጋ አደት ዎፃን ጋጭዶሶና፤

አደ ናይት ዴፆ ም ቶክድ ጋንድጋርዶሶና።

14 ጭማት ካታማ ፐንገን ፕርዳናዉ ኡተይሳ አግዶሶና፤

ያላጋ አደት ናይት የ ዶግዶሶና።

15 ኑ ዎዛናፐ ኡፋይስ ክችስ፤

ኑ ዱርሳይ ዬሆን ላመትስ።

16 ኑ ሁጵያፐ ካላቻይ ኩንድስ፤

ኑ ናጋራ ኦዳ ግሾ ኑና አየ!

17 ሄሳ ግሾ፥ ኑ ዎዛናይ ዳቡርስ፤

ኑ አይፈይ ተልጁምስ።

18 ፅዮነ ደረይ ባይሳ ግድዳ ግሾ፥

ዎርካናት ያን ጉፖሶና።

19 አቤት ጎዳዉ፥ ነ መርናዉ ሃራሳ፤

ነ አራታይ የለታፐ የለታ ጋካናሳ።

20 ኔኒ ኑና አይስ ኡባ ዎደ ዶጋይ?

ሀይሳ መላ አዱሳ ዎደ ኑና አይስ አጋይ?

21 አቤት ጎዳዉ፥ ኑና ኔኮ ዛራ፤ ኑ ስማና፤

ኑ ዎድያ በንይሳ ዛራዳ ኦራ።

22 ኔኒ ኑና ፖሎ አጋድዬ?

ነ ሀንቁዋስ ዛው ባወዬ?