ፓን
1 ታ ሲቀ፥ ኔኒ ዋና ሎአይ!
ኔኒ ዋንዳ የገልሰ!
ነ አይፈት ጉሉን ግዶራ በእያ ዎደ፥
ሆለዳ ሎኦሶና።
ነ ብናናይ ጋላዳ ዙማፐ
ዎያ ዴሻ ዉደ ዳኔስ።
2 ነ አቻይ ሜደትድ ሃን ሜጨትዳ፥
ኡባይ መንተ የልያ፥
ኤንታ ግዶን አዉጫየይ ባይና ዶርሳ ዉደ መላ።
3 ነ መተርሻይ ዞኦ ቃጭና ዳኔስ፤
ነ ሃሳያ ዎደ ዳሮ ኡፋይሶሶና።
ነ ናምኡ ሻካላይ ጉሉን ግዶራ ፄልያ ዎደ፥
ናምአ ከስድ ጳልቅዳ ኦሮማነ ዳኖሶና።
4 ነ ቆይ ሎይ ኦዳ፥
እያ ቦላ ኦላንቾታ ጎንዳለይ ደእያ፥
ሙኩሉ ምኖ ኦላንቾታ ጎንዳለይ ካቀትዳ፥
ዳዊታ አዱሳ ግምብያ ዳኔስ።
5 ነ ናምኡ ንት መንተ የለትዳ፥
ሎኦ ጪሻታ ግዶን
ምያ ዎሽኤ ማራታ ዳኖሶና።
6 ሳእ ጌያናፐ ስን፥
ማይ ክቻናፐ ስን፥
ካርበ ደርያነ እፃነ ዙማ ባዳ ሸምፓና።
7 ታ ሲቀ፥ ነ አሳተይ ኩመ ሎኦ፤
ነናን ቦረትያባይ ባዋ።
8 ታ ሙሹራተ፥ ልባኖሰፐ ሃያ፤
ጋሞይ ፔእያ፥ ማሄይ አቅያ፥
አማና ዙማፐ፥ ሳንራ ሊጰፐ
አርሞና ሁጵያፐ ዎ።
9 ታ ሲቀ፥ ምቾ ግድዳ ታ ሙሹራተ፤
ነ አይፍያ ፄሎይነ ነ ቆያ አሌቆይ፥
ታ ዎዛና ኡፋይሳን ጎሽስ።
10 ታ ሲቆ ምቾ ግድዳ ታ ሙሹራተ!
ነ ሲቆይ ታና ዋን ኡፋይስ!
ነ ሲቆይ ዎይነ ኡሻፈ አድ ኡፋይሴስ፤
ነ ሽቶይ ኡባፈ አድ ሳዌስ።
11 ታ ሙሹራተ፥ ነ መተርሻፈ እልሎ ኤስ ፆኬስ፤
ነ ዶናፐ ኤስነ ማ ፑልቴስ፤
ነ ማኦይ ልባኖሰ ሽቶዳ ሳዌስ።
12 ታ ሲቆ ምቾ ግድዳ ታ ሙሹራተ፥
ነ ዩሾይ ድረትድ ናገትያ አታክልተ በሳ መላ፤
ነ ሀራታስ ጎርደትዳ፥ ታዉ ዶየትዳ ፑልቶ መላ።
13 ኔኒ አታክልተ ግዶን፥
ኦሮማነይ፥ ዶረትዳ አታክልተ አይፈት፥
ናርዶሰ ጌተትያ አይፈት ደእያ በሳ መላ።
14 ናርዶሰይ፥ ላደይ፥ ሳውያ ማት፥ ቃራፍን፥
እፃናዳ ሳውያባት ደኦሶና።
ካርበይ፥ ጎዳረ ኡ ጪሽነ
ዱማ ዱማ ቅማመ አታክልተት ዶሎሶና።
15 ኔኒ አታክልተ በሳ ኡሽያ ፑልቶ መላ፤
ደኦ ሃ በንትያ ኦላ መላ፤
ልባኖሰ ዙማፐ ጎግያ ሻፋ መላ።
ጌላእዉ
16 ፑደሀ ባጋ ጫርኩዋዉ፥ ደንዳ!
ዱገሀ ባጋ ጫርኩዋዉ፥ ሃያ!
ታ አታክልትያ ቦላ ጫርካ!
እያ ሳዎይ ቶንኩ ጎ።
ታ ሲቆይ ባ አታክልትያ ግዶ ዮ፤
ዳሮ ማልእያ አይፈታ ሞ።