1 ማዝሙረ ኡባፈ አያ ሶሎሞነ ማዝሙረይ ሀይሳ።
ጌላእዉ
2 ነ ሲቆይ ዎይነፐ አድ ኡፋይስያ ግሾ
ታና ዛራ ዛራ ዬራ።
3 ነ ትየትያ ሽቶይ ዋንድ ሳዊ!
ነ ሱንይ ጎግያ ሽቶ መላ፤
ጌላኦት ነና ሲቀይ ሄሳሳ።
4 ታና ኔራ ኤካዳ ባ፤ አነ እስፈ ዎፆስ!
ካዋዉ፥ ታና ነ ቁሩፁዋን ገልሳ።
የሩሳላመ ማጫሳታ
ነናን ኑ ኡፋይቶስ፤
ነ ሲቁዋ ዎይነ ኡሻፈ አድ ናሾስ።
ማጫስ ኡባይ ነና ሲቀይሳ በሳ።
ጌላእዉ
5 ህንተኖ፥ የሩሳላመ ማጫሳቶ ስእተ፤
ታኒ ካሬ ግድኮካ ማላ ሎኦ።
ታ ካሬተይ ቀዳረ ዱንካነ መላ፤
ሽን ታ ማላይ ሶሎሞነ ማጋራጆታ መላ።
6 ታ ማላ ካሬዳይ አዋ፤
ታኒ ካሬ ግድዳ ግሾ ታና ቦሮፕተ።
ታ እሻት፥ ታ አየ ናይት ታራ ኦየትድ፥
ታና ዎይነ ጋደ ናግስዶሶና፤
ሄሳ ግሾ ታ ዎይንያ ናጋብከ።
7 ታ ሲቁዋዉ፥ አነ ታዉ ኦዳ፤
ነ ዶርሳ ዉድያ አዉን ሄማይ?
ሴታ ጋላስ ኤንታ አዉን ሸምፕሳይ?
ነና ደማናዉ ነ ላገታ ዉድያ ካላዳ፥
አይስ ጉሉንታዳ ብያ ማጫስ ግዶ?
ፓን
8 ማጫሳ ኡባፈ ሎእያረ፥
በሳ ኤሮና እፅኮ ዶርሳታ ጌዶ ካላ።
ነ ዴሻ ማራታ ሄንንቾታ
ዱንካንያ ማታን ሄማ።
9 ታ ሲቀ! ግብፀ ካዎ ፓራ ጋረታ ጎችያ፥
ፓራታ ግዶን ደእያ ማጋየዳ ሎኣሳ።
10 ነ ሀይን ደእያ አሌቁዋራ ሺቅድ፥
ነ ሻካላይ ዋንድ ሎእ!
ነ ቆይ አልኦ ሹቻን አሌቀትስ።
11 ኑኒ ነዉ ብራን ጫደትዳ፥
ዎርቃ አሌቁዋ ኦስሳና።
ጌላእዉ
12 ካዎይ ጋይታ ቦላ ኡትዳሽን፥
ታ ሽቱዋ ሳዎይ ኬን ቶንኩ ግስ።
13 ታ ሲቆይ ታ ንታ ግዶን ደእያ፥
ፁንተትዳ ሳውያ ካርበ ዳኔስ።
14 ታ ሲቆይ፥ ኤንጋዳ ዎይነ ጋደን፥
ዶልዳ ሄና ጪሻ መላ።
ፓን
15 ታ ሲቀ፥ ኔኒ ዋና ሎአይ!
ኔኒ ዋና ሎአይ!
ነ አይፈት ሆለ አይፈዳ ሎኦሶና።
ጌላእዉ
16 ታ ሲቁዋዉ፥ ኔኒ ዋና ሎአይ!
አይባ ኡፋይሳይ፤
ኑ አርሳይ ጭልኦ ማታ መላ ኡፋይሴስ።
17 ኑ ኬ ቱሳይ ዝጋ፤
ኑ ካራይ ፂዳን ኦይከትስ።