ፓን
1 ታ ምቸ፥ ታ ሙሹራተ፥
ታኒ ታ አታክልትያ ግዶ ገላስ።
ታ ካርብያነ ታ ሽቶ ጪሻ ቆራስ፤
ታኒ ኤሳ ኡይ ማስ፤
ታ ዎይንያነ ታ ማ ኡያስ።
የሩሳላመ ጌላኦታ
እያ ላገቶ፥ ሚተ ኡይተ፤
ሲቆ አላና ጋካናዉ ኡይተ።
ጌላእዉ
2 ታኒ ስካስ፤ ሽን ታ ዎዛናይ ባርክስ፤
ታ ሲቆይ ሀይሳዳ ያግድ ፐንግያ ቆንክሽን ስአስ።
"ታ ምቸ፥ ታ ሲቀ፥ ታ የገልሰ፤
ቦረይ ባይና ታ ሆለ፥
ታዉ ፐንግያ ዶያ።
ታ ሁጰይ አካን ላክስ፤
ታ ብናናይ ቃማ ፑሰን እርፅስ።"
3 ታ ማኡዋ ቃራስ፥ ዛራዳ ማኦዬ?
ታ ቶሁዋ ሜጨታስ፥ ዛራዳ ቅታዮዬ?
4 ታ ሲቆይ እብ ፆኤራ ባ ኩሽያ ሶ የድስ፤
ታ ዎዛናይ እያ ግሾ ሴሌስ።
5 ታ ሲቁዋስ ዶያናዉ ደንዳስ፤
ፐንግያ ዶያናዉ ኮብያ ኦይክያ ዎደ፥
ታ ኩሽያፐ ካርበይ፥
ታ ብራያፈ ሽቶይ ፆኬስ።
6 ታ ሲቁዋስ ካርያ ዶያስ፥ ሽን እ ዴና፤
እያ ቃላ ስአናዉ ዳሮ አሞታስ።
ምንዳ ኮያስ፥ ሽን እያ ደማብከ፤
ፄጋስ፥ ሽን ታዉ ኮይቤና።
7 ካታማ ናገይሳት ታና ደምድ፥
ዋዶሶና፤ ማዱንፅስዶሶና።
ካታማ ድርሳ ናገይሳት፥
ታ ላፃና ቃር ኤክዶሶና።
8 ህንተኖ፥ የሩሳላመ ጌላኦቶ፥
ታ ሲቁዋ ደምኮ፥
ታኒ እያ ሲቁዋን ሀርግዳይሳ፥
ሀዳራ እያዉ ኦድተ።
የሩሳላመ ጌላኦታ
9 ነኖ፥ ማጫሳ ኡባፈ ሎእያራ፥
ነ ላገይ ሀራታፐ ዋንድ ዱማቲ?
ኔኒ ኑና ሀዳራ ገይ፥
እ ሀራታፐ አይብን ዱማቲ?
ጌላእዉ
10 ታ ሲቆይ ማላ ሎኦነ አያንታ፤
ታሙ ሙኩሉ አደታ ግዶን እያ መል ባዋ።
11 እያ ሁጰይ አልኦ ዎርቃ ዳኔስ፤
እያ ብናናይ ሎኦነ ቁሮ መላ ካሬ።
12 እያ አይፈይ ሻፋ ማታን ኤቅዳ፥
ማን ሜጨትዳ ሆለታ ዳኔስ።
13 እያ ሻካላይ ሳውያ ቅማመይ ቶከትዳ ማዳበዳ ሎኤስ፤
እያ መተርሻይ ካርበ ሽቶይ ፆክያ ዎራ ጪሻዳ ሎኤስ።
14 እያ ቀሰይ አልኦ ሹቻን አሌቀትዳ ዎርቃ ፃምአዳ ሎኤስ፤
እያ አሳተይ ሳንፓረ አልኦ ሹቻን አሌቀትዳ ዳንጋርሳ ዛለ መላ።
15 እያ ቶሆት ዎርቃ ባሶን ኤቅዳ ሳሎ ሹቻ ቱስ ዳኖሶና፤
እያ ማላይ ዝጋን አሌቀትዳ ልባኖሰ ዙማ መላ።
16 እያ ዶናይ ኤሳዳ ማልኤስ፤
እያ ኩመ አሳተይ ሎኤስ።
ህንተኖ የሩሳላመ ጌላኦቶ፥
ታ ሲቆይነ ታ ላገይ ሀይሳ ዳነስ።