ሶሎሞነ ማዝሙረ ማፃፋ 3

ጌላእዉ

1 ቃማ ኩመ ሂፃን ዝንአዳ፥

ታ ሲቁዋ ደማናዉ አሞታስ፤

ምንዳ ኮያስ፤ ሽን ደማብከ።

2 ካታማ ግዶን ደእያ ዳልጋነ

ፁን ኦገታ ኡባን ዩያስ።

ታ ሲቁዋ ደማናዉ ኮያስ፤

ምንዳ ኮያስ፤ ሽን ደማናዉ ዳንዳአብከ።

3 ካታማ ዩይድ ናገይሳት ታና ደምዶሶና፤

ታኒ፥ "ታ ሲቁዋ በእደቲ?" ያጋዳ ኦይቻስ።

4 ኤንታ አጋዳ አዳ መላ ታ ሲቁዋ ደማስ፤

እ ታፐ ከስ ኤኮናዳ ምንዳ ኦይካስ።

ታ አየ ሶ ኤፋስ፤

ታ የለትዳ ክፍልያ ገልሳስ።

5 ህንተኖ የሩሳላመ ማጫ ናይቶ፥

ሲቆይ ባዉ ዶስድ ደንዳና ጋካናዉ፥

እያ ህንተ ባርክሶና መላ

ታኒ ህንተና ገንኤንነ ዎሽኤን አማታይስ።

የሩሳላመ ጌላኦታ

6 ዛልአንቾ እፃነዳነ ካርበዳ ሳውያራ፥

ጩያ ቱሱ ዳንያራ፥

ሀና መላ ቢታፈ ያራ እያ ኦኔ?

7 ሄኮ፥ ሶሎሞነ ፓራ ጋርያ ያዉሱ፤

ሄ ፓራ ጋርዉ እስራኤለፐ ዶረትዳ፥

ኡሱፑን ታሙ ዎልቃማ ቶራንቾት አጃብዶሶና።

8 ኤንቲ ኡባይ ማሻ ኦይን ሜዘትዶሶና፤

ኦላንካ ፓጨትዶሶና።

ቃማ ጋክያ መቱዋ ተቃናዉ፥

ኤንቲ ማሸ ዳንጭድ ጊግዶሶና።

9 ካዋ ሶሎሞነይ ፓራ ጋረ ግዶን፥

ባዉ ኡትያ አራታ ጊግስስ፤

እያ አራታይ ልባኖሰፐ ይዳ ምን ኦሰትስ።

10 አራታ ቱሳይ ብራን ላንፀትስ፤

ዘምፖይ ዎርቃን አሌቀትስ።

ኦይደይ ኦቻ ቴራ ዳንያ ቃጭናን ካመትስ፤

ጋይ የሩሳላመ ጌላኦታ ሲቆን አሌቀትስ።

ጌላእዉ

11 ህንተኖ፥ ፅዮነ ጌላኦቶ፥

ካዋ ሶሎሞነ በአናዉ ሃይተ።

እ ዳሮ ኡፋይትዳ እያ ያጋኑዋ ጋላስ

እያ አይያ እያ ሁጰን ዎዳ ካላቻ ዎስ።