ጌላእዉ
1 ታኒ ሳሮናን ዶልያ ጪሻነ
ዛንጋራን ዶልያ ሱፈ ጪሻ መላ።
ፓን
2 ታ ሲቅያ ማጫሳ ግዶን በእያ ዎደ፥
አጉን ግዶን በንትያ ሱፈ ጪሻ መላ።
ጌላእዉ
3 ታ ሲቆይ ሀራ ፓንታ ግዶን ፄልያ ዎደ
ዎራን ደእያ አፕለ ም መላ።
ታና ዳሮ ኡፋይስን፥ እያ ኩያ ግዶን ኡታስ፤
እያ አይፈይ ምን ታና ማልኤስ።
4 እ ታና ግብራ ምያ ኬ ገልስስ፤
ባ ሲቁዋ ባንድራዳ ታ ቦላ ቁ ቁ ኦስ። 5 ታኒ እያ ሲቁዋን ኦይከታዳ ሀርግዳ ግሾ፥
ዛብበ አይፈ ሙዝድ ታና ጋሽትስተ፤
አፕለ ሙዝድ ታ ዎልቃ ምንተ።
6 ባ ሀድርሳ ኩሽያ ታና ቦርኮትስስ፤
ባ ኡሻቻ ኩሽያን ታና ቆምስ።
7 ህንተኖ፥ የሩሳላመ ያላጋ ማጫሳዉ፥
ሲቆይ ባዉ ዶስድ ደንዳና ጋካናዉ፥
እያ ህንተ ባርከና መላ፥
ታ ህንተና ገንኤንነ ዎራ ዎሽኤን አማታይስ።
8 ታ ሲቁዋ ግርሳይ ደርያ ቦላራ ጉፕሸነ፥
ዙማ ቦላራ ፆንገትሸ የይስ ስኤቴስ።
9 ታ ሲቆይ ዎሽኤ ዎይኮ ገንኤ ማር ዳኔስ፤
ሄኮ፥ ኑ ኬ ማታን ኤቅስ፤
ማስኮተራ ሶ ፄሌስ፤
ማጋራጁዋ ግዶራ ፄሌስ።
10 ታ ሲቆይ፥ ሀይሳዳ ያጌስ፤
"ታ ሲቀ፥ ደንዳ!
ታ የገልሰ፥ ሃያ፥ እስፈ አነ ቦስ።
11 ሄኮ፥ ባልጎይ አስ፤
እራይካ ኤቅስ።
12 ቢታን ጪሽ ጪይስ፤
የ የፅያ አጌናይ ጋክስ፤
ሆለ የ ኑ ቢታን ስኤትስ።
13 ባላሰ ምይ አይፈ ዶምስ፤
ዎይነይ ጪይስ፤
ጪሻ ሳዎይ ቢታን ቶንኩ ጌስ።
ታ ሲቀ፥ ደንዳ፤ ታ የገልሰ፥
ሃያ፤ አነ እስፈ ቦስ።"
ፓን
14 አፎ ዶናን ዛላ ቆጶን፥
ቆሰትዳ ሆለ ዳንያረ፤
አነ እስ ቶሆ ታና ነ ሶምኡዋ በሳ፤
ነ ግርሳ ስሳ።
ነ ቃላይ ታና ማልኤስ፤
ነ ሶምኦይ ዳሮ ሎኤስ።
የሩሳላመ ጌላኦታ
15 ኑ ዎይነይ ጪይስ፤
ኑ ዎይነ ጋድያ ኢስያ ዎርካናታ፥
ሄ ጉ ቡታለታ ፅሄን ኦይክተ።
ጌላእዉ
16 ታ ሲቆይ ታባ፤ ታንካ እያባ፤
ጪሻታ ግዶን እ ባ ዉድያ ሄሜስ።
17 ሳእ ጌያና ጋካናዉ፥
ኩያይ ያና ጋካናዉ፥
ታ ሲቁዋዉ፥ ገንኤዳ ዎይኮ ዎሽኤ ማራዳ፥
አፎትያ ደርያራ ዎፃሸ ሃ ስማ።