እዝራ ማፃፋ 6

ዳርዮሳ አዋጁዋ

1 ሄሳ ግሾ፥ ካዎይ ዳርዮሳ ኪታን፥ ባብሎነ ደእያ ሚሸ ዎያ ኬን ደእያ ታርከ ማዝጋበታ ኮይዶሶና። 2 ሜዶና አዉራጃን አህማታ ካታማን እስ ፃ ማፃፍ በንትስ፤ ሄ ማፃፋን ፃፈትዳባይ ሀይሳዳ ያጌስ፦

3 "ካዎይ ቅሮስ ባ ካዎትዳ ኮይሮ ላይን፥ የሩሳላመን ደእያ ፆሳ ኬ ግሾ፥ ሀይሳዳ ግያ አዋጆ ከስስ። ፆሳ ኬይ ያርሾ ሺሽያ በሲ ግድድ ዛር ኬፀቶ፤ እያ ባሶይካ የገቶ። ሄ ኬ አዱሳተይ ኡሱፑን ታሙ ዋ፥ ዳልጋተይ ኡሱፑን ታሙ ዋ ግዶ። 4 ሄ ቶሆ ግታ ሹቻን ዩሾ፥ እስ ቶሆ ም ቱሳት ዩዮ። ሄሳስ ኮሽያ ሚሸ ኡባይ ካዎ ሻሎ ምንጅያ ኬፈ እመቶ። 5 ናቡካዳናፆር የሩሳላመን ደእያ ፆሳ ኬፈ ኤክድ፥ ባብሎነ ኤህዳ ፆሳ ኬ ዎርቃነ ብራ ሚሸት ባንታ በሳ ጉየ የሩሳላመ ስሚድ፤ ፆሳ ኬን ደኦ" ያግስ።

6 ሄሳፈ ጉየ፥ ዳርዮስ ፃፍዳ ዳብዳበይ ሀይሳዳ ያጌስ። "ህንተኖ ኤፍራፂሳ ሻፋፐ ሄፍን ቢታ አይስያ ታታናያ፥ ሳታርቦዝንያነ ኤንታራ ኦይሳቶ፥ ሀ ፆሳ ኬኮ ሺቆፕተ። 7 ሀ ፆሳ ኬ ኦሱዋስ በ ግዶፕተ። አይሁደታ ሀላቃትነ አይሁደ ጭማት ፆሳ ኬ ካሰ በሳን ዛሪድ ኬፆ።"

8 ሄሳ ቦላ ቃስ፥ "ሀ አይሁደ ጭማት ፆሳ ኬ ኬፅያ ዎደ፥ ኤንቲ ኦያ ኦሶይ ኤቆና መላ ኤንታዉ ኮሽያ ሚሸ ኡባ ኤፍራፂሳ ሻፋፐ ሄፍን ቢታፈ ሺሽዳ ካዋ ጊራ ሚሽያፐ ኤንታዉ እማና መላ ታኒ ኪታስ። 9 የሩሳላመን ደእያ ካህነት ሳሎ ፆሳስ ፁሳ ያርሾ ያርሻናዉ ኮሽያ ዎፋኖ ግድን፥ ማራዘ ግድን ዎይኮ ዶርሳ ኡርገ ግድን ኤንታዉ እምተ። ቃስ አይባካ ፓጭሶና ኤንቲ ኮይያ ግስተ፥ ማፅነ፥ ዎይነነ ዛይተ ኤንታዉ ጋላስ ጋላስ እምተ። 10 ሄሳ ህንተ እመይ ኤንቲ ሳሎ ፆሳ ኡፋይስያ ያርሾ ያርሻናሳነ ካዋስነ እያ ናይታስ ዎሳናሳ። 11 ሀ አዋጁዋ ላምያ ኦንካ ደእኮ፥ እያ ኬ ቱሳ ሾድድ፥ ሄ ቱሳ ቦላ እያ ካቆ፤ እያ ኬይካ ፕቶ የግያ በሰ ግዶ። 12 ሀ ኪታ ላማናዉ ዎይኮ የሩሳላመን ደእያ ፆሳ ኬ ላላናዉ ኩሸ ደንያ አይ ካዎይ ዎይኮ አስ ግድን፥ ባ ሱንይ ፄገታና መላ የሩሳላመ ዶርዳ ፆሳይ እያ ይሶ። ታኒ ዳርዮስ ሀይሳ ኪታስ። ሀ ኡባይ ምኖተን ፖለቶ" ያግስ።

ፆሳ ኬ አንጅሶ ባኣለ

13 ሄሳፈ ጉየ፥ ኤፍራፂሳ ሻፋፐ ሄፍን ቢታ አይስያ ታታናያ፥ ሳታርቡዛንነ ኤንታራ ኦያ ኡባይ ካዎይ ዳርዮስ ኪትዳይሳዳ ምኖተን ኦድ ፖልዶሶና። 14 አይሁደ ጭማት ባንታ ኦሱዋ አጎና ኦዶሶና፤ ቃስ ናበይ ሀገይነ እዶ ናአይ ዛካርያስ ኦድዳ ቃላን ምነትዶሶና። እስራኤለ ፆሳይ ኪትዳይሳዳ ፋርሰ ካዎት ቅሮስ፥ ዳርዮስነ አርፀክስስ አዋጅዳይሳዳ ፆሳ ኬ ኬፅድ ዉርስዶሶና። 15 ዳርዮስ ካዎትዳ ኡሱፑን ላይን አዳረ ጌተትያ አጌናን ሄን ጋላሳን፥ ፆሳ ኬ ኦሶይ ፖለትስ።

16 እስራኤለ አሳይ፥ ካህነት፥ ሌወትነ ድኦፐ ስምዳ አሳ ኡባይ ፆሳ ኬ አንጅስያ ባኣለ ኡፋይሳን ቦንችዶሶና። 17 ሄ ባለይ ቦንቸትያ ዎደ ኤንቲ እስ ፄቱ ኮርማ፥ ናምኡ ፄቱ ማራዘ፥ ኦይዱ ፄቱ ዶርሳ ኡርገታ ያርሽዶሶና። ቃስ ናጋራ ያርሾስ ታማነ ናምኡ እስራኤለ ኮቻታ ታይቦን ታማነ ናምኡ ኮለ ያርሽዶሶና። 18 ሙሰ ማፃፋን ፃፈትዳይሳዳ፥ የሩሳላመን ደእያ ፆሳ ኬን ኦና መላ ካህነትነ ሌወት ኤንታ ማራዳ ማራዳ ዎዶሶና።

ፓስካ ባኣለ

19 ድኦፐ ስምዳ አሳይ ኮይሮ አጌናን ታማነ ኦይዳን ጋላስ ፓስካ ባኣለ ቦንችዶሶና። 20 ካህነትነ ሌወት ባንታና ጌሽዶሶና፤ ኤንቲ ኡባይ ዎጋዳ ጌይዶሶና። ሌወት ድኦፐ ስምዳ ኡባስ፥ ካህነታስነ ባንታዉ ፓስካ ዶርሰ ሹክዶሶና። 21 ድኦፐ ስምዳ እስራኤለ አሳይነ አይሁደ ግዶና አሳይ ኦያ ቱናተፈ ባንታና ሻክድ፥ ጎዳኮ፥ እስራኤለ ፆሳኮ ስምዳ አሳ ኡባይ ፓስካ ምዶሶና። 22 ጎዳይ አሶረ ካዋ ቆፋ ላምድ እስራኤለ ጎዳ፥ ፆሳ ኬ ኬፅድ ፖላና መላ ማድዳ ግሾ፥ ኤንቲ ላፑን ጋላስ ኡይ ባኣለ ኡፋይሳን ቦንችዶሶና።