እዝራራ ድኦፐ ስምዳ አሳ
1 ካዎይ አርፀክስስ ካዎትዳ ዎደ ታራ እስፈ ባብሎነ ቢታፈ ስምዳ ሶ አሳ ሀላቃት ሀይሳታ፤
2 ፍንሃሳ ያራፐ ገርሶና፥ እታማራ ያራፐ ዳነላ፥ ዳዊታ ያራፐ ሳካና ናኣ ሀፁሳ፥
3 ፓሮሳ ያራፐ ዛካርያሳነ ኤንታ የለታ ማራን ፃፈትዳ ሀራ እስ ፄታነ እሻታሙ አደታ።
4 ፓሀት-ሞአበ ያራፐ ዛራሀ ናኣ ኤልሆኤናያነ እያራ ደእያ ናምኡ ፄቱ አደታ።
5 ዛታ ያራፐ ያሀዝኤላ ናአ ሳካናነ እያራ ደእያ ሄ ፄቱ አደታ።
6 አድና ያራፐ ዮናታና ናኣ ኤቤዳነ እሻታሙ አደታ።
7 ኤላማ ያራፐ ጎቶላ ናአ ይሻያነ እያራ ደእያ ላፑን ታሙ አደታ።
8 ሳፋፃ ያራፐ ምካኤላ ናአ ዝባዳነ እያራ ደእያ ሆስፑን ታሙ አደታ።
9 እዮኣባ ያራፐ ይኤላ ናአ አብድዩነ እያራ ደእያ ናምኡ ፄታነ ታማነ ሆስፑን አደታ።
10 ባና ያራፐ ዮስፍያ ናአ ሳሎምታነ እያራ ደእያ እስ ፄታነ ኡሱፑን ታሙ አደታ።
11 በባያ ያራፐ በባያ ናኣ ዛካርያሳነ እያራ ደእያ ላታማነ ሆስፑን አደታ፥
12 አዝጋዳ ያራፐ ሀቃፃና ናአ ዮሃናነ እያራ ደእያ እስ ፄታነ ታሙ አደታ።
13 አዶንቃማ ያራፐ ዉርሰን ስምዳይሳት፥ ኤልፋላፃ፥ ይኡኤላ፥ ሻማያነ ኤንታራ ደእያ ኡሱፑን ታሙ አደታ።
14 ብግዋያ ያራፐ ኡታያ፥ ዛኩራነ ኤንታራ እስፈ ሀራ ላፑን ታሙ አደታ።
15 ታኒ አሀዋኮ ጎግያ ሻፋ ማታን ኤንታ ሺሻስ። ኑኒ ሄ በሳን ዱንካንድ፥ ሄ ጋላስ ታክዳ። ታኒ ሄ በሳን ደእያ አሳነ ካህነታ ታይብያ ዎደ ሌወ ያራፐ እስ አስካ ደማብከ። 16 ሄሳ ግሾ፥ አላዛራ፥ አርኤላ፥ ሻማያ፥ ኤልናታና፥ ያርባ፥ ኤልናታና፥ ናታና፥ ዛካርያሳነ ማሱላማ ጌተተይሳታነ ጭንጫ አስ ግድዳ ዮያርባነ ኤልናታና ፄጋስ። 17 ኤንታ ካስፍያ ጌተትያ በሳን ሌወታስ ሀላቃነ ፆሳ ኬ ኦሳንቾ ግድዳ አዶስነ እያ ዳቦታስ ኦዳናባ አኬክሳዳ ኑ ፆሳ ኬን ኦያ አሰ ኤሀና መላ ኪታስ። 18 ኑ ፆሳ ሎኦ ኩሸይ ኑ ቦላ ደእያ ግሾ፥ እስራኤለ ናአ ሌወ ያራ ማህላ ያራነ ዳሮ ጭንጫ አስ ግድዳ ሳረባያ ጌተትያ አድያ ታማነ ሆስፑን እያ ናይታነ እያ እሻታ፥ ኑስ የድዶሶና። 19 ሄሳዳካ፥ ሀሻባ፥ ማራራ ያራ ግድዳ ያሻያ፥ እያ ናይታነ ላታሙ ግድያ እያ እሻታራ የድዶሶና። 20 ሄሳ ቦላ ካሰ አዋት ሌወታ ማዳና መላ ዳዊቲነ እያራ ኦያ ሀላቃት ሹምዳ ፆሳ ኬ ኦሳንቾታፐ ናምኡ ፄታነ ላታሙ አሳታ የድዶሶና። ሄሳት ኡባይ ባንታ ሱንን ፃፈትዶሶና።
21 ኑ ፆሳ ስንን ኑ ሁጵያ ካዉሽድ፥ ኦገይ ኑስ፥ ኑ ናይታስነ ኑ ሻሎ ኡባስ ሳሮ ግዳና መላ ዎሳና መላ ያን አሀዋ ሻፋ ማታን ፆማ አዋጃስ። 22 ካሰ ኑኒ ካዋስ፥ "ኑ ፆሳ ሎኦ ኩሸይ እያ ኮየይሳታ ቦላ ደኤስ፤ ሽን እያ ዎልቃማ ሀንቆይ እያ አገይሳታ ቦላ ደኤስ" ያግድ ኦድዳ ግሾ፥ ኑኒ ብያ ኦግያን ደእያ ሞርከታፐ ኑና ናጋና መላ ዎታዳረነ ፓራታ እማናዳ ካዋ ኦይቻናዉ ዬላታስ። 23 ሄሳ ግሾ፥ ኑኒ ፆምድ፥ ፆሳ ዎስዳ፤ እካ ኑ ዎሳ ስእስ።
24 ካህነ ሀላቃታፐ ሳረባያ፥ ሀሳባያነ ሀራ ኤንታ ዳቦ ግድዳ ታሙ አሳታ ዶራስ። 25 ካዎይ፥ እያራ ዞረተይሳት፥ እያ ሹማትነ እስራኤለ ኡባይ ኑ ፆሳ ኬስ እምዳ ብራ፥ ዎርቃነ፥ ሀራ ሚሸታ ኡባ ልካዳ ኤንታ ኩሸን ዎስ። 26 ታኒ ኤንታዉ እምዳባይ ሀይሳ፤ ላታማነ ናምኡ ሙኩሉ ክሎ ግራመ ብራ፥ ሄ ሙኩሉነ ኦይዱ ፄቱ ክሎ ግራመ ብራፐ ኦሰትዳ ሚሸታ፥ ሄ ሙኩሉነ ኦይዱ ፄቱ ክሎ ግራመ ዎርቃ፥ 27 ሆስፑን ክሎ ግራመነ ኦይዱ ፄቱ ግራመ ዎርቃፈ ኦሰትዳ ላታሙ ሳነታነ ዎርቃዳ አልኦነ ሙሩቶ ግድዳ ናሰ ብራታፐ ኦሰትዳ ናምኡ ሳነታ።
28 ሄሳፈ ጉየ፥ ታኒ ኤንታኮ ሀይሳዳ ያጋስ፤ "ህንተነ ሀ ሚሸት ጎዳስ ዱማትደታ፤ ሀ ብራይነ ዎርቃይ፥ አሳይ ባ ዶሳን ጎዳስ፥ ህንተ አዋታ ፆሳስ እምዳ እሞታ። 29 የሩሳላመን ደእያ ፆሳ ኬን ሚሸ ምንጅያ ኬ ጋክድ፥ ካህነ ሀላቃታ ስንን፥ ሌወታ ስንንነ እስራኤለ ያራታ ሀላቃታ ስንን እማና ጋካናዉ፥ ሀ ሚሸታ ሎይድ ናግተ" ያጋስ። 30 ሄሳ ግሾ፥ ካህነትነ ሌወት የሩሳላመን ደእያ ፆሳ ኬ ኤፋናዉ ብራ፥ ዎርቃነ ሀራ ሚሸታ ኡባ ምዛነን ልክድ አዋተን ኤክዶሶና።
31 ኮይሮ አጌናን ታማነ ናምአን ጋላሳን የሩሳላመ ባናዉ አሀዋ ሻፋ ማታፐ ደንድዳ። ኑ ቦላ ደእያ ኑ ፆሳ ሎኦ ኩሸይ ኑ ብያ ኦገን ደእያ ሞርከታፐነ ፓንጋታፐ ኑና አሽስ። 32 ኑኒ የሩሳላመ ጋክድ፥ ያን ሄ ጋላስ ሸምፕዳ።
33 ኦይዳን ጋላስ ብራ፥ ዎርቃነ ሀራ ሚሸታ ኡባ ልክድ፥ ኡራያ ናኣ ካህንያ ማረሞታስ እምዳ። ፍንሃሳ ናኣ አላዛር፥ ሌወ ግድዳ እያሱ ናኣ ዮዛባትነ ብንያ ናአ ኖኣድ እያራ እስፈ ደኦሶና። 34 ኡባባይ ሄ ዎደ ታይበት ልከትድ ፃፈትስ።
35 ሄሳፈ ጉየ፥ ድኦፐ ስምዳ አሳይ፥ እስራኤለ ፆሳስ፥ ታማነ ናምኡ ኮርማ፥ ኡዱፉን ታማነ ኡሱፑን ማራዘነ ላፑን ታማነ ላፑን ዶርሳ ኡርገታ ፁሳ ያርሾ ኦድ፥ ቃስ ታማነ ናምኡ ኮለ ናጋራ ያርሾ ኦድ ጎዳስ ያርሽዶሶና። ሄስ ኡባይ ፁሳ ያርሾ ግድድ ጎዳስ ሺቅስ። 36 ካዎይ ኪትዳ ኪታካ ካዉዋፐ ጋርሳራ ቢታ አይሰይሳታስነ ኤፍራፂሳ ሻፋፐ ሄፍን ቢታ አይሰይሳታስ እምዶሶና፤ ኤንቲ እስራኤለ አሳነ ፆሳ ኬ ኦሱዋ ማድዶሶና።