በሶና ኤኮ-ገሎ ዎጋ ድጉዋ
1 ሀ ኡባይ ሀንዳፐ ጉየ፥ ደርያ ካለይሳት ታኮ ይድ፥ ሀይሳዳ ያግዶሶና፤ "እስራኤለ አሳይ፥ ሀር አቶሽን፥ ካህነት፥ ሌወት፥ ባንታ ሄራን ደእያ፥ ካናነታ፥ ህተታ፥ ፓርዘታ፥ ያቡሰታ፥ አሞነታ፥ ሞአበታ፥ ግብፀታነ አሞረታ ቱናፐ ባንታና ሻክቦኮና። 2 ባንታዉነ ባንታ ናይታስ አይሁደ ግዶና ማጫ ናይታፐ ማቾ ኤክዶሶና፤ ሄሳ ጋሶን ጌሻ ዘረ አይሁደ ግዶና አሳራ ዋላክዶሶና። ሀ ባላን ኮይሮ ግድዳይ ካለይሳታነ ሀላቃታ" ያግዶሶና።
3 ታኒ ሀ ኦዳ ስእዳ ዎደ ታ ማኡዋነ ታ ቃምስያ ዳካስ፤ ታ ሁጵያነ ታ ቡቻ ስካስ፤ ዳሮ ዳጋማዳ ኡታ አጋስ። 4 ድኦፐ ስምዳ አሳይ ኦዳ ናጋራ ግሾ፥ እስራኤለ ፆሳይ ኦድዳ ቃላስ ያይዳ አሳ ኡባይ ታኒ ደእያ በሳ ታኮ ሺቅዶሶና። ኦማርሳ ያርሾ ያርሽያ ዎደ ጋካናዉ ዳጋማዳ ኡትዳ በሳፈ ደንዳብከ።
5 ሽን ኦማርሳ ያርሾይ ሺቅያ ዎደ፥ ታ ማኦይነ ታ ቃምሰይ ዳከትድ ደእሽን፥ ታኒ አዛናዳ ኡትዳ በሳፈ ደንዳስ። ጉልባታዳ ጎዳኮ፥ ታ ፆሳኮ፥ ታ ኩሽያ ደንዳ፥ ሀይሳዳ ያጋዳ ዎሳስ። 6 "አቤት ታ ፆሳዉ፥ ኑ ናጋራይ ዶረትድ ኑ ሁጵያፐ አዳ ግሾነ ኑ ናቆይ ሳሎ ጋክዳ ግሾ ታኒ ታ ሶምኡዋ ኔኮ ደንናዉ ያያይስነ ዬላታይስ። 7 ኑኒ ኑ ማይዛታ ዎደፐ ዶምን፥ ሀች ጋካናዉ፥ ነና ዳሮ ናቅዳ። ኑ ናጋራ ጋሶን ኑኒ፥ ኑ ካዎትነ ኑ ካህነት ሀእይሳዳ አላጋ ካዎታ ኩሸን ኩንድዳ፤ ማሻስ፥ ዶኦስ፥ ቦንቄስነ ዬላስ አድ እመትዳ።
8 "ሽን ሀእ ጎዳይ ኑ ፆሳይ ኑፐ ጉ አስ አሻናዉነ ባ ኬን ኑስ በሰ እማናዉ ኮይድ ጉ ዎደስ ማሮተ እሚስ። ሄሳ ግሾ ፆሳይ ኑ አይፊያ ዶይስ፤ ኑ አይለተን ደእሽን ጉ ዎደስ ሸምፖ እሚስ። 9 ኑኒ አይለ ግድኮካ፥ ኑ ፆሳይ ኑና አይለተን አግቤና፤ ኑ ደኡዋ ኦራስ። ኑ ፆሳ ኬ ኬፃና መላ፥ ላለትዳይሳ ኦራና መላነ ይሁዳንነ የሩሳላመን ሳሮ ዳና መላ ፋርሰ ካዎታ ስንን ኑስ ቴሞ እሚስ።
10 "ሽን ኑ ፆሳዉ፥ ሀእ ያትን፥ ኑኒ ዎይጋኔ? ሄኮ ሀእካ ነ ኪታ ቶችዳ። 11 ኑ ቶችዳይ ነ አይለ ግድዳ ናበታ ባጋራ ‘ህንተ ላታናዉ ገልያ ቢታይ፥ እን ደእያ አሳን ቱንዳሮ፤ ሀ ጋፃፐ ህን ጋፃ ጋካናዉ ኤንታ ኢታ ኦሱዋንነ ቱናተን ኩማሱ። 12 ሄሳ ግሾ፥ ህንተ ምኖ ግዳና መላ፥ ሄ ቢታ አይፍያ ማና መላነ መርናዉ ህንተ ናይታስ ላትሳና መላ፥ ህንተ ማጫ ናይታ ኤንታ አደ ናይታስ እሞፍተ፤ ኤንታ ማጫ ናይታ ህንተ አደ ናይታስ ኤኮፍተ። ኤንቲ ሳሮተንነ ዱረተን ዳና መላ አሞቶፍተ’ ያጋዳሳ።
13 "ኑ ቦላ ጋክዳ ኢታባ ኡባይ ኑ ኢታ ኦሱዋነ ኑ ግታ ናጋራ ጋሶና። ግዶሽን፥ ኔኒ ኑ ፆሳይ ኑ ናጋራ ዳሮተ መላ ኑና ፕርዳባካ፤ ሽን ኑፐ ጉታ አሻዳሳ። 14 ኑኒ ሀይሳ መላ ቱናባ ኦያ አሳራ ኤኮንነ ገሎን ዋላከትድ፥ ዋንድ ነ ኪታ እፃስ ጋኔ? ሀ አትዳ ጉ ኮቻይ ያና ጋካናዉ ነ ሀንቆይ ኑ ቦላ ዳረነዬ? 15 አቤት ጎዳዉ፥ እስራኤለ ፆሳዉ፥ ኔኒ ፅሎ፤ ኑኒ ሀእ ጋካናዉ አትድ ደኦን ደኦስ። ኑ ናጋራ ጋሶን ኑፐ እሶይካ ነ ስንን ኤቃናዉ ዳንዳኤይ ባዋ፤ አትዳይሳት ሀች ሀይሳን ነ ስንን ደኦስ" ያጋስ።