እዝራ ማፃፋ 4

ሞርከይ መዳ ኤቀተ

1 ይሁዳስነ ብንያመስ ሞርከ ግድዳ አሳይ፥ ድኦፐ ስምዳይሳት ጎዳስ፥ እስራኤለ ፆሳስ ኬ ኬፀይሳ ስእዶሶና። 2 ዛሩባበላኮነ እስራኤለ ያራ ሀላቃታኮ ይድ፥ "አሶረ ካዎይ አስራዶን ኑና ሀ በሳ ኤህዳ ጋላሳፐ ዶምድ፥ ኑካ ህንተ ፆሳ ጎይኖስ፥ እያዉ ያርሾስ። ሄሳ ግሾ፥ ኑካ ህንተራ ኬፃና" ያግዶሶና።

3 ሽን ዛሩባበል፥ እያሱይነ እስራኤለ ያራ ሀላቃት፥ "ኑ ፆሳ ኬ ኬፃናዉ ኑስነ ህንተዉ ግሾይ ባዋ። ሽን ፋርሰ ካዎይ ቅሮስ ኪትዳይሳዳ ጎዳ፥ እስራኤለ ፆሳ ኬ ኑኒ ኑ ፃላላ ኬፃና" ያግዶሶና።

4 ሄሳፈ ጉየ፥ ሄ ቢታን ደእያ አሳይ፥ ይሁዳ አሳይ ፆሳ ኬ ኬፆና መላ ኡፋይስ ቃንፅሳናዉነ ያሽሳናዉ ደንድዶሶና። 5 ፋርሰ ካዋ ቅሮሳ ላይፈ ብድ ዳርዮሳ ካዎተ ጋካናዉ ኤንቲ ይሁዳ አሳ ዞረታ ላላና መላ አሰ ሻምዶሶና።

አርፀክስሳስ ፃፈትዳ ዳብዳበ

6 አርፀክስስ ካዎትዳ ዎደ ይሁዳነ የሩሳላመ አሳ ሞታናዉ ፓይለ ዶይዶሶና።

7 አርፀክስሳ ካዎተ ላይን፥ ብሽላም፥ ምትርዳት፥ ፃቤልነ ኤንታ ባጋ ግድድ፥ ፋርሰ ካዋ አርፀክስሳስ ዳብዳበ ፃፍዶሶና፤ ሄ ዳብዳበይ አራምከ ፕዳለንነ ዶናን ፃፈትስ።

8 ቢታ አይስያ ረሁምነ ፃፈይ ስምሳይ የሩሳላመባ ሀይሳዳ ያግድ፥ ካዋ አርፀክስሳስ ዳብዳበ ፃፍዶሶና፤ 9 "ሀ ዳብዳበይ ቢታ አይስያ ረሁማፐ፥ ፃፍያ ስምሳያፐ፥ በተራፕለሳፐ፥ ፋርሰፐ፥ አርካፈ፥ ባብሎነፐ ሱሳፐነ ኤላማ ቢታን ደእያ ዳይናታፐነ ቢታ አይሰይሳፈ፥ 10 ቃስ ግታነ ቦንቸትዳ ካዋ አስናፋር ድእድ ሳማረንነ ኤፍራፂሳ ሻፋፐ ሄፍንን ዎዳ አሳ ኡባፈ ፃፈትስ" ያግዶሶና።

11 ኤንታ ዳብዳበይ ሀይሳዳ ያጌስ፤ "ካዋ አርፀክስሳስ፥ ኤፍራፂሳ ሻፋፐ ሄፍንን ደእያ ነ ሞርናታፐ የደትዳ ዳብዳበ።

12 "ካዋዉ፥ ነ ማታፐ ኑኮ ይዳ አይሁደት የሩሳላመ ይድ፥ ሀ ማካላነ ኢታ ካታምዉ ዛሪድ ኬፆ ቦላ ደኤይሳ ኤራ። እ ግምበ ድርሳ ኦራሶና፤ እ ባሱዋ የጎሶና፤ እ ፃጱዋ ምንሶና። 13 ሄሳ ቦላ ቃስ፥ ሀ ካታምያ ኬፀትኮነ እ ድርሳ ግምበይ ኦራፅኮ ኤንቲ ጊራነ ቃራፃ ቃንፆናይሳ ኤራ፤ ካዎ ኬ ገልያ ሚሸይ ጉፃናይሳ አኬካ። 14 ኑኒ ካዎይ ሹምን ኦይሳታ ግድያ ግሾነ ካዎይ ካዉይሽን በአናዉ ኮዮና ግሾ ሀይሳ ነ ኤራና መላ ግድ ኦዶስ። 15 ሄሳ ግሾ፥ ካሰ ነ አዋታ ታርከ ማፃፋይ ኮየትድ ፄለቶ፤ ሄ ፃፈትዳባፐ ሀ ካታምያ ማካላነ ካዎታስነ ቢታታስ መቶ መሸ ደእዳይሳ ኤራናዉ ዳንዳኣሳ፤ ሄሳ ጋሶን እያ ላለታሱ። 16 ሀ ካታምያ ኬፀትያነ እ ድርሳ ግምበይ ኦራፅያባ ግድኮ፥ ኤፍራፂሳ ሻፋፐ ሄፍንን ደእያ ቢታይ ነ ኩሸፐ ከይዳይሳ ኤራ" ያግዶሶና።

17 ካዎይ ሀይሳዳ ግያ ዛሮ ኤንታዉ የድስ፤ "ቢታ አይስያ ረሁማ፥ ፃፍያ ስምሳያ፥ ሳማረንነ ኤፍራፂሳ ሻፋፐ ሄፍንን ደእያ ኤንታራ እስፍዳ አሳ ሳሮ ጋይስ። 18 ህንተ ታዉ የድዳ ዳብዳበይ ብርሸትድ ናባበትን ስአስ። 19 ታ ኪታን፥ ካሰ ታርከይ ኮየትድ ፄለትያ ዎደ፥ ሀ ካታምያ በንፐካ ካዎታስ ማካላነ መቶ መሸ ደእያ ቢታ ግደይስ ኤረትስ። 20 የሩሳላመን ዎልቃማ ካዎት ካዎትዶሶና፤ ኤፍራፂሳ ሻፋፐ ሄፍንን ደእያ ቢታፈካ ሄ ካዎት ጊራነ ቃራፃ ኤክዶሶና። 21 ሄሳ ግሾ፥ ታኒ ኤንታዉ ሀ ኪታ እማና ጋካናዉ፥ ሀ አሳት ሄ ካታምዉ ኬፀይሳ ኤሳና መላ ኦድተ። 22 ህንተ ሀ ኦዳ ቀል ጎና መላ ናገትተ፤ ካዎታስ መቶ ዳርሳናዉ ኮሸና" ያግድ ኪትስ።

23 ካዋ አርፀክስሳ ዳብዳበይ ረሁማስ፥ ፃፍያ ስምሳያስነ ኤንታራ ደእያ ኡባስ ናባበትዳ ዎደ የሩሳላመን ደእያ አይሁደታኮ ኤለስ ብድ፥ ኤንቲ ኬፀይሳ ዎልቃን ኤስዶሶና።

24 ሄ ዎደፐ ዶምድ የሩሳላመን ደእያ ፆሳ ኬ ኦሶይ ዳርዮስ ካዎትዳ ናምአን ላይ ጋካናዉ ኤቅስ።