ቅሮሳ አዋጁዋ
1 ፋርሰ ካዎይ ቅሮስ ካዎትዳ ኮይሮ ላይን፥ ናብያ ኤርምያሳ ባጋራ ጎዳይ ኦድዳባ ፖልስ። ፋርሰ ካዎይ ቅሮስ ባ ካዎተ ግዶን ሀይሳዳ ያግድ አዋጃና መላነ ሄ አዋጁዋ ፃፍድ ዎና መላ ጎዳይ እያ ዎዛና ደንስ። 2 ፋርሰ ካዎይ ቅሮስ ሀይሳዳ ያጌስ፤ "ጎዳይ፥ ሳሎ ፆሳይ ሀ ሳኣ ካዎተታ ኡባ ታዉ እሚስ። ቃስ ይሁዳን ደእያ የሩሳላመን እያዉ ኬ ኬፃና መላ ታና ሹምስ። 3 ፆሳ አስ ግድዳ ኦንካ ያ ቦ፤ እያ ፆሳይ እያራ ግዶ! ህንተ ይሁዳን ደእያ የሩሳላመ ብድ፥ ያን የሩሳላመን ጎዳ፥ እስራኤለ ፆሳ ኬ ዛሪድ ኬፆ። 4 ዱማ ዱማ ቢታን ደእያ አሳ ኡባይ አይሁደታፐ አትዳይሳት ብራ፥ ዎርቃ፥ ዱማ ዱማ ሚሸታነ መሄ እምድ ማዶ፤ ቃስ የሩሳላመን ደእያ ፆሳ ኬ ባንታ ዶሳን እምያ እሞታ ቦላ ጉጅድ እሞ" ያጌስ።
5 ሄሳፈ ጉየ፥ ይሁዳነ ብንያመ ኮቸ ሀላቃት፥ ካህነትነ ሌወት፥ ቃስ ፆሳይ ኤንታ ዎዛና ደንዳ ኡባይ የሩሳላመን ጎዳ ፆሳ ኬ ኬፃናዉ ባናዉ ደንድዶሶና። 6 ቃስ ኤንታ ሾሮን ደኤይሳትካ ባንታ ዶሳን እምዳባ ቦላ ጉጅድ፥ ብራፐነ ዎርቃፈ ኦሰትዳ ሚሸታ፥ ሀራ ዱማ ዱማ ሚሸታነ መሄ እምድ፥ ኤንታ ማድዶሶና። 7 ሄሳ ቦላ ካዎይ ቅሮስ ናቡካዳናፆር የሩሳላመፐ ኤፍድ ባ ኤቃ ኬን ዎዳ ጎዳ ኬ ሚሸታ እሚስ። 8 ፋርሰ ካዎይ ቅሮስ ሚሸታ ዎያ ኬ ሀላቃ ምትርዳፁ ታይብስድ፥ ይሁዳ ሃርያ ሰሳብሳራ ኩሸን ዎስ። 9 ስምዳ ሚሸታ ታይቦይ ሀይሳ፤ ሀስታሙ ዎርቃ ሻተ፥ ሙኩሉ ብራ ሻተ፥ ላታማነ ኡዱፉን ፕልኦ፥ 10 ሀስታሙ ዎርቃ ከረ፥ ኦይዱ ፄታነ ታሙ ብራ ከረ ሙኩሉ ሀራ ዱማ ዱማ ሚሸ። 11 ዎርቃ ሚሸታነ ብራ ሚሸታ ታይቦይ ኩመ እቻሹ ሙኩሉነ ኦይዱ ፄታ፤ ሴሳብሳር ባብሎነፐ የሩሳላመ ስምያ ዎደ ድኦፐ ስምዳ አሳራ ኤክድ ይስ።