ይሁዳ ካዋ እዮአካዛ
(2 ካዎ 23:30-35)
1 ሄ ቢታ አሳይ እዮስያሳ ናኣ እዮአካዛ ዶርድ እያ አዋ በሳን የሩሳላመን ካዎዶሶና። 2 እዮአካዝ ካዎትያ ዎደ እያዉ ላይ ላታማነ ሄ፤ እ የሩሳላመን ሄ አጌና ካዎትስ። 3 ግብፀ ካዎይ እዮአካዛ ካዎተፈ ዎስ፤ ሄ ሙኩሉነ ኦይዱ ፄቱ ክሎ ግራመ ብራነ ሀስታማነ ኦይዱ ክሎ ግራመ ዎርቃ ይሁዳ አሳይ ጊራና መላ ኦስ። 4 ግብፀ ካዎይ፥ ናኮይ፥ እዮአካዛ እሻ ኤልያቄመ ይሁዳ ቦላነ የሩሳላመ ቦላ ካዎድ እያ ሱን እዮአቄማ ያግድ ላምስ። ያትድ እዮአቄማ እሻ እዮአካዛ ግብፀ ኤፍስ።
ይሁዳ ካዋ እዮአቄማ
(2 ካዎ 23:36—24:7)
5 እዮአቄም ካዎትያ ዎደ እያዉ ላይ ላታማነ እቻሻ፤ እ የሩሳላመን ታማነ እስ ላይ ካዎትስ። ባ ጎዳ ፆሳ ስንን ኢታባ ኦስ። 6 ባብሎነ ካዎይ ናቡካዳናፆር እያ ኦልድ፥ ባብሎነ ኤፋናዉ ናሰ ብራታ ሳንላታን ቃችስ። 7 ቃስ ናቡካዳናፆር ፆሳ ኬ ሚሽያ ኤክድ ባብሎነ ኤፍድ፥ ባ ካዎ ጋን ዎስ።
8 እዮአቄም ኦዳ ሀራባይ፥ ኦዳ ቱናባይነ ኦዳ ኢታባ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ። እ ሀይቅን፥ እያ በሳን እያ ናአይ ዮአክን ካዎትስ።
ይሁዳ ካዋ ዮአክና
(2 ካዎ 24:8-17)
9 ዮአክን ካዎትያ ዎደ እያዉ ላይ ሆስፑና፤ እ የሩሳላመን ሄ አጌናነ ታሙ ጋላስ ካዎትስ። እ ጎዳ ስንን ኢታባ ኦስ። 10 ላይ ላመን፥ ካዎይ ናቡካዳናፆር አሰ ኪትድ፥ ዮአክናነ ፆሳ ኬን ደእያ አልኦ ሚሸታ እያራ እስፈ ባብሎነ ኤህስ። ያትድ እያ አዋ እሻ ሰደቅያሳ ይሁዳነ የሩሳላመ ቦላ ካዎስ።
ይሁዳ ካዋ ሰደቅያሳ
(2 ካዎ 24:18-20፤ ኤርም 52:1-3)
11 ሰደቅያስ ካዎትያ ዎደ እያዉ ላይ ላታማነ እስኖ፤ እ የሩሳላመን ታማነ እስ ላይ ካዎትስ። 12 ባ ጎዳ ፆሳ ስንን ኢታባ ኦስ፤ ቃስ ጎዳ ቃላ ኦድያ ናብያ ኤርምያሳ ስንን ባና ካዉሽቤና።
13 ሰደቅያስ፥ አማነታና መላ ባና ፆሳ ሱንን ጫቅስዳ ናቡካዳናፆራ ቦላ ማካልስ። ጎዳ፥ እስራኤለ ፆሳኮ ስሞና እፅስ፤ ባ ዎዛና ፆሳ ቦላ ምንስ። 14 ቃስ፥ ይሁዳ አሳይነ ኤንታ ካለያ ካህነት፥ አማነቶና እፅዶሶና። ኤንቲ ሀራ ካዎተት ኦያ እፀትዳ ኦሶታ ካልድ፥ ጎዳይ የሩሳላመን ጌሽዳ ፆሳ ኬ ቱንስዶሶና።
የሩሳላመ ኩንደ
(2 ካዎ 25:1-21፤ ኤርም 52:3-11)
15 ጎዳይ፥ ኤንታ ማይዛታ ፆሳይ ባ አሳስነ ባ ኬስ ቃትያ ግሾ፥ ባ ናበታ ኤንታዉ ዛር ዛር ኪትስ። 16 ሽን ጎዳ ሀንቆይ ኤንታ ቦላ ዎና ጋካናዉነ ኤንቲ ከስ ኤክያሶ ያና ጋካናዉ ፆሳ ኪታንቾታ ቀልቅስዶሶና፤ እያ ቃላ ካዶሶና፤ ናበታ ቦላ ሚጭዶሶና። 17 ሄሳ ግሾ፥ ጎዳይ ካልዳወታ ካዋ ኤንታ ቦላ ደንን፥ እ ኤንታ ያላጋ አደታ ፆሳ ኬን ማሻን ዎስ። እ ያላጋ አደታስ ዎይኮ ጌላኦታስ ዎይኮ ጭማታስ ዎይኮ ጬጋታስ ቃቶና ዉርስስ። ፆሳይ ኤንታ ኡባ ናቡካዳናፆራ ኩሸን አድ እሚስ። 18 ባብሎነ ካዎይ ፆሳ ኬን ደእያ ሚሸታ ኡባ፥ ግታነ ጉ፥ ፆሳ ኬን ደእያ ቡቁራ፥ ካዎ ቡቁራነ እያ ሞርናታ ቡቁራ ኡባ ኤክድ ባብሎነ ኤፍስ። 19 ኤንቲ ፆሳ ኬ ታማን ፁግድ፥ የሩሳላመ ግምበ ድርሳ ላልዶሶና። ካዎ ጋዋ ታማን ፁግድ፥ ያን ደእያ አልኦ ሚሸ ኡባ ይስዶሶና።
20 ማሻፈ አትዳይሳታ ካዎይ ድእድ ባብሎነ ኤፍስ። ፋርሰ ካዎተይ ደንዳና ጋካናዉ ኤንቲ እያዉነ እያ ናይታስ አይለ ግድዶሶና። 21 ጎዳይ ናብያ ኤርምያሳ ባጋራ ኦድዳ ቃላይ ፖለትስ። ዉርሰን ቢታይ ላፑን ታሙ ላይ አስ ባይና በሲ ግድድ ሸምፕስ። ቢታይ ሳምባታ ሸምፖ ደምስ።
22 ፋርሰ ካዎይ ቅሮስ ካዎትዳ ኮይሮ ላይን ናብያ ኤርምያሳ ባጋራ ጎዳይ ኦድዳይሳ ፖልስ። ፋርሰ ካዎይ ቅሮስ ባ ካዎተን ኡባን ሀይሳዳ ያግድ አዋጃና መላነ ፃፍድ ዎና መላ ጎዳይ እያ አያና ደንስ። 23 ፋርሰ ካዎይ ቅሮስ፥ "ጎዳይ፥ ሳሎ ፆሳይ ሀ ሳኣ ካዎተታ ኡባ ታዉ እሚስ። ቃስ ይሁዳን ደእያ የሩሳላመን ታ እያዉ ፆሳ ኬ ኬፃና መላ ታና ሹምስ። ፆሳ አስ ግድዳ ኦንካ ያ ቦ። ጎዳይ እያ ፆሳይ እያራ ግዶ" ያግስ።