ህዝቅያስ ጎይኖ ዎጋ ኦራስ
1 ባለይ ፖለትዳ ዎደ ሄ በሳን ደእያ እስራኤለ ኡባይ ይሁዳ ካታማታ ብድ ኤቃ ሹቻታ ትንቸረዶሶና፤ አሼራ ኤቃ ምስለታ ቃንፀረዶሶና። ይሁዳን፥ ብንያመን ኤፍሬማንነ ምናሰ ቢታን ደእያ ቃ ጎይኖ በሳታነ ያርሾ በሳታ ላልዶሶና። ኤንቲ ሄ ኡባ ይስዳፐ ጉየ እስራኤለ አሳ ኡባይ ባንታ ካታማነ ባንታ ሶ ሶ ስምዶሶና።
2 ህዝቅያስ ካህነታነ ሌወታ ኤንታ ኦሶ ማራን ጩጋን ጩጋን ሻክድ ኤስስ። ኤንቲ ፁሳ ያርሾነ እስፈተ ያርሾ ጎዳስ ያርሻና መላነ ፆሳ ኬ ፐንገን ጎዳ ጋላታናነ ሳባና መላ ኦስ። 3 ጎዳ ህግያን ፃፈትዳይሳዳ ዎንታነ ኦማርስ ፁሳ ያርሾነ ሳምባታን፥ አጌና ፄሮንነ ሀራ ባኣለ ጋላሳታን ሺቅያ ያርሹዋስ ኮሽያ መሄታ ካዎይ ባፐ እሜስ።
4 ጎዳ ህግያን ፃፈትዳይሳዳ ካህነትነ ሌወት ባንታ ኩመ ዎድያ ጎዳ ኦሶስ ፔሻና መላ ኤንታዉ በሲያባ እማና መላ የሩሳላመ አሳ ካዎይ ኪትስ። 5 እስራኤለ አሳይ ካዋ ኪታ ስእዳ ዎደ ካፈ፥ ዎይነ ኡሻፈ፥ ዛይትያፐ፥ ኤሳፈነ ጋደን ካፅዳባፐ ባይራ ጎዳስ እምዶሶና፤ ባንታዉ ደእያባ ኡባፈ አስራታ ከስዶሶና። 6 ይሁዳ ካታማታን ደእያ እስራኤለ አሳይነ ይሁዳ አሳይ ባንታ መሄታፐ፥ ዶርሳታፐ አስራታ እምዶሶና፤ ጎዳ፥ ባንታ ፆሳስ፥ ዱማይድ ዎዳባ ኤህድ ዶርዶሶና። 7 ኤንቲ ሄን አጌናን ኤሆ ዶምድ ላፑን አጌናን ፖልዶሶና። 8 ህዝቅያስነ ሀላቃት ዶረትዳይሳ ይድ በእዳ ዎደ ኤንቲ ጎዳነ ጎዳ አስ ግድዳ እስራኤለ አንጅዶሶና።
9 ህዝቅያስ ዶረትዳ እሞታባ ካህነታነ ሌወታ ኦይችስ።
10 ሳዶቃ ያራ ግድዳ ካህነ ሀላቃይ አዛርያስ፥ "ባንታ እሙዋ ፆሳ ኬ ኤሆ ዶምን ኑ ምድ ካልዳ። ጎዳይ ባ አሳ አንጅዳ ግሾ ዳሮ ፓላህስ" ያግስ።
11 ህዝቅያስ ፆሳ ኬን ምንጃ ክፍለታ ጊግሳና መላ ኪትን አሳይ ጊግስዶሶና። 12 አስራታ፥ ባይራባነ ዱማትዳ እሞታታ አማነተን ክፍለታ ገልስዶሶና። ሌወ ግድዳ ኮናነይ ምንጃ ኬ ቦላ ዋና ግድድ ሹመትስ። እያ እሻይ ሳመእ እያዉ ናምአን ግድድ ሹመትስ። 13 ካዎይ ህዝቅያስነ ካህነ ሀላቃይ አዛርያስ ሹምን ኮናነፐነ ሳመአፐ ጋርሳራ ኦያ ሌወት፥ ይኤላ፥ አዛዛ፥ ናሃታ፥ አሳሄላ፥ ያርሞታ፥ ዮዛባታ፥ ኤልኤላ፥ ይስማካ፥ ማሃታነ ባናያ። 14 ዶሎሀ ባጋ ፐንግያ ናገይሳታ ሀላቃይ ሌወይ፥ ይምና ናአይ፥ ቆረይ፥ አሳይ ዶሳን ፆሳስ ኤህዳ እሙዋ ኤካናዉነ ግሻናዉ ሹመትስ። 15 ካህነት ደእያ ካታማታን ግታፐ ጉ ጋካናዉ ደእያ ባንታ እሻታስ አማነትድ፥ ኤንታ ኦሱዋዳ ኦሱዋዳ ሻክድ እማና መላ ኤደን፥ ምንያምን፥ እያሱይ፥ ሻማኤይ፥ አማረይነ ሳካን ቆረፐ ጋርሳራ ሹመትዶሶና። 16 ባንታ ጩጋን ጩጋን ባንታ ኦሱዋ ጋላስ ጋላስ ፆሳ ኬን ኦይሳታስ ላይ፥ ሄነ እያፐ ቦላ ግድዳ አደ ኡባስ ኤንታ ግሹዋ ሻክድ እምዶሶና። 17 ባንታ አዋታ ሶ አሳን አሳን ታይበትዳ ካህነታስነ ላይ፥ ላታማነ እያፐ ቦላ ግድዳ ሌወታስ ባንታ ኦሱዋዳ ኦሱዋዳ ባንታ ጩጋን ጩጋን ደኤይሳታስ ግሽዶሶና። 18 ኤንቲ አማነትድ ባንታና ጌሽዳ ግሾ ኤንቲ ባንታ የለታ ማራን ታይበትያ ዎደ ባንታ ናይታራነ ማቸታራ እስፈ ፃፈትዶሶና። 19 ባንታ ካታማታ ዩሾን ደእያ ሄን ጋደታን ዎይኮ ሀራ ካታማታን ደእያ ካህነ ግድዳ አሮና ሼሻስ፥ ኤንታ ግዶን ደእያ አደ ኡባስነ ሌወታ የለታ ማዝጋበን ፃፈትዳይሳታስ ካ ግሻናዉ ሹመትዶሶና።
20 ካዎይ ህዝቅያስ ጎዳ ባ ፆሳ ስንን ሎኦ፥ ሱረነ ቱማ ግድዳባ ይሁዳ ቢታ ኡባን ኦስ። 21 ህዝቅያስ ፆሳ ኬስ ኦዳ ኦሶ ኡባን፥ ፆሳ ህግያነ ዎጋ ናግድ ፆሳ ባ ኩመ ዎዛናን ኮይዳ ግሾ እያዉ ኡባይ እንጀትስ።