2 ታርከ ማፃፋ 25

ይሁዳ ካዋ አማስያሳ

1 አማስያስ ካዎትያ ዎደ እያዉ ላይ ላታማነ እቻሻ፤ እ የሩሳላመን ላታማነ ኡዱፉን ላይ ካዎትስ። እያ አየ ሱንይ ዮኣዶ፤ እያ የሩሳላመ ማጫስ። 2 አማስያስ ጎዳ ስንን ሱረባ ኦስ፤ ግዶሽን፥ ኩመ ዎዛናፐ ግደና። 3 አማስያስ ካዎተ ምንዳፐ ጉየ ባ አዋ ዎዳ አሳታ ዎስ። 4 ግዶሽን፥ ኤንታ ናይታ ዎቤና። ኤንታ ናይታ ዎና አግዳ ጋሶይ፥ ጎዳይ፥ ሙሰ ህገ ማፃፋን ኪትዳይሳዳ፥ "ናይት ኦዳ ናጋራ ግሾ አዋታ ዎናዉ በሰና፤ አዋት ኦዳ ናጋራ ግሾ ናይታ ዎናዉ በሰና። አስ ኡባይ ባ ኦዳ ናጋራን ናጋራን ሀይቃናዉ በሴስ" ያግዳ ግሾሳ።

5 አማስያስ ይሁዳ አሳ ሺሽድ ባንታ አዋታ ኬን ኬን ሻላቃታነ ማቶ ሀላቃታ ሹምስ። እ ላታሙ ላይነ እያፐ ቦላ ግድዳ ይሁዳ ኮቻታነ ብንያመ ኮቻታ ኡባ ታይብድ ጎንዳለነ ቶራ ኦይክድ ኦላስ ጊግዳ ሄ ፄቱ ሙኩሉ ዶረትዳ አሳታ ደምስ። 6 እስራኤለፐ እስ ፄቱ ሙኩሉ ምኖ አሳታ ሄ ሙኩሉነ ኦይዱ ፄቱ ክሎ ግራመ ብራን አማስያስ ሻምስ። 7 ሽን እስ ፆሳ አስ እያኮ ይድ፥ "ካዋዉ፥ ጎዳይ እስራኤለራነ ኤፍሬማራ ዶና ግሾ፥ እስራኤለ ኦላንቾት ኔራ ቦፖ። 8 ኤንቲ ታና ምንና ጋዳ ነ ቆፕኮ፥ ፆኖይነ ፆነተ ፆሳባ ግድያ ግሾ ፆሳይ ነና ነ ሞርከታ ስንን ካዉሻና። ግዶሽን፥ ነ ፃላላ ባ፤ ምናዳ ኦለታ" ያግስ።

9 አማስያስ ፆሳ አድያኮ፥ "ታኒ እስራኤለ ኦላንቾታስ ቃንፅዳ ብራይ ኡባይ ዋናኔ?" ያግስ።

ፆሳ አደይ፥ "ጎዳይ ነዉ ሄሳፈ አድ እማናዉ ዳንዳኤስ" ያግስ። 10 ሄሳ ግሾ፥ አማስያስ ኤፍሬማፐ ይዳ ኦላንቾት ባንታ ሶ ሶ ባና መላ ኦስ። ኤንቲ ይሁዳ አሳ ቦላ ዳሮ ሀንቀትሸ ባንታ ሶ ሶ ስምዶሶና።

11 ሄሳፈ ጉየ፥ አማስያስ ባና ምንድ፥ ባ ኦላንቾታ ካለድ፥ ማፅነ ዛንጋራ ብን እያ ኦላንቾት ሳይረፐ ታሙ ሙኩሉ አሳ ዎዶሶና። 12 ሀራ ታሙ ሙኩሉ ኦላንቾታ ፓፃ ድእድ፥ ኤንታ አፎ ዶና ኤፍድ፥ አፉዋን ዱገ ሆልን፥ ጋርሳን ደእያ ሹቻን አሳ ኡባይ መቀረትድ ዉርዶሶና። 13 ሽን ሄ ዎደ አማስያስ ባራ ኦላስ ቦና መላ ጉየ ዛርዳ እስራኤለ ኦላንቾት ሳማረፐ ቤት-ሆሮና ጋካናዉ ደእያ ይሁዳ ካታማታ ኦልዶሶና። ኤንቲ ይሁዳ አሳፐ ሄ ሙኩሉ ዎድ ዳሮ ድኦ ኤክዶሶና።

14 አማስያስ ኤዶመታ ዎድ ስምያ ዎደ ኤንታ ኤቃታ ኤክድ ይስ። ኤንታ ፆሰ ኦ ኤስድ ኤንታ ጎይንስ፤ እፃነ ጩይስስ። 15 ጎዳ ሀንቆይ አማስያሳ ቦላ ኤፅን፥ ጎዳይ አማስያሳኮ ናበ ኪትስ። ሄ ናበይ ብድ፥ "ባንታ አሳ ነ ኩሸፐ አሻናዉ ዳንዳእቦና ፆሳታ አይስ ዞረ ኦይቻዲ?" ያግስ።

16 ናበይ ቡሮ ኦዳ ቦላ ደእሽን ካዎይ፥ "ነና ካዎ ዞርያ አስ ኦዳይ ኦኔ? ስእ ጋ! ነ አይስ ሀይቃናዉ ኮያይ?" ያግስ።

ናበይ ኦዳ ኤስድ፥ "ነ ሀይሳ ኦዳ ግሾነ ታ ዞርያ ስኦና እፅዳ ግሾ ፆሳይ ነና ይሳናዉ ቆፕዳይሳ ሀእ ኤራስ" ያግስ።

17 ሄሳፈ ጉየ፥ ይሁዳ ካዎይ አማስያስ ባና ዞርያ አሳታራ ዞረትድ፥ እስራኤለ ካዋ እዩ ናኣ ናኣ፥ እዮአካዛ ናኣ፥ እዮኣሳኮ አሰ ኪትድ፥ "ሃያ፤ አነ ናምአይ ኦላ ጋሄቶስ" ያግድ ማንድስ።

18 እስራኤለ ካዎይ እዮኣስ ይሁዳ ካዋ አማስያሳኮ ሀይሳዳ ያግስ፤ "ልባኖሰን ደእያ ክንቾተይ ልባኖሰን ደእያ ዝጋኮ ኪታ የድድ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶእ ያራ አሸ ክንቾትያ የስ። 19 ‘ታኒ ኤዶመ ፆናስ’ ጋዳ ነ ዎዛናን ኦቶሮን ኩማዳሳ። ሽን ሀእ ነ ሶን ዎፑ ጋዳ ኡታ፤ ነ ቦላነ ይሁዳ ቦላ መቶነ ዮ ኤሀናዉ አይስ ደንይ?" ያግድ ዛርስ።

20 ሽን አማስያስ ስኦና እፅስ። ኤንቲ ኤዶመ ፆሳታ ጎይንዳ ግሾ ፆሳይ ኤንታ፥ ኤንታ ሞርከታ ኩሸን አድ እማናዉ ኮይስ። 21 ሄሳ ግሾ፥ እስራኤለ ካዎይ እዮኣስ ኦላናዉ ከይን እነ ይሁዳ ካዎይ አማስያስ ይሁዳን ደእያ ቤት-ሳሜሳን ኦላ ጋሄትዶሶና። 22 ይሁዳ አሳይ ፆነትዶሶና፤ ይሁዳ አሳ ኡባይ ባቃትድ ባንታ ሶ ሶ ብዶሶና። 23 ካዎይ እዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳን ድእድ፥ የሩሳላመ ኤህስ። ኤፍሬማ ድርሳ ፐንግያፈ ብድ ማዛነ ፐንግያ ጋካናዉ ደእያ ኦይዱ ፄቱ ዋ ግድያ የሩሳላመ ድርሳ ግምብያ ላልስ። 24 ፆሳ ኬን ደእያ ዎርቃነ ብራ ኡባ፥ ኦቤድ-ኤዶመይ ናግያ ሚሽያነ ካዎ ጋን ደእያ ሚሽያ ኡባ ኤክስ፤ ቃስ ኦይ ኦድ ኦይክዳ አሳታ ኤክድ ሳማረ ስምስ።

25 እዮአካዛ ናአይ፥ እስራኤለ ካዎይ እዮኣስ ሀይቅዳፐ ጉየ እዮኣሳ ናአይ፥ ይሁዳ ካዎይ አማስያስ ታማነ እቻሹ ላይ ደእስ። 26 አማስያስ ኦዳባ ኡባይ ኮይሮፐ ዉርሰ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትድ ደኤስ ግደኔ? 27 አማስያስ ጎዳ ካሎ አግዳፐ ጉየ ኤንቲ እያ ቦላ የሩሳላመን ማቀትዶሶና። እ ላክሶ ባቃትስ። ሽን ኤንቲ እያ ጌዶ አሰ ኪትን ኤንቲ እያ ያን ዎዶሶና። 28 እያ አሀ ፓራን ጫን ኤህድ፥ ዳዊታ ካታማን እያ ማይዛታራ ሞግዶሶና።