ሳባ ካውዉ
(1 ካዎ 10:1-13)
1 ሳባ ካውያ ሶሎሞነ ዎርያ ስአዳ፥ ሰመንከን እያ ፓጫናዉ ሳዎ፥ ዳሮ ዎርቃነ አልኦ ሹቹ ጫነትዳ ዳሮ ግማለራ፥ ዳሮ አዣባን የሩሳላመ ባሱ። ባ ዎዛናን ደእያባ ኡባ ሶሎሞነስ ኦዳሱ። 2 ሶሎሞነይ እያ ኦይችዳባ ኡባስ ዛሮ እሚስ፤ እ እዉ ብርሾና እያፐ ጌምድ አትዳባይ አይብካ ባዋ። 3 ሳባ ካውያ ሶሎሞነ ጭንጫተ፥ እ ኬፅዳ ጋዋ፥ 4 እያ ጋይታን ሺቅያ ካ፥ እያ ሞርናት ኡትያ ኡተ፥ እያ ኦሳንቾት ኦያ ኦሱዋነ ማእያ ማኡዋ፥ እያ ኡሻ ትግያ አሳት ማእያ ማኡዋነ ጎዳ ኬን እ ያርሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።
5 እያ ካዋኮ፥ "ነባነ ነ ጭንጫተ ታኒ ታ ቢታን ደአሸ ስእዳይስ ቱማ። 6 ሽን ታ ያዳ ታ አይፈን በአና ጋካናዉ ኤንቲ ታዉ ኦድዳባ አማናብከ። ነ ጭንጫተ ግታተስ ባጋካ ታዉ ኦድቦኮና፤ ታ ስእዳይሳፈ ነ ዳሮ ግታታሳ። 7 ኡባ ዎደ ነ ስንን ኤቅድ ነ ጭንጫተ ስእያ ነ አሳትነ ነ ሞርናት አይ መላ አንጀትዶና! 8 ነናን ኡፋይትድ፥ ነና ባ ካዎተ አራታን ኡትስዳ ጎዳይ ነ ፆሳይ ጋላተቶ! ነ ፆሳይ እስራኤለ ሲቅዳ ግሾነ መርናዉ ምን ኤሳናዉ ኮይዳ ግሾ ኔኒ ሱረ ፕርዳነ ፅሎተ ኦና መላ እ ነና ኤንታ ቦላ ካዎ ኦስ" ያጋሱ።
9 ካውያ ኦይዱ ሙኩሉ ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ፤ ሳባ ካውያ ካዋ ሶሎሞነስ እምዳ ሽቱዋ መላ ሽቶይ ባዋ።
10 ቃስ ኦፍራፐ ዎርቃ ኤህዳ ክራማነ ሶሎሞነ አሳት ያፐ ሰንዳለ ምነ አልኦ ሹቹ ኤህዶሶና። 11 ካዎይ ሳንዳለ ም ፆሳ ኬስነ ካዎ ጋስ ደ መናዉ፥ ሄሳዳካ ዛማረታስ ማስንቆነ ዲ ኦናዉ ጎኤትስ። ሄሳ መላ የ ሚሸት ሃይሳፈ ካሴ ይሁዳ ቢታን በንትቤና።
12 ካዎይ ሶሎሞነይ ሳባ ካውያ ኮይዳባነ ኦይችዳባ ኡባ እዉ እሚስ። እያ፥ እያዉ ኤህዳይሳፈ አድ እዉ እሚስ። ሄሳፈ ጉየ፥ ሳባ ካውያ ባ አዣባራ ደንዳዳ ባ ቢታ ስማሱ።
ሶሎሞነ አቁዋ
(1 ካዎ 10:14-25)
13 ሶሎሞነይ ላይን ላይን ኤክያ ዎርቃይ ላታማነ ሄ ሙኩሉ ክሎ ግራመ። 14 ሄስካ ዛልአንቾታፐ ኤክያ ቃራፃ፥ አራበ ቢታ ካዎታፐነ እስራኤለ ቢታን ሃረይሳታፐ ኤክያ ዎርቃነ ብራ ጉጆናሽና። 15 ካዎይ ሶሎሞነይ እስ እስ ጎንዳለይ ላፑን ክሎ ግራመ ግድያ ናምኡ ፄቱ ዎጋ ጎንዳለታ ዎርቃፈ ኦስስስ። 16 እሶይ እሶይ ሄ ክሎ ግራመ ግድያ ሄ ፄቱ ጉ ጎንዳለታ ዎርቃፈ ኦስስስ። ካዎይ ሄ ጎንዳለታ "ልባኖሰ ዎራ" ጌተትያ ካዎ ጋን ዎስ።
17 ካዎይ ዳንጋርሳ ዛለፐ እስ ግታ አራታ ኦስስድ ዋላህ ባይና ዎርቃን ላንፅስ። 18 አራታይ ደእያ በሳ ከያናዉ የያ ኡሱፑን ደት ደኦሶና። አራታራ ኦይከትድ ኡትዳ ዎርቃፈ ኦሰትዳ ቶሆ የያ በሲ ደኤስ። አራታስ ናምኡ ባጋራ ኩሸ ሸምፕስያ ዘምፖት ደኦሶና፤ ሄ ዘምፖታ ማታራ ያ ባጋንነ ሀ ባጋን ኤቅዳ እስ እስ ጋሞ ምስለይ ደኤስ። 19 ሄ አራታይ ደእያ በሳ ከይያ ኡሱፑን ደታ ቦላ ያ ባጋራነ ሀ ባጋራ ኤቅዳ ታማነ ናምኡ ጋሞ ምስለት ደኦሶና። ሄሳ መላ አራት ሀራ ካዎተን አዉንካ ኦሰትቤና።
20 ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ "ልባኖሰ ዎራ" ጌተትያ ካዎ ጋን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብር ዳርዳ ግሾ ታይቦን ገለና። 21 ካዋስ ክራማ አሳት ላግያ ዛልኤ ማርካበታ ደኦሶና። ሄ ማርካበት ዎርቃነ ብራ፥ ዳንጋርሳ ዛለ፥ ቃረታነ ገለሾታ ጫንድ ሄ ላይፈ እስ ቶሆ ኤሆሶና።
22 ካዎይ ሶሎሞነይ ዱረተንነ ጭንጫተን ሳአን ደእያ ካዎታ ኡባፈ አስ። 23 ሳአን ደእያ ካዎት ኡባይ ፆሳይ እያ ዎዛናን ዎዳ ጭንጫተ ስአናዉ ኮዮሶና። 24 ላይን ላይን እያኮ ያ ኡባይ እያዉ ዎርቃነ ብራ፥ ማኦታ፥ ኦላ ሚሸ፥ ሽቶ፥ ፓራነ ባቁሎታ እሞታ ኤሆሶና።
25 ሶሎሞነ ፓራታስነ ጋረታስ ኦይዱ ሙኩሉ ዛዳሎት ደኤስ፤ ታማነ ናምኡ ሙኩሉ ፓራ አሳት ደኦሶና። ሶሎሞነይ ሄሳታ ዱማ ዱማ ካታማታንነ የሩሳላመን ዎስ። 26 ሶሎሞነይ ኤፍራፂሳ ሻፋፐ ዶምድ፥ ፍልስፄመ ቢታነ ግብፀ ዛዋ ጋካናዉ ደእያ ካዎታ ኡባ ሃርስ። 27 ካዎይ የሩሳላመን ብር ሹቻዳ ኬለታናዳ ዝጋ ም ይሁዳ ዙማታ ፃጶን ድጭያ ቦባዳ ዳራና መላ ኦስ። 28 ሶሎሞነይ ፓራታ ግብፀፈነ ሀራ ቢታ ኡባፈ ኤህሴስ።
ሶሎሞነ ሀይቁዋ
(1 ካዎ 11:41-43)
29 ኮይሮፐ ዉርሰ ጋካናዉ ሶሎሞነ ታርከይ ናብያ ናታና ታርከ ማፃፋን፥ ሴሎ አድያ ናብያ አክያ ማፃፋንነ ናባፃ ናኣ እዮርባማ ዎደ ጋካናዉ ደእያ ናብያ እዶ ቆንጨ ማፃፋን ፃፈትስ ግደኔ? 30 ሶሎሞነይ እስራኤለ ቦላ የሩሳላመን ኦይታሙ ላይ ካዎትስ። 31 ሄሳፈ ጉየ፥ ሶሎሞነይ ሀይቅድ ባ ማይዛታን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።