2 ታርከ ማፃፋ 16

ካዋ አሳ ዉርሰ ላይታ

1 አስ ካዎትዳ ሀስታማነ ኡሱፑን ላይን እስራኤለ ካዎይ ባኦስ ይሁዳ ቦላ ደንድስ። ይሁዳ ካዋ አሳኮ ኦንካ ገሎና መላነ ከዮና መላ ተቃናዉ ራማን ሚፃ ኬፅስ። 2 ካዎይ አስ ፆሳ ኬንነ ባ ካዎ ጋን ደእያ ቡቁራ ምንጅያ ኬፈ ዎርቃነ ብራ ኤክድ ዳማስቆን ደእያ ሶረ ካዋ ዎልደ-አዳራስ ሀይሳዳ ያግድ የድስ። 3 "ካሰ ታ አዋራነ ነ አዋራ ጫቅዳይሳዳ ታራነ ኔራ ጫቆስ። ሄኮ፥ ታ ነዉ ብራነ ዎርቃ የዳስ። እስራኤለ ካዎይ ባኦስ ባ ኦላንቾታ ታ ቢታፈ ከሳና መላ ነ ካሰ እያራ ጫቅዳ ጫቁዋ ላላ" ያግስ።

4 ካዎይ ዎልደ-አዳር፥ አስ ግዳይሳ ኤክድ ባ ቶራ ሞጮናታ እስራኤለ ኦላና መላ የድስ። ኤንቲ እዮና፥ ዳነነ አቤል-ማይማ ጌተትያ ካታማታነ ንፍታለመ ቢታን ደእያ ቡቁራ ምንጅያ ካታማታ ኡባ ፆንዶሶና። 5 ባኦስ ሄሳ ስእድ ራማን ኦያ ሚፃ አጋግስ።

6 ካዎይ አስ ይሁዳ አሳ ኡባ ሺሽስ፤ አሳይ ባኦስ ካሰ ያን ጎኤትያ ሹቻነ ም ራማፐ ኤክድ ግብአነ ምፅጳ ካታማታን ሚፃ ኬፅስ።

7 ሄ ዎደ ቆንጨ በእያ አናን ይሁዳ ካዋ አሳኮ ይድ፥ "ኔኒ ሶረ ካዋን አማነታዳ፥ ጎዳን ነ ፆሳን፥ አማነታቦና ግሾ ሶረ ካዋ ኦላንቾት ነ ኩሸፐ ከስ ኤክዶሶና። 8 ቶጰነ ሊበ አሳት ዳሮ ፓራ ጋረትነ ፓራት ደእያ ዳሮ ኦላንቾታ ግዶኮናዬ? ሽን ኔኒ ጎዳን አማነትዳ ግሾ ጎዳይ ኤንታ ነ ኩሸን አድ እሚስ። 9 ባ ኩመ ዎዛናን ጎዳን አማነትያ አስ ምንናዉ ጎዳ አይፈይ ሳኣ ኡባ ፄሌስ። ኔኒ ኤያተ ኦሶ ኦዳ ግሾ ህዛፐ ኦል ኔፐ ሻከተና" ያግስ።

10 አስ ቆንጨ በእያ ኡራ ቦላ ዳሮ ሀንቀትዳ ግሾ እያ ሳንላታን ቃችድ ቃሾ ኬን የግስ። አስ ሄ ዎደ እስ እስ አሳታ ዳሮ ኡንኤስ።

11 ሄኮ፥ አስ ኦዳባይ ኮይሮፐ ዉርሰ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ። 12 አስ ካዎትዳ ሀስታማነ ኡዱፉን ላይን ቶሆ ሳከትስ፤ ሳሆይ ዳርኮካ፥ እ አክመታ ኮይስፐ አትሽን፥ ጎዳ ኮይቤና። 13 አስ ካዎትዳ ኦይታማነ እስን ላይን ሀይቅድ ባ ማይዛታ ጋክስ። 14 ኤንቲ እያ ዳዊታ ካታማን ዛላ ዎጭድ ከስዳ ዱፎን ሞግዶሶና። እያ አሀ ዱማ ዱማ ሽቶን ትየትዳ አርሳ ቦላ ዎዶሶና። ኤንቲ እያ ቦንቹዋስ ዳሮ ም ዶር ኤድ ዬክዶሶና።