ይሁዳ ካዋ ምናሰ
(2 ካዎ 21:1-9)
1 ምናሰይ ካዎትያ ዎደ እያዉ ላይ ታማነ ናምአ፤ እ የሩሳላመን እሻታማነ እቻሹ ላይ ካዎትስ። 2 ጎዳይ እስራኤለ አሳ ስንፈ ጎድድ ከስዳ አሳ፥ እፀትዳ ኦግያ ካልድ ጎዳ ስንን ኢታባ ኦስ። 3 ምናሰይ ባ አዋይ ህዝቅያስ ላልዳ፥ ቃ ጎይኖ በሳታ ዛሪድ ኬፅስ። ባኣለ ያርሾ በሳታነ አሼራ ጌተትያ ኤቃ ምስለታ መስ፤ ሳሎ ፆልንቶታ ጎይንስ፤ ኤንታዉ ጉፋንስ። 4 ጎዳይ፥ "ታ ሱንይ መርናዉ የሩሳላመን ዳና" ያግድ ዎዳ ፆሳ ኬን ምናሰይ ሀራ ፆሳታስ ያርሾ በሲ ጊግስስ። 5 ፆሳ ኬን ደእያ ናምኡ ዳባባታን ሳሎ ፆልንቶት ጎይነትያ ያርሾ በሲ ጊግስስ። 6 ህኖማ ዛንጋራን ባ አደ ናይታ ታማን ፁግድ ያርሽስ። እ ብታነ ሙሩኖ ኦስ፤ ማሮስ፤ ሞይትለነ ቱና አያና ዞረ ኦይችስ። ጎዳ ስንን ዳሮ ኢታባ ኦድ ፆሳ ይሎይስ።
7 ባ ኦዳ ኤቃ ምስልያ ኤፍድ ፆሳ ኬን ኤስስ። ሄ ፆሳ ኬይ፥ ፆሳይ ዳዊታስነ እያ ናኣ ሶሎሞነስ፥ "እስራኤለ ዛረ ኡባ ግዶፈ ታኒ ዶርዳ ፆሳ ኬንነ የሩሳላመን ታ ሱን መርናዉ ፄግሳና። 8 ሙሰ ባጋራ ታ እስራኤለ አሳ ኪትዳ ኪታ፥ ህግያነ ዎጋ ኡባ ኤንቲ ናግኮ፥ ታኒ ኤንታ ማይዛታስ እምዳ ቢታፈ ኤንታ ሾድከ" ያግስ። 9 ሽን ምናሰይ ይሁዳ አሳነ የሩሳላመ አሳ ባለድ፥ ጎዳይ እስራኤለ አሳ ስንፈ ይስዳ ሀራ ካዎተታፐ አያ ኢታ ኦና መላ ኦስ።
10 ጎዳይ ምናሰስነ እያ አሳስ ኦድስ፤ ሽን ኤንቲ እያ ስኦና እፅዶሶና። 11 ሄሳ ግሾ፥ ጎዳይ አሶረ ኦላንቾታ ኤንታ ቦላ ደንስ። ኤንቲ ምናሰ ስን ዳፎ አድ ኦይክዶሶና፤ ናሰ ብራታ ሳንላታን ቃችድ፥ ባብሎነ ኤፍዶሶና። 12 ምናሰይ ኡንኤትዳ ዎደ ጎዳ ባ ፆሳ ማዶ ዎስስ፤ ባ አዋታ ፆሳ ስንን ባናተ ዳሮ ካዉሽስ። 13 ፆሳይ ምናሰ ዎሳ ስእስ፤ የሩሳላመ ስሚድ ዛሪድ ካዎታና መላ ኦስ። ጎዳይ ቱማ ፆሲ ግደይሳ ምናሰይ ሄሳን ኤርስ።
14 ሄሳፈ ጉየ፥ ምናሰይ ግዮነ ፑልቱዋ ማታን ደእያ በሳፈ ዶምድ ኦፌላ ደርያራ ካንድ ሞሎ ፐንገ ጋካናዉ ካረ ባጋራ ሀራ ድርሳ ግምበ ግምብስ። ሄ ግምበይ ዳዊታ ካታማፐ ዶሎሀ ባጋራ ደእያ ዛንጋራን ደኤስ። ይሁዳ ካታማታ ኡባን ቶራ ሞጮናታ ዎስ።
15 አላጋ ፆሳታነ ኤቃ ምስለታ ፆሳ ኬፈ ድግስ፤ ፆሳ ኬይ ደእያ ዙማ ቦላነ የሩሳላመን ደእያ ያርሾ በሳታ ላልድ ሄ ካታማፐ ካረ ከስድ የግስ። 16 ምናሰይ ጎዳ ያርሾ በሲ ኦራድ እስፈተ ያርሾነ ጋላታ ያርሾ ያን ያርሽስ። ይሁዳ አሳይ ጎዳ እስራኤለ ፆሳ ጎይናና መላ ኪትስ። 17 አሳይ ቃ ጎይኖ በሳታን ያርሾ ያርሸይሳ አጎና እፅኮካ፥ ኤንቲ ያርሸይ ጎዳ ባንታ ፆሳ ፃላላሳ።
18 ምናሰ ኦዳ ሀራባይ፥ ባ ፆሳ ዎስዳ ዎሳይነ ጎዳ እስራኤለ ፆሳ ሱንን ናበት እያዉ ኦድዳ ቃላይ እስራኤለ ካዎታ ታርከ ማፃፋን ፃፈትስ። 19 ሄኮ፥ ምናሰ ዎሳይነ ፆሳይ እያዉ ዛርዳ ዛሮይ፥ እ ኦዳ ናጋራይነ ምናሰይ ባና ካዉሻናፐ ስን ኦዳ ቃ ጎይኖ በሳታባይ፥ አሼር ኤቃ ምስለታባይነ ኤቃታባ ኡባይ ናበታ ታርከ ማፃፋን ፃፈትስ። 20 ምናሰይ ሀይቅድ ባ ማይዛታ ጋክስ፤ እያ ካዎ ጋን ሞግዶሶና። እያ በሳን እያ ናአይ አሞፀይ ካዎትስ።
ይሁዳ ካዋ አሞፀ
(2 ካዎ 21:19-26)
21 አሞፀይ ካዎትያ ዎደ እያዉ ላይ ላታማነ ናምአ፤ እ የሩሳላመን ናምኡ ላይ ካዎትስ። 22 እያ አዋይ ምናሰይ ኦዳይሳዳ እካ ጎዳ ስንን ኢታባ ኦስ። እያ አዋይ ምናሰይ ጎይንዳ ኤቃታ ጎይንስ፤ ኤንታዉ ያርሽስ። 23 ሽን እያ አዋይ ምናሰይ ባናተ ካዉሽዳይሳዳ እ ባናተ ጎዳ ስንን ካዉሽቤና፤ አሞፀይ ጉጅ ጉጅ ናጋራ ኦስ።
24 አሞፀ ሹማት እያ ቦላ ማቀትድ፥ ካዎ ጋን እያ ዎዶሶና። 25 ይሁዳ አሳይ ካዋ አሞፀ ቦላ ማቀትዳ ኡባ ዎድ፥ አሞፀ በሳን እያ ናኣ እዮስያሳ ካዎዶሶና።