ፓስካ ባኣለ ቦንቾ
1 ህዝቅያስ ጎዳ እስራኤለ ፆሳ ፓስካ ባኣለ ቦንቻናዉ የሩሳላመን ደእያ ፆሳ ኬ እስራኤለ አሳይነ ይሁዳ አሳይ ያና መላ ኪትስ። ቃስ፥ ኤፍሬማ አሳስነ ምናሰ አሳስ ዳብዳበ ፃፍስ። 2 ካዎይ፥ ሀላቃትነ የሩሳላመን ሺቅዳ አሳ ኡባይ ፓስካ ባኣለ ናምአን አጌናን ቦንቻናዉ ቆፋ ቃችዶሶና። 3 ግድያ ካህነት ባንታና ጌሽቦና ግሾነ ዳሮ አሳይ የሩሳላመን ሺቅቦና ግሾ አሳይ ፓስካ እያ ዎደን ቦንቻናዉ ዳንዳእቦኮና። 4 ሄ ቆፋይ ካዋነ ሺቅዳ አሳ ኡፋይስስ። 5 ሄሳ ግሾ፥ ጎዳ እስራኤለ ፆሳ ፓስካ የሩሳላመን ቦንቻናዉ በርሳበፐ ዶምድ ዳነ ጋካናዉ ደእያ እስራኤለ አሳ ኡባይ ያና መላ አዋጃናዉ ቆፋ ቃችዶሶና። ሀ ፓስካ ባልያ ካሰ ህግያን ፃፈትዳይሳዳ ዳሮ አስ ቦንችቤና።
6 ካዎይ ኪታን፥ ኪተትዳይሳት፥ ካዋነ ሹማታ ዳብዳብያ ኤክድ እስራኤለነ ይሁዳ ኡባ ብዶሶና።
ዳብዳበይ ሀይሳዳ ያጌስ፤ "እስራኤለ አሳዉ፥ አሶረ ካዋ ኩሸፐ አትዳ ህንተኮ ስማና መላ ህንተካ ጎዳኮ፥ አብራሃመ፥ ይሳቃነ እስራኤለ ፆሳኮ ስምተ! 7 ህንተ ካሰ በእዳይሳዳ ኤንታ ቦረስ አድ እማና ጋካናዉ ባንታ ጎዳስ፥ ባንታ አዋታ ፆሳስ አማነትቦና ህንተ አዋታዳነ ህንተ እሻታዳ ሀኖፕተ። 8 ህንተ ጎዳስ ኪተትተ፤ ካሰ ህንተ አዋታዳ ስእሸ እፃስ ጎፕተ! ህንተናተ ፆሳስ እምተ። ጎዳይ መርናዉ ጌሽዳ ፆሳ ኬ ዪተ። ጎዳ ሀንቆይ ህንተፈ ስማና መላ ጎዳ ህንተ ፆሳ ጎይንተ። 9 ህንተ ጎዳኮ ስምኮ ህንተ እሻትነ ህንተ ናይት ባንታና ድእዳይሳታ ስንን ማሮታ ደምድ ሀ ቢታ ስማና። ጎዳይ ህንተ ፆሳይ ቃተይሳነ ማረይሳ ግድያ ግሾ ህንተ እያኮ ስምኮ ባ ሶምኡዋ ህንተፈ ቆሰና" ያግስ።
10 ኪተትዳይሳት ኤፍሬማነ ምናሰ ቢታ ካንድ ዛብሎና ቢታ ጋካናዉ ካታማፐ ካታማ ብዶሶና። ሽን ሄ ካታማታን ደእያ አሳይ ኤንታ ካድ ኤንታ ቦላ ሚጭዶሶና። 11 ግዶሽን፥ አሴራፐ፥ ምናሰፐነ ዛብሎና ጉ አሳት ባንታና ካዉሽድ የሩሳላመ ይዶሶና። 12 ካዎይነ ካዋ ሹማት ጎዳ ቃላ ማራን ኪትዳይሳ ፖላናዉ እስ ዎዛናን ግዳና መላ ፆሳ ኩሸይ ይሁዳ ቦላ ደኤስ።
13 ናምአን አጌናን ኡይ ባኣለ ቦንቻናዉ ዳሮ አስ የሩሳላመን ሺቅስ። 14 ኤንቲ ደንድድ፥ የሩሳላመን ደእያ ያርሾ በሳታ ላልድ፥ እፃነ ጩይስያ ሚሸ ኡባ ድግድ፥ ቀድሮና ዛንጋራን የግዶሶና። 15 ናምአን አጌናን፥ ታማነ ኦይዳን ጋላሳን ፓስካ ዶርሳ ሹክዶሶና። ባንታና ጌሽቦና ካህነትነ ሌወት ዬላትድ፥ ባንታና ጌሽዶሶና፤ ፁሳ ያርሾ ፆሳ ኬ ኤህዶሶና። 16 ፆሳ አስ ግድዳ ሙሰ ዎጋዳ ፆሳ ኬ ግዶን ባንታ በሳን በሳን ኤቅዶሶና፤ ካህነት ሌወታ ኩሸፐ ኤክዳ ሱ ርጭዶሶና።
17 አሳ ግዶፈ ዳሮት ባንታና ጌሽቦና ግሾነ ዶርሳታ ሹኮና መላ ድገትዳ ግሾ ሌወት ኤንታዉ ፓስካ ዶርሳታ ሹክዶሶና። 18 ኤፍሬማፐ፥ ምናሰፐ፥ ይሳኮራፐነ ዛብሎና ኮቻፈ ዳሮ አሳይ ህገይ ኪተይሳዳ ባንታና ጌሽቦናባ ግድኮካ ፓስካ ባኣለ ግብራ ምዶሶና። ግዶሽን፥ ካዎይ ህዝቅያስ፥ "አቤት ኬሀ ጎዳዉ፥ 19 ህገይ ኪተይሳዳ ሀይሳቲ ባንታና ጌሾናባ ግድኮካ ኤንቲ ነና ጎዳ፥ ባንታ አዋታ ፆሳ ኮያናዉ ባንታ ዎዛና ጊግስዳ ግሾ ነ ኤንታዉ አቶ ያጋ" ያግድ ዎስስ። 20 ጎዳይ ህዝቅያሳ ዎሳ ስእድ ኤንታዉ አቶ ግስ።
21 የሩሳላመን ሺቅዳ እስራኤለ አሳይ ላፑን ጋላስ ኩመ ኡይ ባልያ ግታ ኡፋይሳን ቦንችዶሶና። ሌወትነ ካህነት የ ሚሸን የፅሸ ጋላስ ጋላስ ጎዳ ጋላቶሶና። 22 ህዝቅያስ ጎዳ ጎይኖ ዎጋ ካለሶን ኤረትዳ ሌወታ ምንስ።
አሳ ኡባይ እስፈተ ያርሾ ያርሽሸ፥ ጎዳ ባንታ አዋታ ፆሳ ጋላትሸ፥ ምሸነ ኡይሸ ባኣለ ላፑን ጋላስ ቦንችዶሶና። 23 ሺቆይ ሀራ ላፑን ጋላስ ጉጅድ ባኣለ ቦንቻናዉ ዞረ ቃችድ ላፑን ጋላስ ኡፋይትድ ቦንችዶሶና። 24 ይሁዳ ካዎይ ህዝቅያስ ያርሾ ያርሻናዉ እስ ሙኩሉ ኮርማታ፥ ላፑን ሙኩሉ ዶርሳታነ ዴሻታ አሳስ እሚስ፤ ቃስ ሀላቃት እስ ሙኩሉ ኮርማታነ ታሙ ሙኩሉ ዶርሳታ አሳስ እምዶሶና፤ ዳሮ ካህነት ባንታና ጌሽዶሶና። 25 ይሁዳ አሳይ፥ ካህነት፥ ሌወት፥ እስራኤለፐ ይዳ አሳይ፥ ባኣለ ቦንቻናዉ ይዳ በተ አሳይነ ይሁዳ ቢታን ደእዳ አሳ ኡባይ ኡፋይትዶሶና። 26 ዳዊታ ናኣ፥ እስራኤለ ካዋ ሶሎሞነ ዎድያፐ ዶምን ሀች ጋካናዉ የሩሳላመን ሄሳ መላ ባለይ ቦንቸትድ ኤሮና ግሾ የሩሳላመን አሳይ ዳሮ ኡፋይትዶሶና። 27 ካህነትነ ሌወት ደንድድ፥ ጎዳይ አሳ አንጃና መላ ዎስን ፆሳይ ሳሎን፥ ባ ደእያ ጌሻ በሳን ኤንታ ዎሳ ስእስ።