ሽሻቅ የሩሳላመ ቦላ ደንድስ
(1 ካዎ 14:25-28)
1 ሮብኣማ ካዎተይ ምንድ ኤቅዳ ዎደ እነ እስራኤለ አሳ ኡባይ ጎዳ ህግያ አጋግዶሶና። 2 ኤንቲ ጎዳስ አማነቶና እፅዳ ግሾ ሮብኣም ካዎትዳ እቻሻን ላይን ግብፀ ካዎይ ሽሻቅ የሩሳላመ ቦላ ደንድስ። 3 እያዉ እስ ሙኩሉነ ናምኡ ፄቱ ፓራ ጋረት፥ ኡሱፑን ታሙ ሙኩሉ ፓራ አሳትነ ታይቦይ ባይና ሊበ፥ ሱካነ ቶጰ ኦላንቾት ደኦሶና። 4 ካዎይ ሽሻቅ ግምበትዳ ይሁዳ ካታማታ ኦይክድ የሩሳላመ ጋካናዉ ይስ።
5 ሄሳፈ ጉየ፥ ናበይ ሻማየይ ሮብኣማነ ሽሻቃ ያይድ የሩሳላመን ሺቅድ ደእያ ይሁዳ ሀላቃታኮ ይድ፥ "ጎዳይ፥ ‘ህንተ ታና አግዳ ግሾ፥ ታ ህንተና ሽሻቃ ኩሸን የጋስ’ " ያግስ።
6 እስራኤለ ሀላቃትነ ካዎይ ሮብኣም፥ ባንታና ካዉሽድ፥ "ጎዳይ ፅሎ" ያግዶሶና።
7 ኤንቲ ባንታና ካዉሽዳይሳ ጎዳይ በእዳ ዎደ ሻማያኮ ሀይሳዳ ያግስ፤ "ኤንቲ ባንታና ካዉሽዳ ግሾ ታ ኤንታ ይስከ፤ ታ ኤንታ አሻና። ታ ሀንቆይ ሽሻቃ ባጋራ የሩሳላመ ቦላ ጉከና። 8 ግዶሽን፥ ታዉ ሃረተይሳንነ ሀራ ካዎታስ ሃረተይሳን ደእያ ዱማተ ኤንቲ ኤራና መላ ሽሻቃስ ሃረታና" ያግስ።
9 ግብፀ ካዎይ ሽሻቅ የሩሳላመ ኦልድ፥ ፆሳ ኬንነ ካዎ ጋን ደእያ ሻሎ ኡባ ኤክስ። ሶሎሞነይ ዎርቃፈ ኦስስዳ ጎንዳለታ ቦንቅስ። 10 እ ኤፍዳ ዎርቃ ጎንዳለታ ግሾ ካዎይ ሮብኣም ናሰ ብራታፐ ሀራ ጎንዳለታ ኦስስድ ካዎ ጋ ፐንገ ናገይሳታ ሀላቃታ ኩሸን ዎስ። 11 ካዎይ ፆሳ ኬ ገልያ ዎደ ኡባን ፐንግያ ናገይሳት ሄ ጎንዳለታ ኦይክድ እያ ካሎሶና። ካዎይ ስምኮ ኤንቲ ዛሪድ ናገይሳታ ኬን ዎሶና። 12 ሮብኣም ባና ካዉሽዳ ግሾ እ ዮና መላ ጎዳ ሀንቆይ እያፐ ስምስ። ይሁዳ ቢታ ኡባን ቃስ ሳእ እንጀትስ።
13 ካዎይ ሮብኣም ባና ምንድ የሩሳላመን ካዎትስ፤ ሮብኣም ካዎትዳ ዎደ እያዉ ላይ ኦይታማነ እስኖ። ጎዳይ ባ ሱንይ ያን ፄገታና መላ እስራኤለ ቢታ ኡባን ዶርዳ፥ የሩሳላመን ታማነ ላፑን ላይ ካዎትስ። ሮብኣማ አይያ አሞነ ማጫስ ናእሞ። 14 ሮብኣም ጎዳ ዎዛናፐ ጎይናናዉ ኮይቦና ግሾ ኢታባ ኦስ።
15 ሮብኣም ባ ካዎተ ዎድያን ኦዳባይ ኮይሮፐ ዉርሰ ጋካናዉነ እያ የለታ ማራይ፥ ናብያ ሻማያ ታርከ ማፃፋንነ ቆንጨ በእያ እዶ ታርከ ማፃፋን ፃፈትስ ግደኔ? ሮብኣም ነ እዮርባም ኡባ ዎደ ኦለትሸ ደእዶሶና። 16 ሮብኣም ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አብይ ካዎትስ።