ሶሎሞነይ ፆሳ ኬ ኬፁዋ
1 ሶሎሞነ አዋይ ዳዊቲ ፆሳ ኬይ ኬፀታና በሳ ሞረ ደርያን የሩሳላመን ጊግስስ። ሄ በሳይ ጎዳይ ዳዊታስ ቆንጭዳ ያቡሰ አድያ ኦርና ዉዱማ። 2 ሶሎሞነይ ባ ካዎትዳ ኦይዳን ላይን፥ ናምአን አጌናን ፆሳ ኬ ኬፃናዉ ዶምስ።
3 ሶሎሞነይ ፆሳ ኬ ኬፃናዉ ባስዳ ባሱዋ አዱሳተይ ኡሱፑን ታሙ ዋ፤ ጎምፓይ ላታሙ ዋ። 4 ፆሳ ኬ ገልያ በሳን ደእያ ባራንዳ ጎምፓይ ፆሳ ኬ ጎምፓዳ ላታሙ ዋ፤ አዱሳተይ ላታሙ ዋ። 5 ፐንገ ጎዳ ፂዳ ፃላላን ልጭድ ካምስ፤ ጌሻ ዎርቃን ትይስ፤ ዛምባ ምስለነ ሳንላታ ምስለን አሌቅስስ። 6 ፆሳ ኬ አልኦ ሹቻን አሌቅስስ፤ እ አሌቅስዳ ዎርቃይ ፓርዋይማ ቢታፈ ይዳ ዎርቃ። 7 ጎዳታ፥ ቱቀታ፥ ጎባነታነ ፐንገታ ዎርቃን ትይስ፤ ጎዳ ቦላ ክሩበ ምስለ መስ።
8 ሶሎሞነይ ኡባፈ ጌሻ በሳ ኬፅስ። ሄ በሳ አዱሳተ ፆሳ ኬ ጎምፓዳ ላታሙ ዋ፤ ጎምፓይ ላታሙ ዋ። ሄ በሳ ጎዳ ላታሙ ሙኩሉ ክሎ ግራመ ሙሩቶ ዎርቃን ትይስ። 9 ኤንቲ ጎኤትዳ ምስማረይ እቻሹ ፄታነ ላፑን ታሙ ግራመ ዎርቃፈ መትስ። ፖቀን ደእያ ክፍለታካ ዎርቃን ትይስ።
10 ሶሎሞነይ ኡባፈ ጌሻ በሳን ናምኡ ክሩበ ምስለታ ጊግስድ ዎርቃን ትይስ። 11 ሄ ክሩበታ ቀፈይ ምጨትድ፥ ላታሙ ዋ፤ ኮይሮ ክሩብያ ኮይሮ ቀፈይ እቻሹ ዋ ግድድ፥ ፆሳ ኬ ጎዳ ቦቼስ፤ ናምአን ቀፈይ እቻሹ ዋ ግድድ፥ ሀራ ክሩብያ ቀፍያ ቦቼስ። 12 ናምአን ክሩብያ ኮይሮ ቀፈይ እቻሹ ዋ ግድድ፥ ፆሳ ኬ ጎዳ ቦቼስ፤ ናምአን ቀፈይ እቻሹ ዋ ግድድ፥ ኮይሮ ክሩብያ ቀፍያ ቦቼስ። 13 ሀ ናምኡ ክሩበታ ቀፈይ ምጨትድ፥ ላታሙ ዋ ግድስ፤ ኤንቲ ባንታ ሶምኡዋ ጌሻ በሳኮ ዛሪድ፥ ባንታ ቶሆን ኤቅዶሶና።
14 ሶሎሞነይ ካሎሰ ማኡዋ፥ ኦቻ ቴራ ዳንያ ማኡዋፐነ፥ ዞኦ ማኡዋፐ ሊኖፐ ዳደትዳ ማኡዋፐ ማጋራጆ ኦድ፥ እያ ቦላ ክሩበታ ምስለ መስ።
15 ሶሎሞነይ ፆሳ ኬ ስንን እሱዋ እሱዋ አዱሳተይ ሀስታማነ እቻሹ ዋ ግድዳ ናምኡ ቱሳታ ኦስስድ፥ ኤንታ ሁጰን እቻሹ ዋ ጉምቦታ ዎስ። 16 ቃስ ሳንላታ ግተዳ መስድ፥ ቱሳታ ሁጰን ዎስ፤ ፄቱ ኦሮማነ ቴራ ምስለታ መስድ፥ ሳንላታ ቦላ ዎስ። 17 ቱሳታፐ እሱዋ ፆሳ ኬ ስንን ኡሻቻ ባጋራ፥ ናምአንዋ ቃስ ሀድርሳ ባጋራ ኤስስ። ኡሻቻ ባጋራ ደእያ ቱሳ ያክና ሱንድ፥ ሀድርሳ ባጋራ ደእያ ቱሳ ቦኤዛ ሱንስ።