1 ላፑን ላይን ዮዳሄይ ምንድ ማቶ ሀላቃታ ይሮሃማ ናኣ አዛርያሳ፥ ይሆና ናኣ ይስማኤላ፥ ኦቤዳ ናኣ አዛርያሳ፥ አዳያ ናኣ ማእሰያነ ዝክራ ናኣ ኤልሳፋፃ ሺሽድ ኤንታራ ጫቅስ። 2 ኤንቲ ይሁዳ ኡባ ብድ ያን ደእያ ሌወታነ እስራኤለ ያራታ ሀላቃታ ኡባ ኤክድ የሩሳላመ ይዶሶና።
3 ሄ ሺቅዳ አሳ ኡባይ ፆሳ ኬን ካዉዋራ ጫቅዶሶና። ዮዳሄይ፥ "ካዋ ናኣ ሀይሳ በእተ! ጎዳይ ካሰ ዳዊታ ኮቻስ ቃላ ገልዳይሳዳ እ ካዎቶ። 4 ህንተ ኦናዉ በሲያባይ ሀይሳ፤ ሳምባታ ጋላስ ፆሳ ኬ ገልያ ካህነታፐነ ሌወታፐ ስኮይ ፐንግያ ናግተ። 5 ቃስ ስኮይ ካዎ ጋ ናግተ፤ ስኮይ ቃስ ባሶ ፐንግያ ናግተ። አሳ ኡባይ ፆሳ ኬ ዳባባን ሺቆ። 6 ኦያ ካህነታፐነ ሌወታፐ አትሽን፥ ኦንካ ፆሳ ኬ ገሎፖ። ኤንቲ ጌሽ ግድያ ግሾ ገሎና፤ ሽን ሀራ አሳ ኡባይ ጎዳ ኪታ ናግሸ ፆሳ ኬፈ ካረራ ደኦ።
7 "ሌወት ኦላ ሚሸ ባንታ ኩሸን ኩሸን ኦይክድ ካዋ ግዶይድ እ ከይያ ዎደነ ገልያ ዎደ እያራ ግዶ። ፆሳ ኬ ገልያ ኦንካ ሀይቆ" ያግስ።
8 ሌወትነ ይሁዳ አሳ ኡባይ ካህነይ ዮዳሄይ ኪትዳ ኡባ ኦዶሶና። ካህነይ ዮዳሄይ ኦሶፐ ከያናዉ በሲያ ሌወታ ከስድ የድቦና ግሾ፥ እሶይ እሶይ ሳምባታ ጋላስ ኦሶ ገለይሳታነ ኦሶፐ ከይያ ባ አሳ ኤክስ። 9 ካህነይ ዮዳሄይ ፆሳ ኬን ደእያ፥ ካዋ ዳዊታ ቶራ፥ ግታነ ጉ ጎንዳለታ ቶራ ሞጮናታስ እሚስ። 10 ካህነይ ዮዳሄይ አሳ ኡባይ ኦላ ሚሸ ባ ኩሸን ኩሸን ኦይክድ ፆሳ ኬ ዱገሀፐ ፑደሀ ጋካናዉ ያርሾ በሳ ማታንነ ፆሳ ኬ ማታን ካዋ ዩሾን ኤቃናዳ ኦስ። 11 ዮዳሄ ካዋ ናኣ እዮኣሳ ካረ ከስድ፥ እያ ሁጰን ካላቻ ዎስ፤ ካዎታ ህገ ማፃፋ እያዉ እምድ ካዎይስ። ዮዳሄይነ እያ ናይት እዮኣሳ ትይድ፥ "ካዎይ ብራታ ቱሱ ግዶ" ያግዶሶና።
12 አሳይ የፅሸነ ካዋ ሳቢሸ ኡፋይተይሳ ጎቶላ ስእዳ ዎደ አሳኮ ፆሳ ኬ ባሱ። 13 ካዎይ ፐንገን ቱሳ ማታን ኤቅዳይሳ በአሱ። ሀላቃትነ ዛየ ፑነይሳት ካዋ ማታን ደኦሶና፤ ይሁዳ አሳ ኡባይ ኡፋይትሸ ዛየ ፑኖሶና፤ ማዝሙረ የፀይሳት ስን አድ ባንታ የ ሚሸን ጋላቶሶና። ጎቶላ ባ ማኡዋ ፔዳ፥ "ሀይስ ጌላተ! ሀይስ ጌላተ!" ያጋዳ ዋሳሱ።
14 ካህነይ ዮዳሄይ ቶራ ሞጮናታኮ፥ "ጎቶላ ፆሳ ኬን ዎፕተ፤ እዮ ሳልፕያ ግዶራ አድ ካረ ከስተ፤ እዮ አሻናዉ ኮይያ አስ ደእኮ ዎተ!" ያግስ። 15 ሄሳ ግሾ፥ ኤንቲ እዮ ኦይክድ ካዎ ጋ ኤፍድ ፓራ ፐንገን እዮ ዎዶሶና።
16 ካህነይ ዮዳሄይ ባ ሁጰን፥ አሳ ኡባይነ ካዎይ፥ ጎዳ አስ ግዳናዉ ጫቅዶሶና። 17 ሄ ዎደ አሳ ኡባይ ባኣለ ኤቃ ኬ ብድ፥ ኬ ላልድ፤ ያርሾ በሳታነ ምስለታ ትንቸረዶሶና። ማታና ጌተትያ ባኣላ ካህንያ ያርሾ በሳታ ስንን ዎዶሶና።
18 ዮዳሄይ ካህነታነ ሌወታ ፆሳ ኬ ኦሱዋስ ሀላቃ ኦድ ሹምስ። ኤንታ ኦሶይ ሙሰ ህግያን ፃፈትዳይሳዳነ ካዎይ ዳዊቲ ኦድዳይሳዳ ያርሾ ያርሻናይሳ። ቃስ ካዎይ ዳዊቲ ኦድዳይሳዳ ማዝሙረ የፅሸ ቦንቻናይሳ። 19 ህግያን ፃፈትዳይሳዳ ቱና አስ ገሎና መላ ዮዳሄይ ፆሳ ኬ ፐንገን ናገይሳታ ዎስ።
20 ዮዳሄይ ቶራ ሞጮናታ፥ ግታ አሳታ፥ ደርያ ሃረይሳታነ ሄ ቢታ አሳ ኡባ ኤክድ ካዋ ፆሳ ኬፈ ዱገ ኤህስ። ቆሞ ባጋ ፐንገራ ካዎ ጋ ገልድ ካዋ አራታ ቦላ ኡትስዶሶና። 21 ይሁዳ አሳ ኡባይ ኡፋይትስ። ጎቶላ ማሻን ሀይቅዳፐ ጉየ ካታማይ ዎፑ ግስ።