2 ታርከ ማፃፋ 11

1 ሮብኣም የሩሳላመ ካታማ ጋክዳ ዎደ እስራኤለ ቢታ አሳራ ኦለትድ ካዎተ ባዉ ዛራና መላ ይሁዳፐነ ብንያመ ኮቻፈ ዶረትዳ 180,000 ኦላንቾታ ሺሽስ። 2 ሽን ጎዳ ቃላይ ፆሳ አስ ግድዳ ሻማያኮ ይስ። 3 "ሶሎሞነ ናኣ፥ ይሁዳ ካዋ ሮብኣማ፥ ይሁዳንነ ብንያመን ደእያ እስራኤለ አሳ ኡባ ሀይሳዳ ያጋ፤ 4 ‘ህንተ እሻ ግድዳ እስራኤለታራ ኦለታናዉ ቦፕተ። ሄሳ ታኒ ኦዳ ግሾ ህንተ ኡባይ ህንተ ሶ ሶ ስምተ’ ያጌስ" ያጋ። ኤንቲ ጎዳ ቃላ ስእድ እዮርባማ ኦላናዉ በይሳ አግድ ስምዶሶና።

ሮብኣማ ሚፃታ

5 ሮብኣም የሩሳላመን ኡትድ ሀይሳፈ ካልድ ፃፈትዳ ይሁዳነ ብንያመ ካታማታን ሚፃታ ኬፅስ። 6 ሄ ካታማት ቤተለመ፥ ኤፃማ፥ ተቁሄ፥ 7 ቤት-ፁራ፥ ሶኮ፥ አዱላማ፥ 8 ጌተ፥ ማሬሳ፥ ዚፋ፥ 9 አዶራይማ፥ ላክሶ፥ አዜቃ፥ 10 ፆርአ፥ ኤሎናነ ከብሮና። 11 ሮብኣም ካታማታ ምንድ ኤንታዉ ሀላቃታ ሹምስ፤ ካ፥ ዛይተነ ዎይነ ኡሻ ያን ዎስ። 12 ሄ ኬፀትዳ ካታማታ ኡባን ጎንዳለነ ቶራ ዎስ፤ ያትድ ኤንታ ዳሮ ምንስ። ሄሳዳ ኦድ ይሁዳነ ብንያመ ሃርስ።

13 እስራኤለ ኡባን ደእያ ካህነትነ ሌወት ኡባይ ባንታ ደእያ በሳፈ ሮብኣማኮ ይዶሶና። 14 ሌወት ባንታ ሄን ቢታነ ባንታ ሻሉዋ አግድ ይሁዳነ የሩሳላመ ይዶሶና። ኤንቲ ካህነ ግድድ ጎዳስ ኦና መላ እዮርባምነ እያ ናይት ድግዶሶና። 15 እዮርባም ቃ ጎይኖ በሳንነ እ ኤስዳ ዴሸነ ማራ ምስለታስ ኦያ ሀራ ካህነታ ሹምስ። 16 እስራኤለ ፆሳ ባንታ ዎዛናፐ ጎይናናዉ ኮይዳይሳት ጎዳስ ባንታ አዋታ ፆሳስ ያርሾ ያርሻናዉ ኩመ እስራኤለፐ ሌወታ ካልድ የሩሳላመ ይዶሶና። 17 ኤንታ ዩሳይ ይሁዳ ካዎተ ምንስ፤ ኤንቲ ሄ ላይ ኩመ ሶሎሞነ ናኣ ሮብኣማ ማድዶሶና። ኤንቲ ካዋ ዳዊታ ኦግያነ ካዋ ሶሎሞነ ኦግያ ካልድ፥ ሄ ላይ ሳሮ ደእዶሶና።

ሮብኣማ ሶ አሳ

18 ሮብኣም ማህላቶ ጌተትያ ማቾ ኤክስ። ማህላት አዋይ ዳዊታ ናኣ ያርሞታ፤ እ አይያ እሰየ ናኣ ኤልያባ ናእዉ አብካሎ። 19 ማህላታ ኦሮብኣመስ የኡሳ፥ ሳማረነ ዛሃማ ጌተትያ አደ ናይታ የላሱ። 20 ሄሳፈ ጉየ፥ አበሰሎመ ናእዉ ማእኮ ኤክስ፤ ማእካ አብያ፥ አታያ፥ ዚዛነ ሳሎምታ ጌተትያ አደ ናይታ የላሱ። 21 ሮብኣም ባ ማቸታፐ ባ ላገታፐ አድ አበሰሎመ ናእዉ ማእኮ ዶስስ። እያዉ ታማነ ሆስፑን ማቸትነ ኡሱፑን ታሙ ላገት ደኦሶና። እ ላታማነ ሆስፑን አደ ናይታነ ኡሱፑን ታሙ ማጫ ናይታ የልስ። 22 ሮብኣም ማእክ ናኣ አብያ ባ በሳን ካዎያናዉ ቆፕዳ ግሾ እያ እሻታ ቦላ እያ ሀላቃ ኦድ ሹምስ። 23 ሮብኣም ጭንጭድ ባ አደ ናይታ ይሁዳን፥ ብንያመ ቢታንነ ግምበትዳ ካታማታን ሻክ ሻክ ሹምስ፤ ኤንታዉ ዳሮ ካነ ዳሮ ማቾ ደምስ።