ሶሎሞነይ ጭንጫተስ ዎስስ
(1 ካዎ 3:1-15)
1 ጎዳይ እያ ፆሳይ እያራ ደእያ ግሾነ እያ ዳሮ ግታይዳ ግሾ ዳዊታ ናአይ ካዎይ ሶሎሞነይ ባ ካዎተ ምንስ።
2 ሶሎሞነይ እስራኤለ ኡባ፥ ሻላቃታ፥ ማቶ ሀላቃታ፥ ዳናታ፥ እስራኤለ አሳ ካለያ ኡባነ ሶ አሳ ሀላቃታ ፄግድ ሺሽስ። 3 ሄሳፈ ጉየ፥ ሶሎሞነይነ ሺቅዳ አሳ ኡባይ ጋባኦናን ደእያ ቃ ጎይኖ በሳ ብዶሶና። ጎዳ አይለይ ሙሰይ መላ ቢታን ኦዳ ዱንካነይ ያን ደኤስ። 4 ካሰ ዳዊቲ ታቦትያስ የሩሳላመን ዱንካነ ቶክድ፥ ቅርያት-ይኣርመፐ እ ጊግስድ ዎዳ በሳ ኤህስ። 5 ሁራ ናኣ ኡረ ናአይ ባፃልኤል ናሰ ብራታፐ ኦዳ ያርሾ በሳይ፥ ጋባኦናን ጎዳ ዱንካንያ ስንን ደኤስ። ሶሎሞነይነ ሺቅዳ አሳይ ጎዳስ ያን ጎይንዶሶና። 6 ሶሎሞነይ ዱንካንያ ስንን ደእያ ናሰ ብራታፐ ኦሰትዳ ያርሾ በሳኮ፥ ጎዳ ስን ብድ፥ እስ ሙኩሉ ፁሳ ያርሾ ያርሽስ።
7 ሄ ጋላስ ቃማ ፆሳይ ሶሎሞነስ ቆንጭድ፥ "ታ ነዉ አይ እማና መላ ኮያይ?" ያግስ።
8 ሶሎሞነይ፥ "ነ ታ አዋ ዳዊታ ግታ ሲቆን ዶሳዳሳ፤ ታና እያ በሳን ካዎዳሳ። 9 አቤት ጎዳዉ፥ ፆሳዉ፥ ነ ታ አዋ ዳዊታስ ካሰ ግዳ ቃላይ ፖለቶ። ነ ታና ሳአን ደእያ ባናዳ ዳርዳ አሳ ቦላ ካዎዳ ግሾ፥ 10 ታ ሀ አሳ ካለና መላ ታዉ ጭንጫተነ አኬካ እማ። ሄስ ሀኖና እፅኮ፥ ሀ ግታ አሳ ኦን አይሳናዉ ዳንዳኢ?" ያግስ።
11 ፆሳይ ሶሎሞነኮ፥ "ነ ዱረተ ዎይኮ ሻሎ ደማናዉ ዎይኮ ቦንቸታናዉ ዎይኮ ነ ሞርከት ሀይቃና መላ ዎይኮ ነ ላይይ አዱቃና መላ ኦይቾናሽን ታ ነና ካዎዳ ታ አሳ አይሳናዉ ጭንጫተነ አኬካ ኦይችዳ ግሾ፥ 12 ነዉ ጭንጫተነ አኬካ እማና። ቃስ ኔፐ ካሰ ደእዳ ካዎታስ ዎይኮ ኔፐ ጉየ ደንዳና ካዎታስ ባይና ዱረተ፥ ሻሎነ ቦንቾ ነዉ እማና" ያግስ።
13 ሶሎሞነይ ዱንካነይ ጋባኦናን ደእያ፥ ቃ ጎይኖ በሳፈ ስሚድ፥ የሩሳላመ ብድ እስራኤለ ቦላ ካዎትስ።
14 ሶሎሞነይ ፓራ ጋረታነ ፓራታ ሺሽስ። እያዉ እስ ሙኩሉነ ኦይዱ ፄቱ ፓራ ጋረትነ ታማነ ናምኡ ሙኩሉ ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎስ። 15 ካዎይ ዎርቃይነ ብራይ የሩሳላመን ሹቻዳ ዶረታናዳ፥ ጋን ቦቢ ድጭያ መላ ዝጋ ም ዳራና መላ ኦስ። 16 ሶሎሞነ ፓራት ግብፀፈነ ቃወ ቢታፈ ይዶሶና። ካዋ ዛልአንቾት ኤንታ ቃወፐ ሚሸን ሻምድ ኤሆሶና። 17 ኤንቲ እስ እስ ፓራ ጋርያ ኡሱፑን ፄቱ ብራ ሳንትመን፥ እስ እስ ፓራ እስ ፄታነ እሻታሙ ብራ ሳንትመን ግብፀፈ ሻምድ፥ ህተታ ካዎታ ኡባስነ ሶረ ካዎታስ ባይዞሶና።