ይሁዳ ካዋ ኦዝያና
(2 ካዎ 14:21-22፤ 15:1-7)
1 ሄሳፈ ጉየ፥ ይሁዳ አሳ ኡባይ ታማነ ኡሱፑን ላይ ግድዳ ኦዝያና እያ አዋ አማስያሳ በሳን ካዎዶሶና። 2 እያ አዋይ አማስያስ ሀይቅዳፐ ጉየ እ ኤሎታ ካታማ ዛር ኬፅስ።
3 ኦዝያን ካዎትያ ዎደ እያዉ ላይ ታማነ ኡሱፑና፤ እ የሩሳላመን እሻታማነ ናምኡ ላይ ካዎትስ። እያ አየ ሱንይ ይኮሎ፤ እያ የሩሳላመ ማጫስ። 4 እያ አዋይ አማስያስ ኦዳይሳዳ እካ ጎዳ ስንን ሱረባ ኦስ። 5 ፆሳስ ያሽ ታማርስዳ ዛካርያሳ ዎደ እ ፆሳስ አማነትድ ኦስ። ጎዳ እ ኮይዳ ዎደ ኡባን ፆሳይ እያ አንጅስ።
6 ኦዝያን ፍልስፄመታራ ኦለታናዉ ከይድ ጋተ ካታማነ እያ ሄራ፥ ያብና ካታማነ እያ ሄራነ አሽዶዳ ካታማነ እያ ሄራ ላልስ። ያትድ አሽዶዳ ካታማ ማታንነ ፍልስፄመ ግዶን ካታማታ ኬፅስ። 7 ፆሳይ ኦዝያናስ ፍልስፄመታ፥ ጉርባላን ደእያ አራበታነ ማኡነታ ቦላ ፆኖ እሚስ። 8 አሞነት ኦዝያናስ ጊርዶሶና። ኦዝያን ዳሮ ምንዳ ግሾ እያ ሱንይ ግብፀ ዛዋ ጋካናዉ ከይስ።
9 ኦዝያን ማዛነ ፐንግያ ማታን፥ ዛንጋራ ፐንግያ ማታንነ ድርሳ ማዛንያ ማታን አዱሳ ግምበ ሻኮታ ኤስድ፥ የሩሳላመ ባሱዋ ምንስ። 10 እያዉ ዙማ ፃጶንነ ደንባን ዳሮ መሄይ ደእያ ግሾ ሄ በሳታን አዱሳ ግምበ ሻኮታ ግምብድ ዳሮ ሃ ኦላታ ቦክስ። እ ጎሸ ዶስያ ግሾ ደረ ቦላነ አራዳ ቢታን እያዉ ዳሮ ጎሻንቾትነ ዎይነይ ቶከይሳት ደኦሶና።
11 ኦዝያናስ ኦላስ ጊግዳ ዳሮ ኦላንቾት ደኦሶና። ኦላንቾታ ፃፈይ ይኤልነ ሀላቃይ ማእሰይ ኦላንቾታ ሱን ማዝጋበን ፃፍዶሶና። ኤንታ ሀላቃይ ሀናና። 12 ባንታ አዋታ ሶ አሳ ቦላ ሀላቃትያ ምኖ አሳት ናምኡ ሙኩሉነ ኡሱፑን ፄታ። 13 ካዋ ሞርከታራ ኦለትድ፥ ባንታ ኩመ ዎልቃን ካዋ ማዳናዉ ከይያ ሄ ፄታነ ላፑን ሙኩሉነ እቻሹ ፄቱ ኦላንቾት ኤንታ ጋርሳን ደኦሶና። 14 ኦዝያን ኦላንቾታ ኡባስ ጎንዳለ፥ ቶራ፥ ብራታ ባርኔፃ፥ ትራን ማእያ ፁሩረ፥ ዶንገነ ያምባርሻ ሹቹ ጊግስስ። 15 ኦዝያን የሩሳላመን ደእያ ሂላንቾት ዎችያ አዱሳ ግምበ ሻኮታነ ካታማ ድርሳ ግምበ ማዛነታ ቦላ ዶንገ ዱክያ ሚሸታነ ግታ ግታ ሹቻታ ፕፅርድ ሆልያ ሚሸታ ኦስስስ። ፆሳይ እያ ማድን እ ዳሮ ምንስ፤ እያ ሱንይ ኡባ በሳን ከይስ።
16 ሽን ኦዝያን ምንዳ ዎደ ኦቶርትስ፤ ኦቶሮይ እያ ኩንደስ ጋስ። ኦዝያን ጎዳ ባ ፆሳ አማነቶና እፅድ እፃነ ጩይስያ በሳን እፃነ ጩይሳናዉ ፆሳ ኬ ገልስ። 17 ካህነይ አዛርያስነ ምኖ ግድዳ ሆስፑን ታሙ ጎዳ ካህነት እያ ካልድ ገልዶሶና። 18 ካህነት እያኮ፥ "ኦዝያና፥ ኔኒ ጎዳስ እፃነ ጩይሳናዉ በሳካ። እፃነ ጩይሳናዉ በሰይ፥ ጌይድ ደእያ አሮና ኮቸ ግድዳ ካህነት ፃላላ። ሀ ጌሻ በሳፈ ከያ! ኔኒ ጎዳ ፆሳ ቦላ ናጋራ ኦዳሳ፤ ኔኒ እያፐ ቦንቾ ደማካ" ያግዶሶና።
19 ግዶሽን፥ እፃነ ጩይሳናዉ ባ ኩሸን እፃነ ጩይስያ ሚሸ ኦይክድ ደእሸ ሀንቀትስ። ኦዝያን ካህነታ ሀንቀትሸ ፆሳ ኬን እፃነ ጩይስያ በሳ ማታን ካህነታ ስንን ኤቅዳሽን፥ እያ ሶምኦን ባሮ ሀርገይ በንትስ። 20 ካህነ ሀላቃይ አዛርያስነ ሀራ ካህነት ኡባይ እያ ፄልያ ዎደ እያ ሶምኦን ባሮ ሀርገይ በንትዳይሳ በእድ፥ ኤለስድ እያ ፆሳ ኬፈ ከስዶሶና። እካ ጎዳይ እያ ሴርዳይሳ ኤርዳ ግሾ ኤለስድ ያፐ ከይድ ብስ። 21 ካዎይ ኦዝያን ሀይቃና ጋካናዉ ሄ ሀርግያራ ደእስ፤ ፆሳ ኬ ገሎና መላ ድገትስ። ሄ ሀርግያ ጋሶን ዱማ ኬን ባርካ ደእስ። ሄ ዎደ እያ ናአይ እዮአታም፥ ካዎ ጋ አዋተን ኦይክድ ቢታ ሃሬስ።
22 ካዎይ ኦዝያን ኦዳ ሀራባ ኡባ ኮይሮፐ ዉርሰ ጋካናዉ አሞፀ ናአይ፥ ናበይ እሳያስ ፃፍስ። 23 ኦዝያን ሀይቅድ ባ ማይዛታ ጋክስ። አሳይ እያ፥ "ባሮ ሀርገን ኦይከትዳይሳ" ያግድ፥ ካዎታ ዱፉዋ ማታን ሞግዶሶና። እ ሀይቅን እያ በሳን እያ ናአይ እዮአታም ካዎትስ።