ይሁዳ ካዋ እዮስያሳ
(2 ካዎ 22:1-2)
1 እዮስያስ ካዎትያ ዎደ እያዉ ላይ ሆስፑና፤ እ የሩሳላመን ሀስታማነ እስ ላይ ካዎትስ። 2 እዮስያስ ጎዳ ስንን ሱረባ ኦስ፤ ኡሻች ሀድርስ ጎና ባ ማይዛ ዳዊታ ኦገን ሄመትስ።
3 እ ካዎትዳ ሆስፑን ላይን ቡሮ ዮጋ ደእሸ ባ ማይዛ ዳዊታ ፆሳ ኮይስ። እ ካዎትዳ ታማነ ናምአን ላይን ይሁዳንነ የሩሳላመን ደእያ ቃ ጎይኖ በሳታ፥ አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦዳ ምስለታ ይስስ። 4 እያ ኪታን፥ ባኣለ ያርሾ በሳታ ላልዶሶና፤ ኤንታፈ ቦላራ ደእያ እፃነ ጩይስያ ሚሸታ ትንችዶሶና። አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦዳ ምስለታ ጋጭድ ለ ከስዶሶና፤ ሄ ልያ ኤንታ ጎይንያ አሳታ ዱፎን ላልዶሶና። 5 እዮስያስ ኤንታ ካህነታ መቀ ሄ ያርሾ በሳታ ቦላ ፁግስ፤ ያትድ፥ ይሁዳነ የሩሳላመ ጌሽስ።
6 ምናሰ፥ ኤፍሬማነ ስሞና ቢታፈ ብድ ንፍታለመ ቢታ ጋካናዉ ደእያ ካታማታነ ላለትዳ በሳታ ኡባ ሄሳዳ ኦድ ጌሽስ። 7 እዮስያስ ያርሾ በሳታ ላልስ፤ አሼራ ኤቃ ምስለታነ ሀራ ኤቃ ምስለታ ትንቸረስ፤ እስራኤለን ደእያ እፃነ ጩይስያ በሳታ ቃንፀረስ። ሄሳፈ ጉየ፥ እዮስያስ የሩሳላመ ስምስ።
8 እዮስያስ ካዎትዳ ታማነ ሆስፑን ላይን ቢታነ ፆሳ ኬ ጌሽዳፐ ጉየ፥ ፆሳ ኬ ኦራና መላ አፃላ ናኣ ሳፋና፥ የሩሳላመ ካታማ ሃርያ ማእሰያነ እዮአካዛ ናኣ ዋና ፃፍያ እዮአክና ኪትስ።
9 ኤንቲ ካህነ ሀላቃ ካልቅያሳኮ ብዶሶና። ፐንገ ናግያ ሌወት ምናሰፐ፥ ኤፍሬማፐ፥ አትዳ እስራኤለ አሳ ኡባፈ ይሁዳፐ፥ ብንያመፐነ የሩሳላመን ደእያ አሳፐ ካሰ ሺሽድ ፆሳ ኬ ኤህዳ ሚሽያ ካልቀስ እምዶሶና። 10 ኤንቲ ፆሳ ኬ ኦራያ ሀላቃታስ እምን ኤንቲ ፆሳ ኬ ኦራናዳነ ዛሪድ ኬፃና መላ ኦሳንቾታስ እምዶሶና። 11 ይሁዳ ካዎት ላልዳ ፆሳ ኬ ሎይናዉ ምነ ማሰትዳ ሹቹ ሻማና መላ አናፀታስነ ግምበይሳታስ ሚሸ እምዶሶና።
12 አሳይ አማነትድ ኦሱዋ ፖልዶሶና። ኤንታ ቦላ ሹመትዳ ኦይዱ ሌወት፥ ማራራ ያራፐ ያሃታነ አብድዩ፥ ቃሃታ ያራፐ ማሱላማነ ዛካርያሳ። የ ሚሸ ካእ ኤርያ ሌወት ኡባይ፥ 13 ዎልቃ ኦሶ ኦያ አሳታ ቦላነ ዱማ ዱማ ኦሶ ኦይሳታ ቦላ ሹመትዶሶና። ቃስ ሀራ ሌወት ፃፈ፥ ሀላቃነ ፐንገ ናገይሳታ ግድዶሶና።
ህገ ማፃፋይ በንትስ
14 ኤንቲ ፆሳ ኬ ይዳ ሚሽያ ከስያ ዎደ ካህነይ ካልቀይ ጎዳይ ሙሰ ባጋራ እምዳ ህገ ማፃፋ ደምስ። 15 ካልቀይ ዋና ፃፍያ ሳፋናኮ፥ "ታኒ ፆሳ ኬፈ ህገ ማፃፋ ደማስ" ያግስ። ሄ ማፃፋ ሳፋናስ እሚስ።
16 ሳፋን ማፃፋ ካዋኮ ኤፍድ፥ "ነ ሹማት ነ ኪታ ኡባ ኦዶሶና። 17 ፆሳ ኬን ደእያ ሚሽያ ኤክድ፥ ኦሱዋ ካልያ ሀላቃታስነ ኦያ አሳስ እምዶሶና" ያግስ። 18 ዋና ፃፈይ ሳፋን ካዋኮ፥ "ካህነይ ካልቀይ ታዉ ማፃፋ እሚስ" ያግድ ማፃፋ ካዋ ስንን ናባብስ።
19 ካዎይ ህገ ቃላ ስእዳ ዎደ አዛንድ ባ ማኡዋ ፔስ። 20 ካዎይ፥ ካልቀ፥ ሳፋና ናኣ አክቃማ፥ ምክያሳ ናኣ አብዶና፥ ዋና ፃፍያ ሳፋናነ ካዎ ሹማ አሳያ ሀይሳዳ ያግድ ኪትስ፤ 21 "ብድ ታ ግሾነ እስራኤለንነ ይሁዳን አትዳ አሳታ ግሾ ሀ በንትዳ ማፃፋን ፃፈትዳባ ጎዳ ኦይችተ። ሀ ማፃፋን ፃፈትዳ ኡባ ኦናዉ ኑ ማይዛት ጎዳ ቃላ ናግቦና ግሾ ጎዳይ ኑ ቦላ ባ ሀንቁዋ ጉስስ" ያግስ።
22 ካልቀይነ ካዎይ ኪትዳ አሳት ፆሳ ኬን ማኦ ናግያ ሀስራ ናአ፥ ትቁዋ ናአ፥ ሰለማ ማቾ ግድዳ ሁልዳ ጌተትያ ናበኮ ብድ እዮ ኦይችዶሶና። እያ የሩሳላመን ናምአን ካታማን ደአዉሱ።
23 ሁልዳ ኤንታኮ፥ "ጎዳይ እስራኤለ ፆሳይ፥ ‘ህንተና ታኮ ኪትዳ ኡራስ ሀይሳዳ ያግድ ኦድተ’ ያጋሱ። 24 ጎዳይ ሀይሳዳ ያጌስ፤ ‘ይሁዳ ካዋ ስንን ናባበትዳ ማፃፋን ፃፈትዳ ኢታ ባደ ኡባ ሀ በሳን ደእያ አሳ ቦላ ኤሀና ሀናይስ። 25 ኤንቲ ታና አግድ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦዳባን ታና ሀንቀዶሶና። ሄሳ ግሾ፥ ታ ሀንቆይ ሀ በሳን ትገታና፤ ተቀተና።’ 26 ጎዳ ኦይቻናዉ ህንተና ኪትዳ ይሁዳ ካዋኮ፥ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ፤ 27 ሀ በሳንነ ሀ በሳን ደእያ አሳ ቦላ ፆሳይ ኦደትዳባ ኔኒ ስእዳ ዎደ ነ ዎዛናይ ቦሸትን፥ ታ ስንን ነናተ ካዉሽዳ ግሾነ ነ ማኡዋ ፔዳ ታ ስንን ዬክዳ ግሾ ታኒ ነ ዎሳ ስአስ። 28 ሄኮ፥ ታ ነና ነ ማይዛታ ጋና፤ ነ ሳሮ ሞገታና። ታ ሀ በሳንነ ሀ በሳን ደእያ አሳ ቦላ ኤሀና ኢታባ ነ አይፈይ በኤና’ ያግተ" ያጋሱ።
ኤንቲ ብድ ሀ ቃላ ካዋስ ኦድዶሶና።
29 ሄሳፈ ጉየ፥ ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ። 30 ካዎይ ፆሳ ኬ ከይስ፤ ይሁዳ አሳይ፥ የሩሳላመ አሳይ፥ ካህነትነ ሌወት፥ ጉፈ ግታ ጋካናዉ ኡባይ እያራ እስፈ ከይዶሶና። ፆሳ ኬን በንትዳ ጫቆ ማፃፋ ቃላ ኡባ ካዎይ ኤንታዉ ናባብስ። 31 ካዎይ ባ በሳን ኤቅድ፥ ጎዳ ኦገን ሄመታናዉነ እያ ህግያ፥ እያ ዎጋነ እያ ኪታ ባ ኩመ ዎዛናንነ ባ ኩመ ሸምፑዋን ናጋናዉ፥ ቃስ ሀ ማፃፋን ፃፈትዳ ጫቁዋ ኦናዉ ጎዳ ስንን ጫቅስ። 32 የሩሳላመንነ ብንያመን ደእያ አሳ ኡባይ ኤቅድ ጫቃና መላ ኦስ፤ የሩሳላመን ደእያ አሳይ ፆሳ፥ ባንታ ማይዛታ ፆሳ ጫቆይ ገይሳዳ ኦዶሶና።
33 እዮስያስ እስራኤለ ዛዋን ደእያ እፀትዳባ ኡባ ድግስ። እስራኤለን ደእያ ኡባይ ጎዳ፥ ባንታ ፆሳ ጎይናና መላ ኦስ። እዮስያስ ደእዳ ላይ ኡባን ኤንቲ ጎዳ፥ ባንታ ማይዛታ ፆሳ ካሎ አግቦኮና።