2 ታርከ ማፃፋ 18

ምክያስ አካባስ ኦድዳ ትንብተ

1 እዮሳፈፅ ዳሮ ዱረተነ ቦንቾ ደምዳፐ ጉየ አካባራ ቦሎትስ። 2 ጉ ላይፈ ጉየ እዮሳፈፅ አካባ በአናዉ ሳማረ ብስ። አካብ እያዉነ እያራ ደእያ አሳስ ዳሮ ዶርስነ ቦሩ ሹክስ። ያትድ እዮሳፈፃ ጋላዳን ደእያ ራሞታ ኦላናዉ ባራ ባና መላ ማቅስ። 3 እስራኤለ ካዎይ አካብ ይሁዳ ካዋ እዮሳፈፃኮ፥ "ጋላዳን ደእያ ራሞታ ኦላናዉ ታራ ባኔ?" ያግድ ኦይችስ።

እዮሳፈፅ፥ "ኤ፥ ታ ኔራ ባና፤ ታ ኦላንቾት ነ ኦላንቾታ፤ ኑ ኔራ ባና" ያግስ። 4 እዮሳፈፅ እስራኤለ ካዋኮ፥ "ግዶሽን፥ ነ ኮይሮታዳ ጎዳ ኦይቻ" ያግስ።

5 እስራኤለ ካዎይ ኦይዱ ፄቱ ናበታ ሺሽድ፥ "ታ ጋላዳን ደእያ ራሞታ ኦላናዉ ቦየ ቦፖ?" ያግድ ኦይችስ።

ኤንቲ፥ "ባ፤ ፆሳይ ነ ኩሸን አድ እማና" ያግዶሶና።

6 ሽን እዮሳፈፅ፥ "ኑ ጎዳ ኦይቻናዉ ዳንዳእያ ሀራ ናበይ ሀይሳን ባዌ?" ያግስ።

7 እስራኤለ ካዎይ እዮሳፈፃኮ፥ "ኑ እያ ባጋራ ጎዳ ኦይቻናዉ ዳንዳእያ ሀራ ናበይ ይምላ ናአይ ምክያስ ደኤስ። ሽን እ ኡባ ዎደ ታዉ ኢታባ ኦዴስፐ አትሽን፥ ሎኦባ ኦድ ኤሮና ግሾ ታ እያ ዶስከ" ያግስ።

እዮሳፈፅ፥ "ካዎይ ሀይሳዳ ጋናዉ በሰና" ያግስ።

8 እስራኤለ ካዎይ ባ ሞርናታፐ እሱዋ ፄግድ፥ "ይምላ ናኣ ምክያሳ ኤለ ኤካዳ ያ" ያግስ።

9 እስራኤለ ካዎይነ ይሁዳ ካዎይ እዮሳፈፅ ካዎ ማኦ ማእድ፥ ሳማረ ካታማ ገልያ ፐንገን ባንታ አራታን ኡትን ናበት ኡባይ ኤንታ ስንን ትንብተ ኦዶሶና። 10 ኤንታፈ እሶይ፥ ክንአና ናአይ ሰደቅያስ ብራታፐ ካጨታ ጊግስድ አካባኮ፥ "ጎዳይ፥ ‘ሶረት ያና ጋካናዉ ነ ኤንታ ሀ ካጨታን ቃይጫና’ ያጌስ" ያግስ።

11 ሀራ ናበት ኡባይ፥ "ጎዳይ ራሞታ ነ ኩሸን አድ እማና ግሾ ባ፤ ኦላዳ ፆና" ያግዶሶና።

12 ምክያሳ ፄጋናዉ ኪተትድ ብዳ ኡራይ፥ "ሄኮ፥ ሀራ ናበት ኡባይ እስ ዶና ግድድ ካዎይ ፆናናይሳ ኦድዶሶና። ነ ኦዳይካ ኤንታ ኦዳ መላ ግዶ፤ ሎኦባ ኦዳ" ያግስ።

13 ሽን ምክያስ፥ "ደኦ ጎዳይ ኤርያ መላ፥ ፆሳይ ታዉ ቆንጭስዳባ ኦዳና" ያግስ።

14 ምክያስ ካዋኮ ይዳ ዎደ ካዎይ፥ "ምክያሳ ኑኒ ጋላዳን ደእያ ራሞታ ኦላናዉ ቢኖየ ቦፕኖ?" ያግድ ኦይችስ።

ምክያስ ካዋኮ፥ "ኤንቲ ነ ኩሸን አድ እመታና ግሾ ባዳ ኦላ" ያግስ።

15 ካዎይ፥ "ጎዳ ሱንን ቱማ ኦዳ፤ ሀራባ ታዉ ኦዶና መላ ታኒ ነና አፑን ቶሆ ጫቅሶ" ያግስ።

16 ምክያስ፥ "ታ እስራኤለ ኦላንቾት ኡባይ ሄንንቾይ ባይና ዶርሳዳ ደርያ ቦላ ላለትዳይሳ በአስ። ጎዳይ፥ ‘ሀይሳታ ካለያ አስ ባዋ፤ ኤንቲ ኡባይ ባንታ ሶ ሶ ሳሮ ቦ’ ያጌስ" ያግስ።

17 እስራኤለ ካዎይ እዮሳፈፃኮ፥ "እ ታዉ ኢታፐ አትሽን፥ ሎኦ ኦድ ኤረና ጋዳ ታኒ ነዉ ኦዳብክና?" ያግስ።

18 ምክያስ ጉጅድ ሀይሳዳ ያግስ፤ "ሀእ፥ ጎዳይ ግያባ ስአ! ጎዳይ ባ አራታን ኡትን ሳሎ ኦላንቾት እያ ኡሻቻ ባጋንነ እያ ሀድርሳ ባጋን ኤቅዳይሳታ በአስ። 19 ጎዳይ፥ ‘እስራኤለ ካዎይ አካብ ጋላዳን ደእያ ራሞታ ብድ ያን ሀይቃናዳ እያ ባለናይ ኦኔ?’ " ያግስ።

እሶይ፥ "ሀይሳዳ ግያ ዎደ ሀንኮይ ሄሳዳ" ግስ።

20 ዉርሰን እስ አያን ከይድ ጎዳ ስንን ኤቅድ፥ "ታኒ እያ ባለና" ያግስ።

ጎዳይ፥ "ዋታዳ ባለኔ?" ያግስ።

21 አያናይ፥ "ታ ባዳ፥ እያ ናበታ ኡባ ዶናን ዎርዶ አያና ግዳና" ያግስ።

ጎዳይ፥ "ኤ፥ ነ እያ ባለና፤ ነዉ ሀናና፤ ባዳ ባለ" ያግስ።

22 ምክያስ፥ "ሄኮ፥ ጎዳይ ነና ይሳናዉ ቆፕዳ ግሾ ነ ናበታ ዶናን ዎርዶ አያና ዎስ" ያግስ።

23 ክንአና ናአይ ሰደቅያስ ሺቅድ፥ ምክያሳ ባቅድ፥ "ጎዳ አያናይ ታና አግድ ነዉ ኦዳናዉ አዉራ አዴ?" ያግስ።

24 ምክያስ፥ "ሄኮ፥ ነ ቆሰታናዉ ቆልአ ገልያ ዎደ ሄሳ ደማና" ያግስ።

25 እስራኤለ ካዎይ ባ ኦላንቾታፐ እሱዋ ፄግድ፥ "ምክያሳ ኦይካ ኤፋዳ ካታማ ሃርያ አሞነስነ ታ ናኣ እዮኣሳስ እማ። 26 ካዎይ ኤንታኮ፥ ‘ሀ አድያ ቃሾ ኬን የግተ፤ ታ ሳሮ ስማና ጋካናዉ ጉ ኡይፈነ ሃፈ አትሽን፥ ሀራባ አይባካ እያዉ እሞፕተ’ " ያግድ ኪትስ።

27 ምክያስ፥ "ቱማ፥ ነ ሳሮ ስማናባ ግድኮ፥ ጎዳይ ታዉ ኦድቤና። ቃስ፥ አሳዉ፥ ታ ኦድያባ አኬክተ" ያግስ።

አካባ ሀይቁዋ

28 ሄሳፈ ጉየ፥ እስራኤለ ካዎይነ ይሁዳ ካዎይ እዮሳፈፅ ጋላዳን ደእያ ራሞታ ብዶሶና። 29 እስራኤለ ካዎይ እዮሳፈፃኮ፥ "ታኒ ታ ማኡዋ ላማዳ ሀራ አስ ዳናዳ ኦላ ገላና፤ ሽን ኔኒ ነ ካዎ ማኡዋ ማአ" ያግስ። እስራኤለ ካዎይ ባ ማኡዋ ላምድ ሀራ አስ ዳንድ ኦላ ገልስ።

30 ሶረ ካዎይ ባ ፓራ ጋረታ ኪትያ አሳታኮ፥ "ግታ ግድን ጉ፥ ሀራ ኦደራካ ኦለቶፍተ፤ እስራኤለ ካዋ ፃላላ ኮይድ ዎተ" ያግድ ኪትስ።

31 ፓራ ጋረታ ኪተይሳት እዮሳፈፃ በእዳ ዎደ፥ "ሀይስ እስራኤለ ካዋ" ያግድ እያራ ኦለታናዉ ስምዶሶና። እዮሳፈፅ ዋስን ጎዳይ እያ ማድድ ኤንታ ኩሸፐ አሽስ። 32 ፓራ ጋረታ ኪተይሳት እ እስራኤለ ካዋ ግዶናይሳ በእድ እያ ጎደይሳ አጋግዶሶና።

33 እስ ኡራይ ጮ ባ ዶንግያ ዱክያ ዎደ እስራኤለ ካዋ ኦላ ማኦይ ጋሄትያ ሀሽያን ጫድስ። ካዎይ ባ ጋርያ ላግያ አድያኮ፥ "ጋርያ ጉየ ዛራዳ ታና ኦላ ግዶፈ ከሳ፤ ታኒ ኢታ ጫቸ ጫደታስ" ያግስ። 34 ኦላይ ጎብያ ዎደ እስራኤለ ካዎይ አካብ ባ ፓራ ጋርያ ግዶን ዘምፕድ፥ ኦማርስ ጋካናዉ ሶረታ ስንን ጋምእስ። አው ዉልያ ዎደ እ ሀይቅስ።