ያርሾ በሳይ ዛሪድ ኬፀትስ
1 ላፑን አጌናን እስራኤለ አሳይ ባንታ ደእያ ካታማታፐ እስ አስ ግድድ የሩሳላመ ሺቅዶሶና። 2 እዮሳደቃ ናኣ እያሱነ፥ እያራ ኦያ ካህነት፥ ሳላትያላ ናኣ ዛሩባበልነ እያ ዳቦት ፆሳ አስ ግድዳ ሙሰ ህግያን ፃፈትዳይሳዳ ፁሳ ያርሾ ያርሻናዉ፥ እስራኤለ ፆሳስ ያርሾ በሲ ጊግስዶሶና። 3 ሄ ቢታን ደእያ አሳ እፁዋፐ ደንዶይሳን ያይኮካ፥ ያርሾ በሲ ካሰ በሳን ኬፅድ፥ ፁሳ ያርሾ ጎዳስ ኡባ ዎደ ዎንታነ ኦማርስ ሺሽዶሶና። 4 ካሰ ፃፈትዳይሳዳ ሻቃራ ባኣለ ቦንችዶሶና፤ ፁሳ ያርሾ እስ እስ ጋላስ ኮሸይሳዳ ፓጭሶና ያርሽዶሶና። 5 ቃስ ኡባ ዎደ ሺቅያ ፁሳ ያርሾ፥ አጌና ፄሮ ያርሾነ ጎዳ ጌሻ ባለታን ያርሽያ ያርሾ ኡባ ያርሽዶሶና። ሄሳ ቦላካ አሳይ ባ ዶሳን ጎዳስ እምዳ እሞታ ኡባ ያርሽዶሶና። 6 ፆሳ ኬ ባሶይ ቡሮ ዶመቶናባ ግድኮካ ላፑን አጌናን ኮይሮ ጋላስ ኤንቲ ጎዳስ ፁሳ ያርሾ ሺሾ ዶምዶሶና።
ፆሳ ኬይ ዛሪድ ኬፀትስ
7 ሄሳፈ ጉየ፥ ሹቹ ማሰይሳታስነ አናፀታስ ሚሸ እምድ ኦሶ ኦይክዶሶና። ፋርሰ ካዎይ ቅሮስ ኤንታዉ ኪትዳ ግሾ፥ ልባኖሳፐ ዝጋ አባ ፕንድ፥ ዮጰ ኤሀናዉ ስዶናነ ፅሮሳ አሳስ ካ፥ ኡሽነ ዛይተ እምዶሶና።
8 ኤንቲ የሩሳላመ ስምዳ ናምአን ላይን ናምአን አጌናን፥ ሳላትያላ ናአይ ዛሩባበል፥ እዮሳደቃ ናኣ እያሱይነ ኤንታ ዳቦት፥ ካህነት፥ ሌወትነ ድኦፐ ስምዳ አሳ ኡባይ ፆሳ ኬ ካሰ በሳን ኬፆ ዶምዶሶና። ቃስ ፆሳ ኬ ኦሱዋ አዋተን ፄላና መላ ላታሙ ላይ ግድዳይሳታነ ላታሙ ላይፈ አዳ ሌወታ ሹምዶሶና። 9 ሌወ ኮቸ ግድዳ እያሱ፥ እያ ናይታነ እያ ዳቦት፥ ሆዳዋ ሶ አስ ግድዳ ቃድምኤልነ እያ ናይት እስፈ ግድድ፥ ፆሳ ኦሱዋ ኦስሳና መላ አዋተ ኤክዶሶና፤ ኤንሀዳዳ ኮቸ ግድዳ ሌወት ኤንታ ማድዶሶና።
10 አናፀት ፆሳ ኬ ባሱዋ የገ ኦይክያ ዎደ፥ ካህነት ባንታ ማኦ ማእድ ሞይዘ ኦይክድ፥ አሳፋ ኮቸ ግድዳ፥ ሌወት ዳላ ኦይክድ፥ እስራኤለ ካዋ ዳዊታ ዎጋ መላ ጎዳ ጋላታናዉ ኤቅዶሶና። 11 ኤንቲ ጎዳ ጋላትሸነ እሶይ እሱዋ ካል ካል ማዝሙረን ሳቢሸ፥ ሀይሳዳ ያግድ ዛማርዶሶና።
"ጎዳይ ኬሀ፤
እስራኤለስ ደእያ እያ ሲቆይ መርናሳ" ያግዶሶና።
ፆሳ ኬ ባሶይ የገትያ ግሾ፥ አሳ ኡባይ ባንታ ቃላ ቁ ኦድ እልልሸ ጎዳ ጋላትዶሶና። 12 ሽን ካሰ ፆሳ ኬ በእዳ ጭማ ካህነታፐ፥ ሌወታፐነ ኮቻታ ሀላቃታፐ ዳሮት ሀእ ፆሳ ኬ ኬፃናዉ የገትዳ ባሱዋ በእዳ ዎደ ባንታ ቃላ ቁ ኦድ ዬክዶሶና፤ ሀራት ቃስ ኡፋይትሸ ቦንችዶሶና። 13 ኦንካ ኡፋይሳ እልልሳነ ዬሆ ዋሱዋ ሻካናዉ ዳንዳእቤና፤ አሳይ ዋስያ ዋሶይ ዎልቃማ ግድያ ግሾ ዋሶይ ሃሆን ስኤቴስ።