1 ሳምባት አዳፐ ጉየ፥ ማግደላ ማይራማ፥ ያይቆባ አይያ ማይራማነ ሳሎማ ብድ፥ የሱሳ አሀ ትያናዉ ሽቶ ሻምዶሶና። 2 ዎጋ ዎደ ዎንታ ዳሮ ጉራ ፃልቀይ ጫርሽን፥ ዱፎ ብዶሶና። 3 ኤንቲ ባንታ ግዶን እሶይ እሱዋራ፥ "ዱፉዋ ዶናፐ ኑስ ሹቻ ኦኔ ጎንዶርስድ ድጋናይ?" ያግድ ኦደትዶሶና።

4 ኤንቲ ፄልያ ዎደ ሄ ዳሮ ግታ ሹቻይ ጎንዶረትድ ክችዳይሳ በእዶሶና። 5 የሱሲ ሞገትዳ ዱፉዋ ግዶ ገልያ ዎደ እስ ፓን አደይ ቦ ማኦ ማእድ፥ ኡሻቻ ባጋራ ኡትዳይሳ በእድ ዳጋምዶሶና።

6 ሽን እ ኤንታኮ፥ "ዳጋሞፍተ፤ ማስቃልያ ቦላ ካቀትዳ፥ ናዝረተ የሱሳ ህንተ ኮየይሳ ታኒ ኤራይስ። እ ሀይሳን ዴና፥ ሀይቆፐ ደንድስ። ኤንቲ እያ ሞግዳ በሳ ሀይሳ በእተ። 7 ሀእ ብድ የሱሳ ታማረታስነ ጰፅሮሳስ፥ ‘የሱሲ ህንተፈ ስንትድ ጋልላ ቤስ። እ፥ ህንተዉ ኦድዳይሳዳ ህንተ እያ ያን በአና’ ያግድ ኦድተ" ያግስ።✝

8 ማጫሳት ያሻን ኮኮርሸ ዱፎፐ ከይድ ባቃትዶሶና። ቃስ ኤንቲ ያይዳ ግሾ፥ ሄሳ ኦደስካ አይኮካ ኦድቦኮና።*

9 የሱሲ ሀይቆፐ ደንድዳፐ ጉየ፥ ዎጋ ጋላስ ዎንታ፥ ላፑን ቱና አያናታ ከስዳ ማግደላ ማይራምስ ኮይሮትድ በንትስ። 10 እያ ባዳ ካሰ እያራ ደኤይሳታስ፥ ኤንቲ አዛንሸነ ዬክሸ ደእሽን ኦዳሱ። 11 ሽን የሱሲ ፓፃ ደኤይሳነ እዉ በንትዳይሳ ኤንቲ ስእዳ ዎደ እያ ገይሳ አማንቦኮና።

12 ሄሳፈ ጉየ፥ ኤንታፈ ናምአት ካታማፐ ከይድ ብሽን፥ ኦገ ቦላ የሱሲ ካሰፐ ዱማትድ ኤንታዉ በንትስ። 13 ኤንቲ ጉየ ስሚድ፥ ሀራታስ ኦድዶሶና፥ ሽን ሀራትካ ኤንታ ኦዳ ቱማ ግቦኮና።

14 ጉየፐ ታማነ እስ እያ ታማረት ካ ምሽን፥ የሱሲ ኤንታዉ በንትስ። ኤንታዉ አማኖይ ባይና ግሾነ ሀይቆፐ እ ደንድዳይሳ በእዳ አሳይ ኦድን፥ ኤንቲ አማኖና እፅዳ ግሾ እ ኤንታ ቦርስ።

15 እ ኤንታኮ፥ "ቢታ ኡባ ብድ አሳ ኡባስ ዎንገላ ኦድተ።✝ 16 አማነይነ ፃማቀተይ አታና፥ ሽን አማኖናይ ፕርደታና። 17 አማነይሳታስ ሀ ማላታት እመታና። ኤንቲ ታ ሱንን ቱና አያናታ ከሳና፥ ኦራ ዶናን ኦደታና። 18 ኤንቲ ሾሹ ኦይክኮካ ዎይኮ ዎያባ ኡይኮካ ኤንታ ቆሄና። ቃስ ኤንቲ ባንታ ኩሽያ ሀርጋንቾታ ቦላ ዎድ ኤንታ ፓና" ያግስ።

19 ጎዳይ የሱሲ ታማረታራ ኦደትዳፐ ጉየ፥ ፑደ ሳሎ ከይስ፤ ፆሳፈ ኡሻቻ ባጋራ ኡትስ።✝ 20 እያ ታማረት ብዳ በሳ ኡባን ቃላ ኦድዶሶና። ጎዳይካ ኤንታራ እስፈ ኦስ። ኤንቲ ኦድያ ቃላይ ቱማ ግድዳይሳ ፆሳይ ኤንታዉ እምያ ማላታታን ኤርስስ።