1 ካዎታ ማፃፋ 7

ሶሎሞነ ካዎ ጋ

1 ሶሎሞነይ ባ ጋዋ ታማነ ሄ ላይን ኬፅድ ዉርስስ። 2 "ልባኖሰ ዎራ ኬ" ጌተትያ ኬ ሶሎሞነይ ኬፅስ፤ ሄ ኬ አዱሳተይ ፄቱ ዋ፤ ጎምፓይ እሻታሙ ዋ፤ ጌሳይ ሀስታሙ ዋ። ዝጋ ቱቀት ኦይዱ ማራን ኤቅዶሶና፤ ማሰትዳ ዝጋ ምት ኤንታ ቦላ ዎዶሶና፤ 3 ዝጋ ምት ሄ ማራን፥ እስ እስ ማራን ታማነ እቻሹ ምት ደኦሶና፤ ኤንቲ ኩመ ኦይታማነ እቻሻ። 4 ሄ ኬስ ማስኮተት ሄ ማራን ደኦሶና፤ ኤንቲ እሶይ እሱዋ ስንን ደኦሶና። 5 ፐንገትነ ማስኮተት ኦይዱ ማዛነራ ደኦሶና፤ ማስኮተት ሄ ማራን ግድድ፥ እሶይ እሱዋ ስንን ደኦሶና።

6 ሶሎሞነይ፥ "ቱኡቀይ ኩምዳ ኬ" ጌተትያ ኬ ኬፅስ፤ ሄ ኬ አዱሳተይ እሻታሙ ዋ፤ ጎምፓይ ሀስታሙ ዋ። ሄ ኬ ስንን ዳሮ ቱቀን ዘምፕዳነ ቦላራ ካራን ካመትዳ ባራንድ ደኤስ። 7 ሶሎሞነይ ፕርዳ አራታይ ደእያ "ፕርዳ ኬ" ኬፅስ፤ ሄ ኬይ ዉይገፐ ብድ ካራ ጋካናዉ ዝጋን ካመትድ ኡትስ። 8 ፕርዳ ኬፈ ጉየ ባጋራ ደእያ ሀራ ዳባባን ባዉ ዳናዉ ካዎ ጋ ሀንኮ ኬታዳ ኦድ ኬፅስ። ባ ማቸ፥ ግብፀ ካዋ ናኤስ፥ ሄ ኬ መላ ሀራ ኬ ኬፅስ።

9 ሀ ኬት ኡባይ፥ ካረፐ ዶምድ ድርሳፈ ሶራ ደእያ ግታ ጉታራ ጋካናዉ፥ ባሱዋፐ ዶምድ ካራ ጋካናዉ፥ ልክድ ማስዳነ ሶራነ ካረራ ጊግስዳ ሎኦ ሹቻን ኦሰትዶሶና። 10 ግምበይ ሂፀትዳይ ታሙ ዋ ዎይኮ ሆስፑን ዋ ግድያ ሎኦ ማሰትዳ ግታ ሹቻና። 11 ቦላ ባጋራ ልከትድ ማሰትዳ ሎኦ ሹችነ ዝጋ ም ደኤስ። 12 ግታ ዳባባ ዩሹዋን ደእያ ግምበይ ፆሳ ኬዳነ ባራንዳዳ ማሰትዳ ሄ ሹቹ፥ እሱዋ እሱዋ ቦላ ዎድ፥ እስ ማሰትዳ ዝጋ ኤንታ ቦላ ዎድ ግምብስ።

ፆሳ ኬ ሚሸታ

13 ካዎይ ሶሎሞነይ፥ ክራማ ጌተትያ አድያ ፅሮሳፐ ኤህስ። 14 ክራማ አይያ አምኦ፤ እያ ንፍታለመ ኮቸ። እያ አዋይ ፅሮሳ አስ። ክራም ናሰ ብራታ ቆፅያ ሂል ደእያ አሰ፤ እ ናሰ ብራታ ቆፅድ ኦያባን ዳሮ ሎህዳ አስ፤ እ ሶሎሞነኮ ይድ እያ ኦሶ ኡባ ኦስ።

15 ክራም እሱዋ እሱዋ ጌሳይ ታማነ ሆስፑን ዋ አዱቅድ፥ ዩሾይ ታማነ ናምኡ ዋ ዳልግዳ ናምኡ ቱሳታ ናሰ ብራታ ሴርስድ ከስስ። ሄ ቱሳ ኦርደተይ ኦይዱ ብራ። ናምአን ቱቀይካ ሄሳ መላ። 16 ሄሳዳካ፥ ቱሳታ ሁጰን ዎናዉ ናምኡ ጉምቦታ ናሰ ብራታ ሼሽድ፥ መስ፤ እስ እስ ጉምቦይ እቻሹ ዋ አዱቄስ። 17 ቱኡሳ ሁጰን ደእያ እስ እስ ጉምቦታ ግተዳ ኦዳ ላፑን ሳንላታ ኦስ። 18 ቱሳታ ፄራን ደእያ ጉምቦታ አሌቅሳናዉ ናምኡ ማራን ኦሮማነ ምስለ አሌቅስስ። 19 ባራንዳን ኤቅዳ ቱሳታ ቦላ ደእያ ጉምቦት ጪሻ መን አሌቀትዶሶና፤ ኤንታ ጌሳይ ኦይዱ ዋ። 20 ናምኡ ቱቀታ ሁጰን ደእያ ጉምቦታን ገርቶ ግድድ ኡትዳ በሳፈ ቦላ ባጋራ፥ ሳንላታ ግትያ ካልድ፥ ናምኡ ፄቱ ኦሮማነ ምስለት ናምኡ ማራን ዩይ አድ ደኦሶና። 21 ክራም ሄ ናምኡ ቱሳታ ፆሳ ኬ ባራንዳ ማታን ኤስስ። ኡሻቻ ባጋራ ኤቅዳ ቱሳ ያክና ግድ ሱንስ፤ ሀድርሳ ባጋራ ኤቅዳ ቱሳ ቦኤዛ ግድ ሱንስ። 22 ቱሳታ ሁጰን ደእያ ጉምቦት ጪሸ ዳንድ መትዶሶና። ሄሳዳ ሀንድ ቱሳታ ኦሶይ ፖለትስ።

23 ክራም አባ ሳንያ ጌተትያ እስ ዳሮ ግታ ሳንያ ናሰ ብራታ ሼሽድ መስ። ሄ አባ ሳንያ ዶናይ ሀ ጋፃፐ ያ ጋፃ ጋካናዉ ታሙ ዋ፤ ጌሳይ እቻሹ ዋ፤ ዩሾይ ሀስታሙ ዋ። 24 አባ ሳንያ ዶናን ካረ ባጋራ ዝቅ ግድ፥ እያራ ኦይከትድ መትዳ ጎሰ ምስለት ደኦሶና፤ ሄ ጎሰታ ምስለት ናምኡ ማራን፥ እስ እስ ዋን ታማይ ታማይ ዩይ አድ ሹየትዶሶና።

25 አባ ሳነይ ናሰ ብራታፐ መትዳ ታማነ ናምኡ ቦራታ ምስለታ ዞኩዋን ኡትስ። ቦራ ምስለታፐ ሄት ፑደሀ ባጋ፥ ሄት ዶሎሀ ባጋ፥ ሄት ዱገሀ ባጋ፥ ሄት ዉሎሀ ባጋ ስሚድ ፄሎሶና። አባ ሳነይ ኤንታ ቦላ ኡትስ። 26 አባ ሳነይ ኦይዱ ብራ ኦርደ፤ እያ ዶናይ ዋንጫ ዶና መላ፤ ጪሸ ዳኔስ። አባ ሳነይ ኦይታማነ እቻሹ ሙኩሉ ልትሮ ግድያ ሃ ኦይኬስ።

27 ክራም ታሙ ጋረታ ናሰ ብራታፐ መስ። ሄ ጋረት እሶይ እሶይ ኦይዱ ዋ አዱሰ፤ ኦይዱ ዋ ዳልጋነ ሄ ዋ ቃ። 28 ሄ ጋረት ሀይሳዳ ኦሰትዶሶና፤ ፑደ ኤቅዳ ኦይዱ ብራታ ቦላ ፕድ ግዳ ሎቸ ናሰ ብራታት ኦይከትድ ኡትዶሶና። 29 ሄ ብራታ ቦላ ጋሞ፥ ቦርነ ክሩበ ምስለት ደኦሶና፤ ጋሞነ ቦራ ምስለታፐ ሁጰራነ ቶሆራ ደእያ ብራታታ ቦላ ቆፅድ መዳ ጪሻ ኤንጩርሳ ምስለት ደኦሶና። 30 እስ እስ ጋርያስ ናሰ ብራታፐ ኦዳ ኦይዱ ገርቶትነ ገርቶታ ጋድ ዋፅያ ናሰ ብራታ ካሶት ደኦሶና። ሄሳዳካ፥ ኦይዱ ማዛነን ከርያ ዘምፕስያባት ደኦሶና። ሄ ዘምፕስያባት ጪሻ ኤንጩርሳ ምስለታን አሌቀትድ ኡትዶሶና። 31 ጋርያ ዘምፕስያ ሚሸታ ሁጰን ገርቶት ኡትዳ ዶያ በሲ ደኤስ፤ ሄ ዶያይ ጋርያ ፄራፐ ፑደ እስ ዋ ቁ ግድ፥ ዱገ ታካ ዝቅ ግድ መትስ። ሄ ዶያ በሳ ዶና ዩሾይ ምስለን አሌቀትስ። 32 ገርቶታ ጌሳይ እስ ዋነ ታካ፤ ገርቶት ሎቸ ናሰ ብራታታስ ጋርሳ ባጋራ ደኦሶና። ገርቶት ኦይከትድ ኡትዳ ካሶት ጋርያራ ኦይከትድ ኡትዶሶና። 33 ገርቶት ኦላ ፓራ ጋረ ገርቶታ መላ መትዶሶና፤ ገርቶታ ጋድ ኦይክያ ካሶት፥ ማጫራትነ ኤንታ ኦይክያ ሚሸት ኡባይ ናሰ ብራታፐ ኦሰትዶሶና። 34 ሄ ጋረታ ኡባ ማዛነታስ ኤንታ ቶሆሶራ ቶሆሶራ ኤንታራ እሶ ግድድ ኦይከትዳ ናሰ ብራታፐ ኦሰትዳ ዘምፖት ደኦሶና። 35 እስ እስ ጋርያ ሁጰ ባጋ ዩሹዋን ታካ አዱቅያ ክርክሮይ ደኤስ፤ ዘምፖትነ ሎቸ ናሰ ብራታት ጋርያራ ኦይከትድ፥ እሶ ግድድ ኦሰትዶሶና። 36 ሀ ዘምፖታፐነ ሎቸ ናሰ ብራታታፐ ግዶን ደእያ ዶያ በሳ ኡባይ ክሩበን፥ ጋሞንነ ዛምባ ምስለተን አሌቀትድ ኡትዶሶና፤ ኤንታ ዩሾይ ጪሻ ኤንጩርሳ ምስለን አሌቀትድ ኡትስ። 37 ህዛ ታሙ ጋረት ሀይሳዳ ኦሰትዶሶና፤ ኤንታ ላንፅዳ ሚሸይ እስኖ ግድያ ግሾ ኤንታ ጌሳይነ ኤንታ መይ እስ መላ።

38 ክራም ሜጨትያ ታሙ ከረታ ናሰ ብራታፐ መስ፤ እስ እስ ከርያ ጎምፓይ ኦይዱ ዋ ዳልጋ ግድድ፥ ሆስፑን ፄቱ ልትሮ ሃ ኦይኬስ፤ ታሙ ጋረታስ ሁጰን ሁጰን እስ እስ ሜጨትያ ከረይ ደኤስ። 39 ክራም እቻሹ ጋረታ ፆሳ ኬፈ ፑደሀ ባጋራ፥ እቻሹ ጋረታ ፆሳ ኬፈ ዱገሀ ባጋራ ዎስ፤ ናሰ ብራታፐ ኦሰትዳ አባ ሳንያ ፆሳ ኬፈ ዱገሀ ዶሎሀ ባጋ ዛሪድ ኤስስ።

40 ክራም ቃጰታ፥ አካፋታነ ፃሮታ መስ፤ ያትድ ካዋ ሶሎሞነስ ፆሳ ኬ ኦሱዋ ኦድ ፖልስ። 41 እ ኦዳ ኦሶት፥ ናምኡ ቱሳታ፥ ቱሳታ ሁጰን ደእያ ሳነ ዳንያ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ሳንላታታ፥ 42 እስ እስ ጉምቡዋ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ምስለታ፥ ኩም ኦይዱ ፄቱ ኦሮማነ ምስለታ፥

43 ታሙ ጋረታ፥ ጋረታ ቦላ ኡትያ ታሙ ሜቻ ከረታ፥

44 አባነ እያ ካትስያ ታማነ ናምኡ ቦራ ምስለታ፥

45 ከረታ፥ አካፋታነ ፃሮታ።

ክራም ካዋ ሶሎሞነስ ፆሳ ኬ ኦሱዋስ መዳ ሚሸታ ኡባ ቁሸትዳ ናሰ ብራታፐ መስ። 46 ካዎይ ሶሎሞነይ ሱኮታፐነ ፃርታናፐ ግዶን፥ ዮርዳኖሰ ደንባን ደእያ፥ ናሰ ብራታ ሼሽያ በሳን ሀይሳታ ኦስስስ። 47 ናሰ ብራታፐ ኦሰትዳ ሚሸይ ዳሮ ግድዳ ግሾ፥ ሶሎሞነይ እያ ማዛንስቤና፤ ሄሳ ግሾ፥ አይ መላ ዴፅያኮ ልከይ ኤረትቤና።

48 ሶሎሞነይ ፆሳ ኬ ግዶን ደእያ ሚሸታ ኡባ ዎርቃፈ መስስ። ሄሳትካ፥ ዎርቃፈ ኦሰትዳ ያርሾ በሳ፥ ጎዳ ስንን ዎያ ኡይይ ኡትያ ፃርጴዛ፥ 49 ኡባፈ ጌሻ በሳፈ ስንን ኡሻቻ ባጋራነ ሀድርሳ ባጋራ ኤቅዳ እቻሹ እቻሹ ፆምፐ ዎያ ኮጫታ፥ ጪሻታ፥ ፆምፐታነ ቃጰታ፥ 50 ፁአታ፥ ፆምፐ ቶይስያባታ፥ ፃሮታ፥ እፃነ ጩይስያባታ፥ ታማ ኤክያ ሚሸታ፥ ኡባፈ ጌሻ በሳ ቆልአ ፐንገታነ ፆሳ ኬ ካረ ባጋ ፐንገታ ኦይክዳ ማፃፈታ። ሀ ሚሸት ኡባይ ዋላህ ባይና ዎርቃፈ ኦሰትዶሶና።

51 ካዎይ ሶሎሞነይ ፆሳ ኬ ኦሱዋ ኡባ ፖልዳፐ ጉየ፥ እያ አዋይ ዳዊቲ ጎዳስ ዱማይድ ዎዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬ ሻሎ ምንጅያ ኬን ዎስ።