ኤልያሳነ ባኣለ ናበታ
1 እር ቡኮና አግን ሄን ላይን፥ ጎዳይ ኤልያሳኮ፥ "ባዳ ካዋ አካባስ ቆንጫ። ታ ቢታን እራ ቡክሳና" ያግስ። 2 ኤልያስ አካባስ ቆንጫናዉ ደንድድ ብስ።
ሄ ዎደ ሳማረን ዎልቃማ ኮሽ ከይስ። 3 አካብ ባ ካዎ ጋዋ አዋተን አይስያ አብድዩ ፄግስ። አብድዩይ ጎዳ ምንድ አማንያ አስ። 4 ኤልዛቤላ ጎዳ ሱንን ናበታ ዎዳ ዎደ አብድዩይ ኤንታፈ ፄታታ ኤክድ፥ እሻታማን እሻታማን ሻክድ፥ ጎንጎሎ ግዶን ቆስድ፥ ካነ ሃ እምሸ ጋምእስ።
5 አካብ አብድዩ ፄግድ፥ "ማታ ደምድ ፓራታነ ባቁሎታ ሀይቆፐ አሻናዉ ቢታን ፑልቶይ ደእያ በስነ ሻፋ ጋፃን ኡባ ባ" ያግስ። 6 ኤንቲ ቢታን አዉ ባጋ ባነኮ ሻከትድ ኤክን፥ አካብ እስ ኦግያ ኦይክድ ባርካ ብስ፤ አብድዩይ ሀራ ኦገ ኦይክድ ባርካ ብስ።
7 አብድዩይ ባ ኦግያ ኦይክድ ብሽን፥ ሄኮ፥ ኤልያስ እያራ ጋሄትስ። አብድዩይ ኤልያሳ ኤርድ ባ ሶምኡዋን ጉፋንድ፥ "ታ ጎዳዉ ኤልያሳ፥ ሀይስ ነኔ?" ያግስ።
8 ኤልያስ፥ "ኤ ታና፤ ኔኒ ባዳ፥ ሄኮ፥ ኤልያስ ሀይሳን ደኤስ ያጋዳ ነ ጎዳስ ኦዳ" ያግስ።
9 አብድዩይ ዛሪድ፥ "ታ ነና አይ ቆህን ነ ታና ነ አይልያ ሀይቆ ጋዳ አካባ ኩሸን አዳ እማይ? 10 ጎዳይ፥ ነ ደኦ ፆሳይ ኤሮ! ታ ጎዳይ ነና ኮያና መላ ኪትቦና ቢት ዎይኮ ካዎተ ባዋ። ኤንቲ፥ ‘ኤልያስ ሀይሳን ባዋ’ ግያ ዎደ ነ ያን ባይናይስ ቱማ ግደይሳ ኤራናዉ አካብ ደርያ አይሰይሳታ ጫቅሴስ። 11 ሀእ ኔኒ፥ ‘ባዳ፥ ኤልያስ ሀይሳን ደኤስ’ ያጋዳ ኦዳ" ያጋሳ።
12 "ታ ነና አጋዳ ብያ ዎደ ጎዳ አያናይ ነና ደንድ፥ ታ ኤሮና በሲ ኤፋና። ታ አካባስ ኦድን፥ እ ነና ደሞና እፅኮ፥ ታና ዎና። ታኒ ነ አይለይ ናአተፈ ዶማዳ ጎዳ ያይያ አስ። 13 ኤልዛቤላ ጎዳ ናበታ ዎዳ ዎደ፥ ታኒ ኤንታፈ ፄታ ኤካዳ፥ እሻታማን እሻታማን ሻካዳ እስ ጎንጎሎን ቆሳዳ፥ ካነ ሃ እማስ። ያትን፥ ታኒ ኦዳባይ ነዉ ታ ጎዳስ ኦደትቤኔ? 14 ሀእ ኔኒ፥ ‘ባዳ፥ ሄኮ፥ ኤልያስ ሀይሳን ደኤስ’ ያጋዳ ኦዳ ያጋሳ። ታ ኦድኮ እ ታና ዎና" ያግስ።
15 ኤልያስ፥ "ታኒ እያዉ ኪተትያ፥ ኡባፈ ዎልቃማ ጎዳይ ኤሮ! ቱማ ታኒ ሀች አካባስ ቆንጫና" ያግስ።
16 አብድዩይ አካባኮ ብድ አካባስ ኦድን፥ አካብ ኤልያሳራ ጋሄታናዉ ብስ። 17 አካብ ኤልያሳ በእዳ ዎደ፥ "እስራኤለ ቢታ ቡቀይ ነኔ?" ያግስ።
18 ኤልያስ ዛሪድ፥ "እስራኤለ ቢታ ቡቀይ ታና ግዶናሽን፥ ጎዳ ኪታ አግድ፥ ባኣለ ኤቃታ ጎይንድ፥ ቢታ ቡቀይ ነናነ ነ አዋ ሶ አሳ። 19 ሀእ፥ እስራኤለ አሳ ኡባ ቃርመሎሳ ዙማ ቦላ ታኮ ሺሻ። ኤልዛቤል ግብራ ምያ ኦይዱ ፄታነ እሻታሙ ባኣለ ናበታነ ኦይዱ ፄቱ አሼራ ናበታ እስፈ ሀ በሳ ሺሻ" ያግስ።
20 ሄሳ ግሾ፥ አካብ ኪትድ፥ እስራኤለ አሳ ኡባነ ናበታ ቃርመሎሳ ዙማ ቦላ ሺሽስ። 21 ኤልያስ ሺቅዳ አሳኮ ብድ፥ "አዉደ ጋካናዉ ናምኡ ዎዛናን ዳኔ? ጎዳይ ፆሰ ግድኮ እያ ጎይንተ፤ ባኣለይ ፆሰ ግድኮ እያ ጎይንተ" ያግስ። ግዶሽን፥ አሳይ እያዉ እስ ቃላካ ዛርቤና።
22 ሄሳፈ ጉየ፥ ኤልያስ፥ "ጎዳ ናበታፐ ታ ፃላል አታስ፤ ሽን ባኣለ ናበት ኦይዱ ፄታነ እሻታማ። 23 አነ ኑስ ናምኡ ኮርማታ እመቶ። ሄ ኮርማታፐ እሱዋ ኤንቲ ዶሮ፤ ኮርማ ሹክድ ቃንፀረ፤ አሹዋ ም ቦላ ዎ፤ ሽን ታማ ኤፎ። ታኒ ናምአን ኮርማ ጊግሳዳ፥ ም ቦላ ዎና፤ ታካ ታማ ኤከ። 24 ህንተ፥ ህንተ ፆሳ ሱን ፄግተ፤ ታካ ጎዳ ሱን ፄጋና። ስእድ ያርሹዋ ምያ ታማ ኪትያ ፆሳይ፥ እ፥ ፆሰ ግዶ" ያግስ።
አሳይ፥ "ነ ግያ ቆፋይ ሎኦ" ያግዶሶና።
25 ሄሳ ግሾ፥ ኤልያስ ባኣለ ናበታኮ፥ "ህንተ ዳሮ ግድያ ግሾ፥ እስ ኮርማ ዶርድ ኮይሮትድ ጊግስተ። ህንተ ፆሳ ሱን ፄግተ፤ ሽን እያን ታማ ኤፍተ" ያግስ።
26 ኤንቲ ባንታዉ እመትዳ ኮርማ ኤክድ ጊግስዶሶና።
ዎንታፈ ሴታ ጋላስ ጋካናዉ ባኣለ ሱን ፄግድ፥ "ባኣለ፥ ኑና ስአ" ያግድ ዎስዶሶና። ሽን ስኤትያ ግርስ ባዋ፤ ዛርያ አስ በንትቤና። ባንታ ጊግስዳ ያርሾ በሳ ዩሹዋን ዱርዶሶና።
27 ሳእ ሴታ ጋላሳ ግድን፥ ኤልያስ፥ "ህንተ ቃላ ቁ ኦድ ዎስተ! እ ፆሰ ግደነ! ኦን ኤር፥ እ ቆፋን ገልዳኮ ዎይኮ እያዉ ኦሶይ ዳርዳኮ ዎይኮ ማንዳርዳኮ ዎይኮ ስክዳባ ግድኮ ደንናዉ ኮሼስ" ያግድ ቀልቅስስ።
28 ኤንቲ ባንታ ቃላ ቁ ኦድ ዎስዶሶና። ካሰ ባንታ ጎይንያ ዎጋዳ ባንታ አሳተራ ሱ ጎጋና ጋካናዉ ቶራንነ ማሻን ባንታና ጫድዶሶና። 29 ኦማርስ ያርሾ ሺሽያ ዎደይ ጋካናዉ ኤንቲ ትንብተ ኦድዶሶና፤ ሽን ስኤትያ ግርስ ባዋ፤ ኤንታና ሀይዝድ ዛሮ እምያ አስ ይስ።
30 ሄሳፈ ጉየ፥ ኤልያስ፥ "ሃ ታኮ ሺቅተ" ያግስ። አሳይ እያኮ ሺቅን፥ ላለትዳ ጎዳ ያርሾ በሳ ዛሪድ ግምብስ። 31 ጎዳ ቃላይ ያይቆባኮ፥ "ነ ሱንይ እስራኤለ ግዳና" ያግድ ኦድዳ፥ ያይቆባ ናይታ ኮቻታ ታይቡዋን ታማነ ናምኡ ሹቻታ ኤክስ። 32 ጎዳ ሱንን ሄ ሹቻታ ኬልድ፥ ያርሾ በሲ ግምብድ፥ ታማነ ኦይዱ ልትሮ ሃ ኦይክያ ኦላ ያርሾ በሳ ዩሾን ቦክስ።
33 ሄሳፈ ጉየ፥ ያርሾ በሳን ም ዎድ፥ ኮርማ አሹዋ እያ ቆሙዋን ቆሙዋን ቃንፀረድ፥ ም ቦላ ዎስ። አሳኮ፥ "ኦይዱ ባ ሃ ኩንድ፥ ያርሹዋ ቦላነ ም ቦላ ጉስተ" ያግስ፤ ኤንቲ ጉስዶሶና። 34 ቃስካ፥ ኤልያስ፥ "ናምአን ጉጅተ" ያግስ፤ ኤንቲ ናምአን ጉጅዶሶና።
ቃስካ፥ ኤልያስ፥ "ሄን ጉጅተ" ያግስ፤ ሄን ጉጅዶሶና። 35 ሃይ ያርሾ በሳ ዩሹዋን ጎግድ፥ ኦላን ኩምስ።
36 ኦማርሳ ያርሾ ሺሽያ ዎደ ናበይ ኤልያስ ያርሾ በሳኮ ሺቅድ ሀይሳዳ ያግድ ዎስስ፤ "አቤት ጎዳዉ፥ አብራሃመ ፆሳዉ፥ ይሳቃ ፆሳዉ፥ እስራኤለ ፆሳዉ፥ ኔኒ እስራኤለ ቢታን ፆሰ ግደይሳ፥ ታኒ ነ አይለ ግደይሳነ ታኒ ሀይሳ ኡባ ነ ቃላን ኦዳይስ ሀች ኤረቶ። 37 አቤት ጎዳዉ፥ ታዉ ኮያ። ኔኒ፥ ጎዳይ ፆሰ ግደይሳነ ኤንታ ዎዛና ኔኮ ዛረይ ነና ግደይሳ ሀ አሳይ ኤራና መላ ታዉ ኮያ!" ያግስ።
38 ጎዳ ታማይ ሳሎፐ ዎድ፥ ፁሳ ያርሹዋ፥ ም፥ ሹቻነ ቢታ ምስ፤ ኦላን ደእያ ሃ ላጭስ። 39 አሳ ኡባይ ሄሳ በእዳ ዎደ፥ ባንታ ሶምኦራ ሳአን ጉፋንድ፥ "ጎዳይ ፆሰ! ጎዳ ፃላል ፆሰ!" ያግዶሶና።
40 ኤልያስ፥ "ባኣለ ናበታ ኦይክተ፤ ኤንታፈ እስ አስካ ከስ ኤኮፎ" ያግስ። አሳይ ኤንታ ኦይክዶሶና፤ ኤልያስ ኤንታ ቅሶና ሻፋ ኤፍድ ዎስ።
ጎዳይ እራ ቡክስስ
41 ኤልያስ አካባኮ፥ "ከያዳ ባ፤ ማ፤ ኡያ፤ ታኒ፥ ዎልቃማ እራ ጉን ስአይስ" ያግስ። 42 ሄሳ ግሾ፥ አካብ ማናዉነ ኡያናዉ ብስ። ሽን ኤልያስ ቃርመሎሳ ዙማ ቦላ ከይድ፥ ባ ሶምኡዋ ባ ጉልባታ ግዶ ገልስድ ሆክስ።
43 ኤልያስ ባ አይልያኮ፥ "አነ ባዳ፥ አባኮ ስማዳ ፄላ" ያግስ።
እያ አይለይ ብድ ፄልድ፥ "አይብካ በንተና" ያግስ።
ኤልያስ ባ አይልያ ላፑን ቶሆ፥ "ቃስካ ባዳ ፄላ" ያግስ።
እያ አይለይ ላፑን ቶሆ ፄልስ። 44 ላፑንን፥ "ኩሸ ቃቃፐ ዳሮና ጉ ሻር አባፈ ከይሽን በአስ" ያግስ።
ኤልያስ፥ "ባዳ፥ ‘እር ነና ቡሱ ድጎና መላ ነ ፓራ ጋርያን ኡታዳ ነ ሶ ባ’ ያጋዳ አካባስ ኦዳ" ያግስ።
45 ጉ ዎደፐ ጉየ ሳሎይ ካሬ ሻራን ዱልክስ፤ ጫርኮይ ጫርክስ፤ ዎልቃማ እር ቡክስ። አካብ ፓራ ጋርያን ኡትድ እዝራኤላ ካታማ ብስ። 46 ጎዳ ዎልቃይ ኤልያሳ ቦላ ዎስ። ኤልያስ ባ ማኡዋ ፄሳን ፑደ ስቅድ፥ እዝራኤላ ካታማ ጋካናዉ አካባ ስንን ዎፅስ።